Kasin Nepeg Mon Palaknaben so Punto de Bistam?

AGAWA so makadesyang a yegyeg ed Kobe City diad banda’d sagur na Hapon, tan tampol a tinmulong iray masakripisyon boluntaryo ed saray naapektaan a manaayam diman. Balet, imbaliwala na sakey a walad Health Bureau na syudad so kerew na saray binmisitan grupo na doktor parad suplay a tambal. Labay na saman ya opisyal, a direktor met ed sakey a baleg ya ospital na baley, ya onlan mismo iray biktima ed saray ospital na Kobe imbes a diman ed saray relief center so pangusaran na saray doktor ed ankabli iran iniksion tan dekstros. Diad kaunoran, naabuloyan so kerew na saray doktor, balet say akadkaunan mapeget ya awawey na doktor tan say ompatnag a kakulangan toy panangabagey so nansengegay lapag a kritisismo.

Nayarin naeksperiensiam met so ontan ya inkapeget na sakey a walad pakauley. Nayarin nakokonsiensia ka met lapud agawam itan. Nagunggunaan ka kasi no bayuboan mo so malalaknab a punto de bista?

Amtaen so Kompleton Detalyi

Kaslakan la ed sinansakey so onnengneng ed saray bengatla ed sakey labat ya anggulo, odino punto de bista, a kalilimitaan na pakatebek tan pakatalos da ed saray pamaakaran. Mabetbet et makasengeg iya ed edukasyon, eksperiensia ed bilay, tan abenegan. Nadampot so mas makabat iran desisyon sano panggunaetan na sakey so pakawalaan na kompleton detalyi. Singa bilang, no ombabaliw ka ed nansangaan a manbabwes iray luganan tan anggapo iray stoplight, makabat kasi so basta diretson inengneng? Andin balot! Mipadpara, say pamalaknab mo ed panag-isip mo pian naamtaan so intiron detalyi so makatulong ed saray panagdesisyon mo tan ed ikiwas mo diad responsablin paraan. Makapangisalbay bilay ni ingen itan.

Nayarin amin tayo so onaligwas ed sayan pamaakaran. Kanian tepetan mo pay inkasika, ‘Anto so pigaran aspekto a posibli ak a nagunggunaan ed pamalaknab koy panag-isip ko?’

Say Panmoriam ed Arum

Anto so iimanoen mo sano onnenengneng ka ed arum? Walaan ka kasi na tendensian moriaen so ibabaga odino gagawaen da bilang mauges odino maong, a singano anggapo lay arum a sengegan odino panimbangan? Kasin momoriaen mo so komento na sakey bilang komplimento odino insulto? Kasin say sakey et sigpot a duga odino nagnap ya aliwa? Say pakawalaan na ontan a punto de bista et singa sakey a litratista ya ibabaliwala to so dakel a pandurumaan na magket tan arum nin kolor a walad marakep a kaliberliber sano panaoy otonyo, a singano andeket tan amputi lambengat so walan kolor. Odino kasin lanang mon iimanoen so negatibon aspekto na inkatoo na sakey, a singano sakey a managbiahe ya abaliw so panggagayaga to’d marakep a nenengnengen lapu lambengat ed melag a dutak ya intilak na arum a bisita ya anggapoy konsiderasyon?​—Ikompara so Eclesiastes 7:16.

Dakel so naaralan no konsideraen so panmoria nen Jehova ed kalilingo na too. Anggaman amta ton dakel so kakapuyan tan isasaew na too, agto iteteen odino pansiasiansiaen so imano to ed saratan. Oniay inkuan na misalsalamat a salmista: “No sika, Jehova, et uninengen mo so saray kasulitan, O Katawan, siopa kasi so makaalagey?” (Salmo 130:3) Mabulos si Jehova a mangekal ed saray kasulitan na saray magbabawin managkasalanan, on, intiramintin punasen to iratan, ta pian aliwa iratan a dumsis ed siglaotan tayo’d sikato. (Salmo 51:1; 103:12) Nibaga nen Jehova ed si Arin David, ya akapigawaay seryoso iran kasalanan ed si Bat-seba, a sikato so too a “tinumbok to ak ed simoon a puso to, pian gawaen to lambengat so matunong ed imaton ko.” (1 Arari 14:8) Akin ya oniay nibaga na Dios nipaakar ed si David? Lapud inyapasakey to so magmaong iran kualidad nen magbabawin David. Inkonsidera ton amin so matukoy a sengegan tan denisidi ton itultuloy ya inatnat so panangasi ed lingkor to.

Nagnap ya inwandag nen Kristo Jesus iyan malaknab a panmoria ed saray kalilingoan na arum. (Juan 5:19) Sanen nipaarap ed saray kakulangan na saray apostol to, si Jesus et mapangasi tan makatalos. Binidbir to so nipaakar ed ag-inkayadyari na totoo ya anggaman ‘say espiritu so malikeliket, balet say laman makapuy.’ (Mateo 26:41) Sinononot ed saya, apidenengan nen Jesus iray kakapuyan tan kalilingoan na saray babangatan to diad maanos tan makatalos a paraan. Agto inyapasakey ed saray isasaew da, imbes, inyapasakey to ed maong iran kualidad da.

Diad sakey ya inkagawa kayari ton impetek iray apostol to lapud nansasangsangan da no siopay sankatalonggaringan ed sikara, oniay inyarum nen Jesus: “Bangbalet sikayo so nansiansia ed siak ed saray inkatuktuksok; et manuro ak ed sikayo na sakey a panarian, a singa say Amak anuro ed siak, pian makapikan tan makapiinum kayo ed dulang ko dia ed panarian ko; et onyurong kayo ed saray trono a mangukom ed labindua a poli na Israel.” (Lucas 22:24-30) On, anggaman ed dakel ya insaew na saray apostol, ninodnonot nen Jesus so impanmatoor da tan say panangaro ra ed sikato. (Uliran 17:17) Walaan na kompiyansa si Jesus ed nasarag tan nagawaan da, kanian sikatoy akisipanan ed sikara parad sakey a Panarian. On, ‘inaro ira nen Jesus angga ed kasampotan.’​—Juan 13:1.

No naiingongotan ka ed dumaruman estilo tan saray kakulangan na personalidad na sakey, aligen si Jehova tan si Jesus. Palaknab moy panag-isip mo, tan salien ya ikonsidera so amin a sengegan. Diad dugan panmoria ed saray bengatla, mas mainomay mon naaro tan naapresia so agagim.

Diad Panangiter na Materyal

Say pribilihyo na panangiter so sakey ed saray panggagayagaan a ninatnat ed saray Kristiano. Balet kasin nakaukolan tayon geteran so panangiter tayo diad sakey lambengat a nengneng na kimey, a singa alimbawa et say pibibiang ed lawak na ministeryo? (Mateo 24:14; 28:19, 20) Odino kasin napalaknab mo so panag-isip mo diad pangilaktip ed saray pisikal a pankaukolan tan pankaabigan na arum? Siempre, kabat na amin a Kristiano a say panangiter ed espiritual a paraan so sankaimportantian. (Juan 6:26, 27; Gawa 1:8) Ingen, singa kaimportanti met na panangiter ed espiritual a paraan, maseguron agnibaliwala so panangiter ed materyal a paraan.​—Santiago 2:15, 16.

Diad pannonot tayo ed saray pankaukolan na agagi tayo ed espiritual diad mismon kongregasyon tayo tan ed intiron mundo, lalon naamtaan tayo no antoy nagawaan tayo pian natulongan tayora. Sano saramay walaan da et mabunbunlok ya ontulong ed arum, nagawa so panparpareho. Diad onian paraan et naasikaso iray pankaukolan na amin ya agagi tayo. Oniay impangibalikas na sakey a Kristianon matatken ed satan: “No onlesa so pankaukolan diad sakey a parti na mundo, sikaray tulongan na agagin walad sananey a parti na mundo. No agda nasarag so ontulong, insan ontulong met iray agagi ed arum a pasen. Kanian naasikaso iray pankaukolan na agagi tayo ed sankamundoan. Talagan agaylan abig so sankamundoan ya impanaagi.”​—2 Corinto 8:13-15; 1 Pedro 2:17.

Agmakaonla so sakey a Kristianon agin bii a masimoon a nampilalek ya onatendi ed sakey ed saray internasyonal a kombension diad Mamabukig ya Europa. Balet, nadngelan ton saray agagi diman so mankaukolan na dakel a Biblia, kanian impawit to’d sakey ya inmatendi so kontribusyon to parad saratan a Biblia. Kanian, naeksperiensia to so liket ed panangiter, diad impanginabang to ed saray agagi to ed arum a dalin.​—Gawa 20:35.

Nayarin diad pamalaknab moy kanonotan mo et makapangikontribusyon ka ni ingen na babaleg ed lawas onlalaknab a kimey na panagbangat na Biblia diad sankamundoan, a napanggayagaan mo tan ontan met ed arum.​—Deuteronomio 15:7; Uliran 11:24; Filipos 4:14-19.

Sano Manisimbawa

Sano kinaukolan a manimbawa odino mametek, say makonsidera tan asimbang a panagkatunongan so ontulong ed sikatayo pian nagamoran tayoy respeto na agagi tayo ed espiritual tan talagan makapangiter itayo na epektibon tulong. Main-inomay so pangiyapasakey ed pigaran katuaan tan manggaway bengatbengat tan walay lalabien a konklusyon. Mangiter iya na impresyon ya ataptapew so kanonotan tayo, ya ompan sarado la ingen so kanonotan tayo, a singa saray pangulo na relihyon ed panaon nen Jesus, a pinabelatan day arum ed dakerakel a totontonen da. (Mateo 23:2-4) Diad biek a dapag, no paliisan tayo so inkaalablabas tan mangiter itayo na maabig a konseho a nibase labat ed saray prinsipyo na Kasulatan, a mangipatnag ed matunong ingen asimbang tan mapangasin panag-isip nen Jehova, mas mainomay ya awaten tan iyaplika na arum iray suhestion tayo.

Pigaran taon lay linmabas, nandaragup iray kalangweran a lalaki manlapud pigaran kongregasyon pian mibiang ed pagalaw. Makapaermen, linmesa so espiritu na kompetisyon ed limog da, a nansumpal ed ansakit ya ebatan. Panon ya inasikaso na saray matatken so problema? Say pamidbir ed pankaukolan na saray kalangweran na panligliwaan, agda inrekomendan aglaran balot manggagalaw. (Efeso 5:17; 1 Timoteo 4:8) Imbes, angiter iray mapekder ingen makatunongan iran pasakbay nipaakar ed pansumpalan na espiritu na kompetisyon. Angiter met iray makatulong a suhestion, a singa say kiwala na saray agagin matakken tan responsabli. Inapresia na saray tobonbalo so kakabatan tan inkasimbang na simbawa tan maabig so inkiwas da. Niarum ni, inmaralem so respeto tan panamabli ra ed mamatatken.

Isekar so Pamalaknab

Anggaman agmo ginagala odino agmo amtan akapangidumaduma ka, siansian kaukolan ni so determinadon sagpot pian napalaknab moy kanonotan mo. Diad panaaral moy Salitay Dios, dalepdepen itan ta pian natebek tan natalosan mo so dalan na kanonotan nen Jehova. (Salmo 139:17) Salien a talosan iray rason na saray balikas ed Biblia tan saray prinsipyon nalalanor, tan pambanikelan a determinaen iray pamaakaran a singa panidetermina nen Jehova. Mitunosan iya ed pikakasi nen David: “Iparungtal mo ed siak so saray dalan mo, O Jehova; ibangat mo ed siak so saray basbas mo. Itonton moak ed katuaan mo tan ibangat moak.”​—Salmo 25:4, 5.

Nabendisionan ka diad pakawalaan moy mas malaknab a panmoria. Say sakey a bendision na apalaknab a punto de bista et say pakawalaan moy reputasyon na pagmaliw ya asimbang tan walaan na pakatalos. Nasarag moy onkiwas ed mas makatunongan tan makatalos a paraan sano ontutulong anggaman ed nanduruman situasyon. Bilang resulta, mamawala met iya na alay abig a pankakasakey tan pantutunosan na Kristianon impanaagi.

[Saray litrato ed pahina 12]

Makatulong ed arum so mabunlok a panangiter, mamagayaga ed angiter, tan mamaliket ed mangatatawen ya Ama tayo