Itultuloy ‘Yo Ak a Tumboken’
1 Dakel so totoon say akasentroay bilay da et diad pamaliket ed inkasikara, balet mabetbet et aliwa ran maliket. Diad pidumaan, inrekomenda nen Jesus so kurang ya andi-siblet a panangiter a mangitarok na peteg a liket. (Gawa 20:35) Inkuan to: “No siopaman a too labay toy ontumbok ed siak, iburi to so inkasikato . . . tan [“mantultuloy a,” NW] tumboken toak.” (Mar. 8:34) Laktipen na saya so nagkalalo ni nen say sagpaminsan a pangikibot ed dili na panliket. Kabaliksan na saya so pambilay ed kada agew pian paliketen, aliwan say inkasikatayo, noag si Jehova.—Roma 14:8; 15:3.
2 Nonoten pa so ehemplo nen apostol Pablo. Lapud “karlangan na pikakabat ed Kristo Jesus,” intunda nen Pablo so pangemtan ed personal iran pilalek tan indeboto toy inkasikato ed pangilaknab na intereses na Panarian. (Fil. 3:7, 8) Inkuan to: “Siak sankabalgan a liket so pangiupot ko tan kaupot ko” diad panlingkor ed arum. (2 Cor. 12:15) Nepeg ya itepet na balang sakey ed sikatayo: ‘Panon kon uusaren so panaon, biskeg, abilidad, tan kayarian ko? Kasin iyaapasakey ko ed pandampot ed dilin panlabayan ko, odino panggugunaetan kon paliketen si Jehova?’
3 Saray Pankanawnawa a Mangiter: Kada taon, idedeboto na totoo na Dios so masulok a sakey bilyon ya oras ed manangisalbay bilay a kimey a panangipulong ed Panarian. Diad loob na kongregasyon, saray kalangweran tan maedad la so mangaasikaso ed nanduruman asainmin a makagunggona ed arum. Wala met so baleg a kimey a nagagawaan nipaakar ed saray asamblea tan saray kombension ontan met ed panagpaalagey tan panagmintina ed saray bilding ya uusaren ed pangilaknab na tuan panagdayew. Tan isipen pa so maaron tulong ya itatarya na saray agagi a manlilingkor ed Hospital Liaison Committees tan Patient Visitation Groups. Amin na saratan a dilin panagsakripisyon sagpot et bendisyon ed Kristianon impanaagi tayo!—Sal. 110:3.
4 Saray pankanawnawa tayon makapangiter na tulong ed nanduruman dalan so nagawa sano walay desyang odino emerhensia. Balet, mabetbet a nayarin basta tayo labat la natebek a say kaparan Kristiano so mankaukolan na tulong odino panamaseseg. (Uli. 17:17) Sano mabulos tayon iyopresi so inkasikatayo a manlingkor ed arum tan palaknaben so intereses na Panarian, aaligen tayoy ehemplo nen Jesus. (Fil. 2:5-8) Komon ta mantultuloy tayon panggunaetan a gawaen itan.