Epektibo so Pampulong Panamegley na Telepono
1. Akin et nibaga tayo ya importantin kabiangan na ministeryo tayo so pampulong panamegley na telepono?
1 Akin et nepeg tayon iyuksoy so manpulong panamegley na telepono no walay nausar tayo? Lapud sakey iyan paraan pian natulongan so arum a makagamor na suston pikakabat a kaukolan parad kililiktar. (2 Ped. 3:9) Anggaman say manunan metodo ya uusaren tayo pian iyabawag so maong a balita na Panarian na Dios et say panagpulong ed kabkaabungan, maliket itayo met a mangusar na arum a metodo pian napitongtongan iramay agtayo nasasabi ed abung da.—Mat. 24:14; Luc. 10:1-7; Apo. 14:6.
2. Panon ya oorganisaen so pampulong panamegley na telepono?
2 No Panon Iyan Organisaen: Singa ed uksoyan diad panagkabkaabungan a kimey, wala met iray teritoryan niasain ed saray manangipalapag a manpulong panamegley na telepono. Nayarin gawaen iya na sakey a bukor to labat odino kaiba so melag a grupo na duara odino talora. Nepeg ya anggapoy makadisturbo tan mareen so pasen a panggawaan yo ed satan. Mas mainomay parad arum so onyurong ed arap na lamisaan a kawalaan na saray mabetbet ya uusaren tayo ed panagpulong diad kabkaabungan.
3. Antoray nepeg tayon nonoten sano manpupulong panamegley na telepono?
3 No Panon so Pampulong Panamegley na Telepono: Sano manpulong itayo panamegley na telepono, kaukolan a say presentasyon tayo et diad paraan a singa tayo mitotongtong. Nayarin basaen na saramay kagapogapo da ni labat so presentasyon da, balet diad natural a paraan. Pian nagawaan itan, makatulong iray introduksion a walad libron Reasoning, Ministeryo Tayo ed Panarian, tan tract a Kasin Labay Mon Naamtaan so Katuaan? Sano mangipaparaan kayoy presentasyon yo, determinaen so teman usaren, manggawa kayo saray tepet, tan mangitarya kayo na saray tekston mangebat ed saratan. Say iyopresi yon literatura et saramay iyoopresi ed panagkabkaabungan. Imanoen yo pa irayan panonot: Kaukolan a normal tan relaks so pitotongtong. Nepeg met a mapagalang, maanos, tan makaaro so pitotongtong ta nalikas iya na saray katongtong tayo. Dengelen a maong so opinyon na unabung, insan pisalamatan tan apresyaen itan. Agyo sasalambiten so nipaakar ed panagdonasyon ta ompan ipasen da laingen ya onkekerew itayoy abuloy.
4. Anto so nayarin nagawaan tayo no manpulong itayo panamegley na telepono?
4 Nayarin say nakatongtong tayo ed telepono et baldado odino mansasakit, odino lapud eskedyul na trabaho to et agnasasabi na saray agagin mankakabkaabungan. Wala met iray totoon manaayam ed saray compound odino apartment ya agbasta-basta napulongan. Kanian pian mas sigpot tayon nakimeyan iray teritorya tayo, usaren tayo so epektibon metodo na pampulong panamegley na telepono.