Pangapet ed Pankaukolan Parad Saray Kingdom Hall
1 Diad 2002 Yearbook of Jehovah’s Witnesses, pahina 17-20, niiter so report nipaakar ed balon programa na Sosyedad a “panagpaalagey na Kingdom Hall parad daldalin a limitadoy pundo ra.” Kasin naumameng yo la no panon so pakagawa na sayan programa dia ed Pilipinas? Panamegley na sayan insert et ipaamta min nagkalalo ed sikayo so nipaakar ed balon uksoyan.
2 Say balon programa so nipapakurang ed sankamundoan tan peles a mangaasikaso ed saray pankaukolan na agagi tayo ed 92 a bansa a kaukolan ditan ya ipaalagey so nilibon Kingdom Hall. Ta pian nakapet iyan pankaukolan tan makabat so pakausaran na nitalaga iran pundo, inyuksoy na Mananguley ya Ulop a sayan kimey so idirehi na Design/Build Department diad Brooklyn. Aporma so Limaran Regional Kingdom Hall Office pian ontulong ed panangorganisa. Say Sangan Pilipinas so nipapakurang diad silong na opisina ed Sangan Australia.
3 Inletneg so Kingdom Hall Construction Desk ed kada sanga pian mangasikaso ed panagpaalagey a kimey. Tutulongan na sayan desk iray kongregasyon legan na prosesoy panagpili na lote tan nanggawa met na saray apasakey a plano ya imbase ed matukoy a materyales tan saray metodo. Say gagala na programa et pian mangipaalagey na saray Kingdom Hall a simpli, walaay dignidad, tan daiset so nagastos.
4 Wala ta so pankaukolan parad sayan programa diad Pilipinas? Segseguradon say ebat tayo et On. Nen 2001 et pinirmaan na amin a manangasikaso na sirkito iray survey form nipaakar ed kipapasen na saray Kingdom Hall diad walan sirkito ra. Sanen adagup la so report, masulok a 1,300 so nakakaukolan a balo odino pasimbaloen a Kingdom Hall. Lapud andukey a panaon so nakaukolan ed kipaalagey na dakdakel a Kingdom Hall, kaukolan so pananos, ta agnayarin maminpinsan a nipaalagey irayan amin. Ontan met, kaleganan to et kapilitan a pansiansiaen a maabig so kipapasen na saray peles a Kingdom Hall tayo.−Sant. 5:7, 8.
Say Gagala na Kingdom Hall Construction Desk
5 Say Kingdom Hall Construction Desk so nipapakurang diad silong na panangasikaso na Branch Committee tan diad pikokoopera na Service Department. Diad ontan et niprayuridad iray kongregasyon a pirmin mankakaukolan na balon Kingdom Hall diad lugar a pankikimeyan na Kingdom Hall Construction Group.
6 Saray plano na Kingdom Hall a pangibasiyan so nitarya la parad saray simplin bilding. Saray desinyo so aliwan matrabaho anggaman siansian uusaren iray matukoy a materyales tan metodo ed panagpaalagey. Ipangasin nengnengen so duaran litrato a katekep na sayan insert. Ipapanengneng na sakey so main steel structure ya inusar bilang pinagkasuporta na bilding. Saya so tinuop la na sakey a lokal a kompanya balet ta impaalagey na saray agagi tayo diad loob labat na duaran agew. Ipapanengneng na sananey a litrato so asumpal a Kingdom Hall ya impaalagey diad silong na balon programa. Asumpal iyan bilding diad loob labat na duaran bulan.
7 Responsabilidad na Kingdom Hall Construction Desk ya asikasoen so amin ya aspekto na proyekto a Kingdom Hall. Laktipen na saya so pimiting lan unona ed Ulop na Mamatatken, pamili na desinyo tan kabaleg na Kingdom Hall, pangala tan suston kirehistro parad bilding, ontan met ed aktual a pangipaalagey na bilding. Sakbay a taynanan so proyekto, say panangipasal ed panmintina so nagawa met pian say Kingdom Hall et napansiansia ed maabig a kondisyon tan nausar ed loob na dakel a taon.
Kingdom Hall Construction Group
8 Panon a nipaalagey so Kingdom Hall? Inaprobaan na Mananguley ya Ulop so pamorma na saray Kingdom Hall Construction Group. Saray grupo so mangasisti ed saray mamatatken ed kongregasyon diad pangiparaan tan pangipaalagey na Kingdom Hall ontan met ed pangasikaso na gastos. Sarayan grupo so tibukelen na saray Kingdom Hall construction servant tan volunteer. Diad leksab et iter mi so antikey a deskripsion na sarayan komikimey tan no panon iran makatulong ed italona na proyekton panagpaalagey.
9 Saray Kingdom Hall construction servant: Manuna et saraya so maespiritual a lalakin eksperiensyado la ed konstruksion. Walaray kaiba met a kaasawaan a bibii a mantrabaho bilang kabiangan na saray construction group. Sakey a Kingdom Hall construction servant so manlingkor bilang manangasikaso a kaibay sakey nin kualipikadon agin laki bilang aturon katulongan to. Sikara so mangiyeskedyul, mangiparaan, tan mansubaybay ed kada proyekto. Saray kakaukolanen ed sayan nengneng na serbisyo so: bautismado la ed ag-onkulang a sakey taon, makapanbayag ed serbisyo, manlapud edad a 19 ya anggad 55, mabunigas, sarag toy ambelat a kimey, no nayari et wala la’d sigpot-panaon a serbisyo, tan akapanserbi la na ag-onkulang a duaran bulan bilang Kingdom Hall construction volunteer. Saray Kingdom Hall construction servant so taryaan a singa met ed arum niran espisyal a sigpot-panaon a lingkor a singa saray Bethelite, managbiahen manangasikaso, tan espisyal payunir.
10 Saray Kingdom Hall construction volunteer: Nen Nobyembre 2001 et apakabatan so amin a kongregasyon nipaakar ed sayan kimey tan akaawat ira na pigaran application forms (A-25) a nayarin pirmaan na saray interesadon indibidual. Diad kaplesan et akaawat kami la na masulok a 400 ed sarayan aplikasyon tan aapresyaen min maong so interes a nipanengneng ed sayan serbisyo na agagin lalaki tan bibii dia ed Pilipinas. Saray kakaukolanen parad saray Kingdom Hall construction volunteer so mipara ed saray Kingdom Hall construction servant. Say pandumaan et say construction volunteer so manlingkor lambengat ed limitadon panaon. No posibli et sikaray manaayam diad asingger ed proyekto ta pian nabawasay gastos parad pampundoan tan transportasyon.
Say Panagpaalagey na Kingdom Hall so Proyekto na Kongregasyon
11 Say panangipaalagey na Kingdom Hall so nagkalalo lan proyekto na kongregasyon. Manlapud gapo et saray matatken so nalalanor la ed panagyat na entusiasmo parad balon Kingdom Hall. Desisyonan so kinabaleg na bilding tan amtaen na mamatatken no antoy nisuporta na kongregasyon diad pinansyal tan diad panboluntaryo.
12 Amin ed kongregasyon so papasesegen a sigpot a manuporta ed dilin proyekto ra a Kingdom Hall. Walaray makapanboluntaryon inagew-agew kaleganan na proyekto. Bangta say arum so makapanggawa ed satan diad loob na sakey odino duaran agew lambengat diad kada simba. Anto so kimeyan da? Makatulong ira ed pamparaan na tagano, pampesak parad saray komikimey, panlinis ed sular a pangipaalageyan, panguardia ed labi, tan itulong ed aktual a konstruksion a kimey. Saray boluntaryon indibidual so mantrabaho diad panangasikaso na responsablin agagin lalaki a kabiangay Kingdom Hall Construction Group. Anggaporay nakakaukolan ya aplikasyon a pirmaan na saray boluntaryo ed kongregasyon balet ta nepeg a sikaray manangipalapag a walaay maabig a talindeg, mantaon na ag-onkulang a 17, tan inaprobaan na service committee ed kongregasyon.
Saray Kundang ed Pangipaalagey na Balon Kingdom Hall
13 Antoray kundang a gawaen na sakey a kongregasyon no pilalek day nawalaan na balon Kingdom Hall? Unona et kaukolan day mansulat ed sangan opisina. Lapud direksion na Mananguley ya Ulop a saray Kingdom Hall so nipaalagey lambengat parad saray kongregasyon a walaan na 30 odino onsulok nin manangipalapag, diad arum a kaso et nakaukolan ya imanoen no kasin praktikal so piulop ed sananey a kongregasyon parad mankasakey a proyekto. No saray Kingdom Hall so nausar na pigaran kongregasyon, maseguron saya so makabat a panangusar ed limitadon pundo tayo. Say ikdan na prayuridad et saray proyekton makagunggona ed mas dakel a bilang na manangipalapag. No posibli so ontan ya impankasakey ya areglo, nepeg a saya so salambiten ed unonan sulat tan saray service committee na kada kongregasyon a nalalanor so nepeg a manpirma ed sulat.
14 Bektaman a niasain la so Kingdom Hall Construction Group ed lugar yo, say Kingdom Hall Construction Desk so mangiyuksoy na pimiting ed lokal ya ulop na mamatatken, manangasikaso na sirkito no posibli, tan ed asingger iran ulop na mamatatken no masulok a sakey a kongregasyon so minabang ed proyekto. Sarayan manangilaman so nayarin manlapud sangan opisina odino lokal ya agagi a singa say manangasikaso na sakey a Kingdom Hall Construction Group a nipasal la ya ontulong ed saray ulop na mamatatken a manetermina no kasin kaukolan da so balon Kingdom Hall tan makatalos ed manuna iran prinsipyo ed Biblia a mangiwanwan ed sayan kimey.
15 Importante met so pangamta no antoray walan pinansyal a tulong parad proyekto. Inkuan nen Jesus ed Lucas 14:28: “Siopa ed sikayo so, anta labay to so mamaalagey na sakey ya ilang, ag-onyurong ya unona tan bilangen to so bili, no walaan kasi panumpal to ed sikato?” Say Kingdom Hall Construction desk so nipapakurang ed parehon prinsipyo. Ta pian naamtaan no kaunongan so sarag a nikontribusyon na kongregasyon parad proyekton Kingdom Hall, mansurbi iray mamatatken. Nakaukolan a saray pamilya tan indibidual so magmaliw a realistiko diad pangonsidera no pigaray sarag dan iter. Say nipabitar a kantidad so kaukolan a kabiangan na normal a badyet na pamilya.
16 Panon a niiter na balang sakey so kontribusyon to ed kongregasyon? Oniay ibabaga na 1 Corinto 16:1 tan 2: “Natan nisengeg ed osos lapu ed saray sasantos . . . Dia ed balang unonan agew na sinimbasimba balang sakey ed sikayo mangibiig na yatol to, unong ed yaaligwas to, pian aggawaen so panipon no onsabi ak.” Mitunosan ed saya, amin a kongregasyon a mankaliktan a nawalaan na balo iran Kingdom Hall so kaukolan a walaan na kahon parad kontribusyon parad pundo na pangipaalagey. Diad pagmaliw ya uliran na saray ministeryal ya aripen tan mamatatken, maseguro kami a say kongregasyon so manuportan tuloy ed proyekto.
17 No onggapo lan onkurang so Kingdom Hall Construction Group ed lugar yo tan no posibli lan napenek so pankaukolan yo parad Kingdom Hall, insan la iter ed satan iray kaaruman ya instruksion.
Matalona Iray Resulta ManlapudBalon Programa
18 Diad kaplesan et wala lay anemiran Kingdom Hall Construction Group ya onkukurang ed Pilipinas. Anggad Abril 2003, et 13 balon bilding so nipaalagey la. Saya so maabig a tuloy a gapoan tan iilaloan mi so kipaalagey na 24 ni diad sampot na sayan taon. Balet lapud masulok a 1,300 a Kingdom Hall so nakakaukolan, napapanotan itayo lamet ya amin so kaukolan a mananos legan a kikimeyan tayo so pakaresolbi ed pankaukolan tayo parad dakel nin Kingdom Hall.
19 Lapud say programa ed panagpaalagey na Kingdom Hall ed daldalin a limitado iray pundo ra so ginmapo la nen Nobyembre 1999, wala lay 5,542 a balo iran Kingdom Hall a nipaalagey ed 88 a daldalin. Pagmaliwen na maaron panagkontribusyon na sankamundoan ya impanaagi a posibli iyan “pampapara,” ta pian “say [kongregasyon ya] akatipon na dakel [et] anggapo so sulok to; tan say [kongregasyon ya] akatipon na daiset [et] anggapo so kulang to.” (2 Cor. 8:14, 15) Baleg ni so kimey a gawaen tan onggagapo ni lambengat iya ed Pilipinas. Say maples ya iyaligwas na sayan programa so mandependin tuloy ed walan pinansyal a tulong tan kualipikadon panangasikaso. Mailalo itayo a nanengneng no panon a bendisyonan nen Jehova iyan programa dia ed Pilipinas.
[Litrato ed pahina 4]
Framework na Kingdom Hall
[Litrato ed pahina 5]
Asampal a Kingdom Hall, Angat, Bulacan