Eskedyul ed Pantitipon Parad Panagserbi

Simba na Hunyo 13

Kanta 198

10 min: Lokal iran pakabat. Saray Pakabat a pinili manlapud Ministeryo Tayo ed Panarian. Usaren iray suhestion ed pahina 8 (no matukoy ed teritorya yo) pian idemostra no panon ya iyopresi so Hunyo 15 a Panag-Bantayan tan say Hunyo 22 ya Awake! Nayari met ya usaren so arum niran realistikon presentasyon. Diad sakey ed saray presentasyon, idemostra ya iyoopresi iray magasin ed impormal a paraan.

15 min: Tulongan so Arum a Magmaliw ya Agbautismadon Manangipalapag. Paliwawa ya ipibali iray dumerengel base ed Organisadon Manggawa na Linawa nen Jehova, pahina 79-81. Singbaten so uksoyan ed panitermina no kasin nakakapet la na iyaaralan na Biblia iray Makasulatan a kakaukolanen pian makapibiang ed lawak na serbisyo a kaibay kongregasyon. Diad ontumbok a simba et konsideraen tayo no panon ya ipasal iray iyaaralan na Biblia a kinmualipika la bilang agbautismadon manangipalapag ya onggapon mibiang ed panagkabkaabungan a ministeryo.

20 min: “Tutulongan Itayo na Panagpulong Pian Makapansungdo.”a Imbitaan iray dumerengel a mankomento ed saray nisitan teksto no wala ni oras.

Kanta 149 tan pansaran pikakasi.

Simba na Hunyo 20

Kanta 206

10 min: Lokal iran pakabat. Repasoen iray manunan punto ed Hulyo 2003 a Ministeryo Tayo ed Panarian, pahina 4. Ipaliwawa no panon a makala iray manangipalapag na saray literatura ed sankailin lenguahe. Singbaten no panon ya onaplika iyan impormasyon ed lokal a teritorya. Antokaman a kerew parad saray literatura ed sankailin lenguahe so nepeg a gawaen na manangasikaso ed literatura, anggano satan so saksakey labat, ta pian naalan tampol so nakaukolan a literatura bektaman a posible.

15 min: Say Salita na Dios et Mabiskeg. (Heb. 4:12) Paliwawa a base ed Nobyembre 15, 2003 a Panag-Bantayan, pahina 11, parapo 13-17. Mangisalaysay na saray eksperiensya a mangipapanengneng no panon a say panangiwanwan na Biblia et mamakiwas ed sakey a manguman ed kabibilay to. (w00 1/1 p. 3-5) Pasesegen so amin a mangusar a maong ed Biblia diad amin ya aspekto na ministeryo.

20 min: “Pangikondukta na Progresibo Iran Panangiyaral na Biblia​—Parte 9.”b Sano sisingbaten so parapo 2, mangipabitar na sakey odino duaran punto manlapud Disyembre 2004 a Ministeryo Tayo ed Panarian, pahina 8. Mangilaktip na sakey a demostrasyon a panangiyaral ed Biblia. Kayari ran akobrian lay leksion 2 ed brosyur a Kakaukolanen, tepetan na mangikokondukta so iyaaralan: “Panon mon ipaliwawa ed sakey a kaarom no antoy ngaran na Dios?” Ipaliwawa na iyaaralan no panon ton usaren so Salmo 83:18 tan kayari na satan et sikatoy komendaan na mangiyaaral.

Kanta 208 tan pansaran pikakasi.

Simba na Hunyo 27

Kanta 113

10 min: Lokal iran pakabat. Panonotan iray manangipalapag ya ireport da la ray serbisyo ra ed lawak parad Hunyo. Ibasa so report na kuenta tan saray naawat a donasyon. Diad pangusar ed nisuherin presentasyon ed pahina 8 (no matukoy ed teritorya yo), idemostra no panon ya ipresenta so Hulyo 1 a Panag-Bantayan odino say Hulyo 8 ya Awake! Nayari met ya usaren so arum niran realistikon presentasyon. Kayari na demostrasyon, saglawien lamet iramay manangilukas a komento ya inusar pian sagyaten so interes na unabung.

15 min: Lokal iran pankaukolan.

20 min: Panangiyopresi na Saray Brosyur ed Hulyo tan Agosto. Paliwawa ya ipibali iray dumerengel base ed insert. Ipaliwawa ed antikey no panon ya usaren so insert, ya ipabitar so kahon ed pahina 3 laktip iray manunan punto manlapud Enero 2005 a Ministeryo Tayo ed Panarian, pahina 8. Singbaten iray matukoy ed lokal a teritorya a suhestion ed pangiyopresi na saray brosyur ed primero iran dalaw. Mangidemostra na duara odino taloran presentasyon. Paidemostra ed kalangweran a manangipalapag so anggan sakey a presentasyon.

Kanta 196 tan pansaran pikakasi.

Simba na Hulyo 4

Kanta 70

10 min: Lokal iran pakabat.

15 min: Kasin Nagugunggonaan Kayo ed Eskedyul na Pamilya Yo? Repasoen iray suhestion ed Mayo 2005 a Ministeryo Tayo ed Panarian ya insert, insan imbitaan iray dumerengel a mankomento nipaakar ed impansagpot da pian niyaplika iray suhestion tan ed saray agunggona ra ed impanggawa ed satan.

20 min: “Epektibon Panagtasi ed Publiko Iran Pasen.”c Iyaplika ed lokal a teritorya. Panonotan iray manangipalapag a mangusar ed Please Follow Up (S-43) a porma sano matukoy.​—Nengnengen so Pebrero 2005 a Ministeryo Tayo ed Panarian, p. 6.

Kanta 120 tan pansaran pikakasi.

[Saray paimano ed leksab]