Panretiro—Lukas a Puerta ed Teokratikon Kimey?
PANRETIRO—parad dakel anggaan itan na andukey a panaon na panaburido tan iritasyon. Kayari inkipukok ed makapakesaw odino makapaunganget a rotina, maniilalo so dakel a diad panretiro et nawalaan iray pankanawnawa a taotaon na kipapasen a relaks tan walaay kawayangan. Balet mabetbet a tuloy a satan so puertan mangipaarap ed makapasawa tan ag-inkaligsa. Say panligliwaan tan panagpalabasay oras so agmangitarok na liknaan na dilin-kakanaan a singa itarok na say kimey.
Parad Tastasi nen Jehova, say panretiro so makapangilukas na “baleg a kaput” a mangitonton ed kimey. (1 Corinto 16:9) Anggaman talagan say itatatken et walaan na saray problema tan limitasyon, pigaran maedad la so akaromog a diad tulong nen Jehova et napadaak day serbisyo ra’d sikato. Konsideraen paray eksperiensia na pigaran maedad lan Kristiano ed Netherlands. Legan na 1995 serbisyon taon, 269 ed masulok a 1,223 pioneer (sigpot-panaon a manangiproklama na Panarian) so 50 taon odino masulok ni. Diad saraya et 81 so manedad na 65 taon odino onsulok ni.
Arum so akapanpayunir diad basta labat impangituloy ed okupadon andar ya inletneg da sanen mantratrabaho ni ra. (Ikompara so Filipos 3:16.) Nanonotan ni na sakey a nanretiron Kristianon manngaran a Karel: “Sanen siak so mantratrabaho, gendagendat ya onggagapo ak ed alas 7:30 n.k. Sanen ginapoan kon awaten lay pension ko, denisidek ya ituloy ko itan a rotina. Gagapoan koy agew diad panagmagasin ed lansangan ed arap na istasyon na tren a kinabuasan diad oras na ala siete.”
Say maalwar a panagplano so tombok met ed itatalona. (Uliran 21:5) Alimbawa, arum so akapangisukib na supisientin pundo a manlegpet ed sikara ed ministeryo ra. Deneside na arum a bawasan so personal a gagastosen da tan mantrabahon part-time. Konsideraen pa ira di Theodore tan Ann. Payunir la ra sanen linmoob ira ed estado ya anggad lapud obligasyon ed pamilya et intunda ray panagpayunir. Balet ta siansian mabilabilay so espirituy panagpayunir ed sikara! Diad pamapabaleg ed ananak dan bibii, naynay iran pinaseseg a manpayunir. Lalon importanti et si Theodore tan Ann so angipanengneg na maong ya alimbawa, a mabetbet iran nanlingkor bilang auxiliary pioneer. Diad itatatken la na ananak, binabawasan di Theodore tan Ann so trabaho ra ta pian naarumay panaon parad lawak a serbisyo.
Kayari inloob na ananak da ed sigpot-panaon a ministeryo tan inmalis la’d ayaman, nampayunir la’d satan si Ann. Sakey ya agew pinaseseg toy Theodore ya onekal la ed trabaho to. “Makapanpayunir ta a dua,” insuheri to. Pinakabatan sirin nen Theodore so amo to ed saray getma to. Abigla ta sikatoy inopresian na boss to na part-time a trabaho, a kuanton: “Diad padesir ko et labay moy mankimey a sigpot-panaon parad boss mo diman ed tagey [diman ed tawen].” Natan et panggagayagaan di Theodore tan Ann so paniiba ran panpapayunir.
Arum so nampayunir bilang ebat ed saray sirkumstansyan nagagawa ed bilay da. Say makapaermen ya impatey na anak dan bii tan apo ra so anagdag ed sakey a maedad lan sanasawa a seryoson nonoten so pakausaran da ed nakekeraan niran taon. (Eclesiastes 7:2) Imbes ya abuloyan so ermen a manalona ed sikara, inala ra so sigpot-panaon a serbisyo, a panggagayagaan da la natan ed loob na waloran taon!
Naaksobi, a kaukolan so peteg a determinasyon pian makapantultuloy ed sigpot-panaon a ministeryo. Singa bilang, si Ernst tan say asawa ton si Riek, so nampayunir bektan saray anak da so inmalis la ed abung. Ag-abayag et inyopresi na datin kanegosyo ed si Ernst so sakey a marakep a trabaho. Oniay inyebat nen Ernst: “Sankaabigan so manangimpleyo mi, tan agmi labay so itundan manserbi ed sikato!” Lapud nansiansia si Ernst tan say akulaw to ed ‘panangimpleyo’ nen Jehova, nilukas ed sikara so arum niran pribilihyo. Sikaray nanlingkor ed pansirkiton kimey ed loob na 20 taon tan nantultuloy bilang payunir anggad sayan agew. Kasin nagbabawian day dilin-panagsakripisyon kurso ra? Agano ni et oniay insulat na sanasawa: “No linawa nen Jehova, taloy bulan manlapud natan et ilaloan mi naselebraan so 50 taon na panamaley mi, a mabetbet a tatawagen a binmalitok ya anibersaryo. Balet tekep na sigpot a kombiksion nibaga min say peteg a binmalitok a taotaon mi et ginmapo sanen sikami nanpayunir.”
Nalmoan na dakel a say puertan mangipapaarap ed apadaak a kimey so mangipapaarap met ed apadaak a gayaga! Sakey ya agin laki a ginmapon nampayunir duay simba kayarin asabi toy edad a 65 a taon so nankuan: “Nibagak ya agkon balot naeksperiensia ed bilay ko so onia lan napnapno na bendisyon a singa ed samay apalabas a samploy taon na impanpayunir ko.” Sakey a sanasawan payunir la ed masulok a pitoy taon so nankuan: “Anto ni so kaukolan a gawaen na sanasawan kapara mi edad tan sirkumstansya? Mabetbet min naiimano so totoon mipadparay kipapasen da ed sikami ed teritorya—komportablin walad ayaman, balet ta ontataba, ontatatken, tan onkakapuy. Say serbisyo so mamapabunigas ed sikami ed mental tan pisikal. Lawas saniba kami. Panelekan min tuloy tan panggagayagaan so bilay.”
Siempre, aliwan amin a maedad la so walaan na sirkumstansyan mangiyabuloy ed sikaran manpayunir. Sarayan Kristiano so napaseguroan ya apresyaen nen Jehova so antokaman a sarag dan gawaen ed serbisyo to. (Ikompara so Marcos 12:41-44.) Singa bilang, sakey ya agmakayarin agin bii so niiyan ed nursing home. Anggaman ontan, sakey a puerta na kimey so siansian nilukas parad sikato! Sikatoy tinepetan na doktor no panon ton papalabasen so oras. Insalaysay to: “Imbagak ed sikaton agmagenap so panaon ko. Agto natalosan iya. Imbagak ya onia lapud dakel ya agew a napnapno ak na makapenek ya aktibidades. Agak begtebegtew, noagta aanapen koray arum a begtebegtew tan salien ya ibaga ed sikara so walan itatarya na Dios parad katooan.” Sinegek toray pamaakaran diad impangibagan: “Manlapud sakey a ngalngali la 80, agnailaloan na sakey so dakel. Ipikasi moak a dakel ni nitonton ko ed si Jehova.”
Wala ka ta la ed edad a manretiro? Say puerta na dagdaiset a kimey so nayarin makapatukso, balet aliwan satan so puerta na espiritual a bendisyon. Sipipikasin nonoten iray sirkumstansyam. Ompan nayarian moy onloob ed puertan mangipaarap ed babaleg a kimey ed serbisyo ed si Jehova.
[Saray litrato ed pahina 25]
Say panretiro so mangitonton ed apadaak ya aktibidad ed ministeryo