Panretiro​—Dalan a Mamaarap ed Apadaak a Kimey?

¹ Pirawat na dakel a makukulin totoo so panaon sano makapanretiro la ra pian makainawa la ed makapakesaw tan makapadesdes a sekular a trabaho. Balet, mabetbet a say panretiro so manreresulta ed agpananginenen, pakakameneng, tan anggapo’d panaon ya itatakken. No anggapoy makanan kimey na sakey a too, panaburidoan to laingen so inkasikato. Inreport na sakey a peryodiko ed Brazil a naeksperiensya na saray nanretiro ya empleyado iray nambabangil a problema a singa say ‘ag-inkakontento, inkaunganget, kapapagaan, tan pakawetwet ya angga ed depresyon tan panlikna a singa anggapoy gagala na bilay da.’

² Diad pidumaan, dakel a Kristiano so mangipapasen ed sayan balon parte na bilay da bilang dalan a mamaarap ed apadaak ya espiritual a kimey. Oniay inkuan na sakey ya agin laki a ginmapon nampayunir, duay simba kayarin sikatoy nan-65 años: “Agkon balot naeksperiensya ed bilay ko so ontan lan daakan a bendisyon a singa ed apalabas a samploy taon ya impanpayunir ko.” Oniay insulat na sakey a sanasawa: “Ginmapo so peteg a sankaabigan iran taon na inkatakken mi sanen ginmapo kamin nampayunir.” On, para ed dakel, say panagretiro so mangiiter na ekselentin pankanawnawa pian napalaknab so ministeryo ra tan manani na saray panamendisyon manlapud si Jehova.

³ Pantultuloy ya Okupado tan Mabunga: Dakel ed saray nanretiro la natan so tinmakken ya andian na kagkagawaan a kaslakan la natan tan naaralan da so impasyan pankimey manlapud inkaugaw da. Anggaman aliwa laran mabiskeg a singa nen tobonbalo ni ’ra, siansia nin dakel so nagagawaan da. Diad teritorya na sakey a sanga, 22 porsiento ed saray payunir​—manga 20,000 ya agagin lalaki tan bibii​—so man-edad na manga 60. Baleg so nitutulong na sarayan maedad la diad panagpulong a kimey. Say eksperiensya ra tan say maridios iran kalidad da so mamapayaman ed saray kongregasyon a panlilingkoran da.​—Sant. 3:17, 18.

⁴ Say pantultuloy ya okupado ed ministeryo bilang Kristiano so makakatulong ed pakawalaan na mabunigas a laman tan apaaligwas a kalidad na kabibilay. Oniay inkuan na 84 años ya agin bii a ginmapon nampayunir sanen sikatoy nanretiro: “Say pangiyaaral ko na Biblia ed dakel ya interesadon totoo so akatulong ed siak pian mansiansian aktibo so nonot ko. Anggapoy luluganan ko, kanian naynay ak a manaakar. Satan so ontutulong ed siak a mansiansian maksil.” Oniay inkuan na maedad la a sanasawa: “Say panaglingkor mi so ontutulong ed sikami a mansiansian mabunigas ed mental tan pisikal. Naynay kami a saniba. Mabetbet kamin maneelekan tan panggagayagaan mi so bilay.”

⁵ Panlingkor ed Lugar a Walay Pankaukolan: Arum ed saray nanretiro a Kristiano a walaan na magenap a pinansyal so inmalis pian manlingkor ed lugar a babaleg so pankaukolan parad saray managpulong na Panarian. Saray arum so amalaknab ed ministeryo ra diad panlilingkor ed lawak a duma so lenguahe. Singa si apostol Pablo, sarayan maseseg a manangipalapag so ‘manggagawa ed amin nisengeg ed ebanghelyo, pian makapinabang ira ed sikato.’​—1 Cor. 9:23.

⁶ Sakey a sanasawa so ginmapon nampayunir sanen apabaleg da lay duaran anak dan lalaki. Kayari na pigay taon ya impanpayunir da, sikaray ginmapon nanaral na lenguahe a Tsino. Natan a sikara lay mantaon na masulok a 70, sikaray magayaga diad impakaimaton ed agano ni ya impagmaliw na grupo na Tsino a pankikimeyan da bilang sakey a kongregasyon. Peteg a bendisyon so onian sanasawa!

⁷ Anggapo so Panagretiro ed Ministeryo: Anggaman diad kaunoran et maslak a totoo so manreretiro ed sekular a trabaho ra, anggapoy panagretiro na anggan siopa a Kristiano diad panaglingkor ed Dios. Amin so kaukolan a mansiansian matoor “angga ed kasampotan.” (Mat. 24:13, 14) Siempre, lapud itatakken et agla nagawaan na arum so datin nagagawaan da diad serbisyo ed si Jehova. Balet agaylan makapaseseg so pakaimaton ed sikara a manggagawa ed nayarian da diad interon puso! Ipapaseguro ed sikara na Salitay Dios ya aglingwanan nen Jehova so kimey tan aro ya impanengneng da para ed ngaran to.​—Luc. 21:1-4; Heb. 6:10.

⁸ No asingger kayo lan manretiro, akin ya ag-ipikasi tan nonoten no panon a sigpot a naanamot so manguuman iran kipapasen yo? Diad tulong na Dios, naromog yon say panagretiro so mangilukas ed dalan a mamaarap ed apadaak a kimey a mangitarok na dayew ed si Jehova tan dakel a bendisyon.​—Sal. 148:12, 13.