Balon Programa na Sirkiton Asamblea

Labay itayon panisiaen na mundo a say kaplesan a sistema na bengabengatla so mansiansia lawas. Balet aliwan ontan so ibabaga na Salita na Dios ed sikatayo. (1 Juan 2:15-17) Ipapamoria na satan ed sikatayo a maapan gegemtan so ‘panipon na kaykayaman ed dalin.’ Pian napabiskeg iray totoo na Dios, say programa na sirkiton asamblea ya onggapo ed Pebrero, 2007 so mamalaknab ed teman “Mantipon . . . na Kaykayamanan ed Tawen.”​—Mat. 6:19, 20.

Say materyalistikon kanonotan et kabiangan ed saramay tinukoy na Efeso 2:2 a “pakayari na dagem, na espiritu a natan manggawa ed saray anak na kasusumpa.” No panon a say literal a dagem et walad amin a sukong tan sankasungap, ontan met a sayan sistema et aliktob na “espiritu na mundo.” (1 Cor. 2:12) Nibagan walaan itan na “pakayari” lapud mabisbiskeg so impluensya na satan. Say balon programa na sirkiton asamblea so ontulong ed sikatayon napaliisay materyalistikon panagnonot na mundo tan napansiansian malinlinew ed kanonotan iray prayuridad tayo. (Mat. 6:33) Niarum ni, say programa so ontulong ed sikatayon mandependi ed si Jehova legan tayon susumpalen so ministeryo tayo anggaman walaray desdes tan subok a kipapaarapan tayo.

Seguroen a wadman kayo ed saman a duaran agew tan ‘manimatlek [tekep na] baleg a seseg.’ (Heb. 2:1) Mangalay antikey a nota na saray punton niyaplika yon mismo ed bilay tan ministeryo yo. Diad pagmaliw yon presente manlapud gapoy gapo anggad sankasampotan na sayan makapabiskeg ed espiritual a programa, napaseseg kayo tan magmaliw a mas determinadon mantultuloy ‘a mantipon na kayamanan ed tawen’!