Ipatnag so Personal ya Interes—Diad Pakawalaay Maong a Linawa
1 “Si Jehova [so walaay] maong a linawa.” (Sal. 145:8) Anggaman sikatoy Sankatalbaan a Soberano, sikatoy mapangasi, makonsidera, tan magalang diad pidedeneng to ed ag-ayadyarin totoo. (Gen. 13:14; 19:18-21, 29) Napaaligwas tayoy presentasyon tayo ed maong a balita diad pangalig tayo ed Dios tayon walaan na maong a linawa. (Col. 4:6) Lalanoren na saya so nagkalalo ni nen say basta pagmaliw a magalang tan marespeto ed panagsalita tayo.
2 Diad Kada Puerta: Panon to no agmatukoy so oras na imbisita tayo ed unabung odino sikatoy okupadon maong kanian agto naarap so mitongtong ed sikatayo? Kaukolan tayon ikonsidera so ontan iran sirkumstansya diad pamatikey ed presentasyon tayo odino diad pangiyopresi tayon ompawil ed arum a panaon. Agtayo ipipilit ed totoo so literatura no agda awaten. Say konsiderasyon ed arum so mamakiwas ed sikatayon ipatnag so respeto ed kayarian da, a singa diad pangikapot ed saray lolooban tan puerta tan diad pangipasal tayo ed ananak tayo ya ontan met so gawaen da. Nepeg tayon seguroen ya agnanengneng na saray onlalabas so dinanman a literaturan itilak tayo ed saray andi ed abung. On, say inkamaong a linawa so mamakiwas ed sikatayon tratoen so arum a singa ed labay tayon pantrato ra ed sikatayo.—Luc. 6:31.
3 Panagtasi Diad Karsada: Legan a mibibiang ed panagtasi diad karsada, nipatnag tayoy inkamapagalang tayo diad agpansara ed saray dadalanan tan diad agpankukumpog ed arap na saray lakoan. Magmaliw itayon malikas ed saray sirkumstansya na arum, a mitongtong labat ed saramay nayarin walaan na pigaran minuto imbes a saramay manaapura. No maminsan, nayarin kaukolan tayoy mansalitan maksil pian narengel diad maungol so karsada. Balet gawaen tayo itan ed mapagalang a paraan, ya ag-itayo mangaalay imano.—Mat. 12:19.
4 Sano Mantatasi Panamegley na Telepono: Say konsiderasyon ed arum so mamakiwas ed sikatayon mantasi panamegley na telepono diad pasen ya aliwan maingal. Nipatnag tayoy maong ya ugali sano tampol tayon ikabat so inkasikatayo tan ipaliwawa so rason na intawag tayo. Say pansalita tayon walay dugarugan distansia ed telepono tan pamasiansia ed maabig a tono na boses so ontulong pian napibali so arum ed makapabiskeg a Makasulatan a tongtongan. (1 Cor. 14:8, 9) Diad pagmaliw a mapangasi, makonsidera, tan magalang ed sarayan nanduruman paraan, naalig tayoy Dios tayo, si Jehova a walaan na maong a linawa.