Imanoen so Propesiya nen Daniel!

Katuloyan na Kapitulo Otso

Niliktar ed Sangi na Saray Leon!

Makapasagyat ya Impanguman na Saray Ebento

17, 18. (a) Antoy mangipanengneng ya agonigon si Dario ed situasyon nen Daniel? (b) Antoy agawa sanen pinmawil so ari ed ungib na saray leon dia ed kaimbuasan?

¹⁷ Pinmawil lay agonigon a Dario ed palasyo to. Anggapo iray managtogtog ed arapan to, ta agto labay so paligliwa. Imbes, nampuyat si Dario a sanlabi, a nanayunal. “Say ugip to inmandi a nanlapu ed sikato.” Nen palbangon la, masigsiglat a linma si Dario ed ungib na saray leon. Inkelyaw to ed maermen a bosis: “O Daniel, aripen na mabilay a Dios, say Dios mo, a sikato so panlilingkoran mo a naynay, masarag a mangilaban ed sika ed saray leon?” (Daniel 6:18-20) Sikatoy nikelawan​—tan nainawaan​—ta walay inmebat!

¹⁸ “O ari, manbilay ka komon a maando.” Diad sayan magalang ya impangibano, impatnag nen Daniel ya anggapoy imbel na linawa to ed ari. Amoria ton say peteg a sengegan na inkapasegsegang to et aliwan si Dario, noagta saray maibeg ya atagey ya opisyal tan satrap. (Ikompara so Mateo 5:44; Gawa 7:60.) Intuloy nen Daniel: “Say Dios ko imbaki to so anghel to, tan pinepe’to so saray sangi na saray leon, tan agda ak inano; bangta dia ed arap to say kaalasan sikato so aromog ed siak; et ontan met ed arap mo, O ari, anggapo so ginawak a dumsis.”​—Daniel 6:21, 22.

19. Panon ya apalikdo tan inmaneobra si Dario na saray atagey ya opisyal tan satrap?

¹⁹ Agaylay impakakonsiensia nen Dario ed saratan a salita! Amta ton anggapoy ginawa nen Daniel a sengeg na pangibuntokan ed sikato diad ungib na saray leon. Kabkabat nen Dario a nankokomplot iray atagey ya opisyal tan satrap pian papatey si Daniel tan inmaneobra ra so ari pian nagamoran day sinisiblet iran getma ra. Diad impangipilit da ya ‘amin ya atagey iran opisyal ed panarian’ et inrekomenda ray pangipasa ed ganggan, impatnag da ya impanon da met itan a pamaakaran ed si Daniel. Arapen nen Dario ed saginonor irayan masilib a lalaki. Balet unona et ingganggan ton agwaten si Daniel ed ungib na saray leon. Milagro, ta ag-anggan aguramot si Daniel!​—Daniel 6:23.

20. Antoy agawa ed mauges a kakabusol nen Daniel?

²⁰ Natan ta nisalba lay Daniel, sananey lan bengatla so asikasoen nen Dario. “Say ari nangganggan, et inyakar da so saray lalaki ya angidalem ed Daniel, tan imbantak da ra ed ungib na saray leon, sikara, saray anak da, tan saray asawa ra, et saray leon sikara so pinatulok da et pinuter da so saray amin a pukel da.”a​—Daniel 6:24.

21. Diad impantrato ed saray membro na pamilya na saray managgaway mauges, antoy walan pandumaan na Mosaikon Ganggan tan saray ganggan na arum a kultura nensaman?

²¹ Say impamatey, ya aliwan saray nankokomplot labat, noagta ontan met ed kaasawaan tan ananak da et ompatnag ya alablabas met la ya inkaruksa. Diad piduma, nikuan ed Ganggan ya inter na Dios panamegley nen propeta Moises: “Saray ama ag-ira napapatey nisengeg ed saray anak, tan saray anak ag-ira napapatey naani nisengeg ed saray ama: noag say balang sakey a too napapatey nisengeg ed kasalanan to met lanlamang.” (Deuteronomio 24:16) Anggaman kuan, diad arum a kultura nensaman, agmakapakelaw a papatey iray membro na pamilya a kaibay managgaway mauges, diad kaso na seryoson krimen. Nayarin ginawa iya ta pian agla makabawi iray membro na pamilya ed arapen. Balet, aliwan si Daniel so sengegan na sayan ginawa sumpad saray pamilya na saray atagey ya opisyal tan satrap. Nayarin sikatoy agonigon ed inkadesyang ya intarok na sarayan marelmeng a lalaki ed pamilya ra.

22. Anton balon proklamasyon so impaakseb nen Dario?

²² Anggapo lay masilib iran atagey ya opisyal tan satrap. Angipaakseb si Dario na proklamasyon, a nikuan: “Manggawa ak na bilin a dia ed amin a panuleyan na panarian ko, a saray totoo onggiwgiw tan ontakot ira komon ed arap na Dios nen Daniel; ta sikato so dios a mabilay, tan mansiansia lawas, tan say panarian to satan agnaani nabagbag; tan saray panuley to sikato naani angga ed anggaan. Sikato so mangilaban tan manondon, tan sikato so manggawa na saray tantanda tan makapakelaw ed tawen tan dia ed dalin, a sikato so angilaban ed Daniel ed pakapanyari na saray leon.”​—Daniel 6:25-27.

Mantultuloy a Manlingkor ed Dios

23. Anton alimbawa so inletneg nen Daniel nipaakar ed sekular a trabaho to, tan panon a sikatoy naalig tayo?

²³ Angiletneg si Daniel na maabig ya alimbawa ed saray modernon-agew a lingkor na Dios. Lawas ya anggapoy pakabalawan na kondukta to. Diad sekular a trabaho to, si Daniel so ‘mananumpal, anggapo so anggan anto a lingo odino pankulangan ya aromog ed sikato.’ (Daniel 6:4) Diad miparan dalan, nepeg a makuli so sakey a Kristiano no nipaakar ed trabaho to. Agto met labay ya ibagan magmaliw lan mapeget ed negosyo a magunaet lan manggegemtan ed materyal a kayamanan odino mangibaliwala la ed pankaabigan na arum basta labat la onasenso ed kompanya. (1 Timoteo 6:10) Kinaukolan na Kasulatan a matuan sumpalen na sakey a Kristiano iray sekular ya obligasyon to tan diad intiron-kamarerwan paraan, “a singa ed si Jehova.”​—Colosas 3:22, 23, NW; Tito 2:7, 8; Hebreos 13:18.

24. Panon a pinaneknekan nen Daniel so inkasikato ya agmikompromiso no nipaakar ed panagdayew?

²⁴ Diad panagdayew to, ag-akikompromiso si Daniel. Say ugali ton manpikasi so kabat na publiko. Niarum ni, kabkabat na saray atagey ya opisyal tan satrap a seryoso si Daniel ed panagdayew to. On, kombinsido ira a tumboken to iyan rotina anggano isesebel na ganggan. Agaylan abig ya alimbawa parad saray Kristiano natan! Kabkabat met ira ed pangiyuuna ra ed say panagdayew ed Dios. (Mateo 6:33) Mapatnag iya komon ed saray makakanengneng, ta ingganggan nen Jesus iray patumbok to: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.”​—Mateo 5:16.

25, 26. (a) Antoy nayarin nibaga na arum nipaakar ed ginawa nen Daniel? (b) Akin a minoria nen Daniel a say panguman ed say rotina to et nibilang a pikompromiso?

²⁵ Nayarin ikuan na arum ya apaliisan komon nen Daniel so panamasegsegang no sikatoy maamot a nampikasi ed si Jehova ed loob na 30-agew. Tutal, anggapo so partikular a posisyon odino kipapasen a kaukolan ta pian dengelen na Dios itan. Natebek To ni ingen iray dalepdep na puso. (Salmo 19:14) Anggaman kuan, minoria nen Daniel a say panguman ed say rotina to et nibilang a pikompromiso. Akin ey?

²⁶ Lapud kabkabat la so ugali nen Daniel a manpikasi, anto kasin mensahe so nipasabi no sikatoy biglan ontunda? Nayarin ikuan na saray maniimaton ya antakot ed too si Daniel tan say ganggan na ari et apalumbasan toy ganggan nen Jehova. (Salmo 118:6) Balet impatnag na saray kiwas nen Daniel ya inawat nen Jehova so nikabkabiig a debosyon to. (Deuteronomio 6:14, 15; Isaias 42:8) Siempre, diad impanggawa’d satan, aliwan andiay galang a minelmelag nen Daniel so ganggan na ari. Balet ta aliwa met a sikatoy takyot a mikompromiso. Intuloy labat la nen Daniel so nampikasi ed silir na atep to, ‘a singa maparanay to lan gagawaen’ sakbay na say ganggan na ari.

27. Panon a naalig na saray lingkor na Dios natan si Daniel diad (a) pampasakop ed saray atagtagey a pakauley? (b) itulok ed Dios bilang manuley imbes a saray totoo? (c) panggunaet a manbilay a mikareenan ed amin a totoo?

²⁷ Makaaral iray lingkor na Dios natan ed alimbawa nen Daniel. Sikaray mansiansian “pauleyan ed saray atagtagey a pakauley,” ya ontulok ed saray ganggan na bansa a panaayaman da. (Roma 13:1, NW) Balet, sano saray ganggan na too so onkontra la ed saray ganggan na Dios, aligen na saray totoo nen Jehova so talindeg na saray apostol nen Jesus, a makpel ya angikuan: “Nakaukolan ya unoren mi so Dios, nen saray totoo.” (Gawa 5:29) Diad panggawa’d satan, ag-iyaalibansa na saray Kristiano so iyaalsa odino rebelyon. Imbes, say getma ra et basta labat la manbilay a mikareenan ed amin a totoo ta pian sikaray “makapantultuloy a manbilay a mapalna tan mareen a walaan na sigpot a maridios a debosyon.”​—1 Timoteo 2:1, 2, NW; Roma 12:18.

28. Panon a nanlingkor si Daniel ed si Jehova “a tuloytuloy”?

²⁸ Diad amiduan inkagawa et inkuan nen Dario a si Daniel so manlilingkor ed Dios “a tuloytuloy.” (Daniel 6:16, 20, NW) Say Aramaikon nanlapuan na salitan nipatalos a “tuloytuloy” et mankabaliksay “panliberliber.” Isusuheri na satan so ideya na pantultuloy ya itelek, odino bengatlan agmanunda. Ontan so integridad nen Daniel. Tinumbok na satan so nipasakbay lan pangaligan. Agnapanduaruwaan no antoy gawaen nen Daniel sano nipaarap ed saray subok, baleg man odino melag. Itultuloy to so datin ginawa to ed linmabas lan pigaran dekada​—say katooran tan panagmatalek to ed si Jehova.

29. Panon a nagunggunaan iray lingkor nen Jehova natan manlapud inkamatoor nen Daniel?

²⁹ Saray lingkor na Dios natan so malabay a manumbok ed ginawa nen Daniel. On, binilin nen apostol Pablo so amin a Kristiano ya imatleken da so alimbawa na matakot ed Dios a totoo nensaman. Lapud pananisia, sikaray ‘nanggawa na katunongan, akagamor na sipasipan,’ tan​—mapatnag a si Daniel so atukoy​—‘amepet ed sangi na saray leon.’ Bilang lingkor nen Jehova natan, ipatnag tayo komon so pananisia tan impantultuloy nen Daniel tan ‘batiken a siaanos so babatiken a niyan ed arap tayo.’​—Hebreos 11:32, 33; 12:1.

[Saray paimano ed leksab]

ANTO SO ATEBEK YO?

• Akin a denesidi nen Dario a Medo ya usaren si Daniel ed atagey a puesto?

• Anton masilib a plano so ginetma na saray atagey ya opisyal tan satrap? Panon ya inliktar nen Jehova si Daniel?

• Antoy naaralan yo ed pangimano ed alimbawa na impanmatoor nen Daniel?