Saray Suhestion ed Pangipresenta na What Is the Purpose of Life—How Can You Find It?
Kayari na pangibano ed unabung, oniay nayarin ibagam:
“Diad bilay natan et agnapaliisan iray problema tan pakadismayaan. Diad padesir yo, talaga kasin onia labat so bilay? [Abuloyan ya onebat.] Ipapanengneng na sayan brosyur a say orihinal a gagala na Dios parad katooan tan dalin et nagawa ni labat. [Itongtong so litrato ed pahina 20-1. Insan basaen so parapo 9, ya ipabitar so Isaias 14:24 tan 46:11.] Diad ipawil ko, labay kon ipanengneng ed sikayo diad Biblia so nipaakar ed pangipawil na Dios na Paraiso diad dalin.” Iyopresi so brosyur insan iyuksoy so ipawil.
Kapawil mo, oniay nayarin ibagam:
“Asalambit ko nen imbeneg a gagala na Dios a saray totoo et manbilay ya andi-anggaan diad paraison dalin. [Ipanengneng lamet so litrato ed pahina 20-1.] Imanoen a tinukoy di Jesus, Pedro, tan David so Paraiso.” Paipaway so brosyur to. Insan ibukay ed pahina 21-2, insan pantongtongan so parapo 10-13. Mangiyopresi na panangiyaral ed Biblia, odino iyuksoy a pantongtongan so sakey a subtitulo ed pahina 29-30 diad ipawil.
Oniay nayarin ibaga na sakey a tinedyer a manangipalapag:
“Dakel a kaedaran ko so manduaruwa nipaakar ed arapen. Diad padesir yo, onmaong ni kasi bilay diad ontumbok iran henerasyon? [Abuloyan ya onebat.] Say Biblia so manutukoy ed sakey a masnag ya arapen parad amin a katooan. [Ibukay ed litrato diad pahina 31 na brosyur, tan basaen so kapsion. Insan basaen so 2 Pedro 3:13.] Lugan na sayan brosyur so nipaakar ed saray bendisyon ya itatarya na Dios parad katooan. [Ipaimano iray mabatar a subtitulo diad pahina 29-30, insan iyopresi so brosyur.] Labay koy ompawil lamet pian inabang so sipan na Dios a panampoten so amin a guerra.” Iyuksoy so ipawil.
Kapawil mo, oniay nayarin ibagam:
“Nen imbeneg ya imbisitak, samet kon sinaglawi so gagala na Dios a pangipawil ed mangaraldalin a paraiso. [Ipanengneng lamet so litrato ed pahina 31.] Labay ko komon a naamtaan no antoy nibaga yo ed sipan na Dios a panganggaen so amin a guerra.” Paipaway so brosyur to. Insan basaen tan pantongtongan so parapo 3-6 diad pahina 29. Iyuksoy so paningbat ed parapo 7-8 diad ipawil.
Sano mankikimey a kaulop so sakey ya ugaw, oniay nayarin ibaga na wala la’d edad kayari pangipakabat ed sikaran dua:
“No iyabuloy yo, labay nen ________ ya ipanengneng ed sikayo so sakey a litrato tan ibasa so sakey a bersikulo ed Biblia. [Ipanengneng na ugaw so litrato tan basaen to so kapsion ed pahina 31 insan to basaen so Apocalipsis 21:4.] Ipapaliwawa na sayan brosyur no antoy gawaen na Dios ed saray probleman kipapaarapan tayo natan. [Ipabitar ed antikey iray mabatar a subtitulo ed pahina 29-30, insan iyopresi so brosyur.] Diad ipawil mi, labay kon ipanengneng ed sikayo so ibabaga na Biblia nipaakar ed panampot na amin a problema ed bunigas.”
Diad ipawil, oniay nayarin ibaga na wala la’d edad:
“Nen imbeneg ya impantongtong tayo, asalambit kon labay kon ipanengneng ed sikayo so ibabaga na Biblia nipaakar ed panampot na amin a problema ed bunigas. Imano yo so ibabaga to dia.” Paipaway so brosyur to. Insan pantongtongan so parapo 9-14 ed pahina 29. Mangiyopresi na panangiyaral ed Biblia, odino iyuksoy so paningbat ed parapo 15-17 diad ipawil.