Panangaro ed Saramay ‘Kapananisiaan’
SARAY puron Kristiano so walaan na singa pamilyan siglaotan ed limog dan dili. On, nanlapula’d inmunan siglo K.P., mantatawagan iray “agi.” (Marcos 3:31-35; Filemon 1, 2) Aliwa lambengat iratan a termino; tukoyen na saratan so deskripsion ed no antoy liknaan na saray managdayew ed Dios ed balang sakey. (Ikompara so 1 Juan 4:7, 8.) Oniay kuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.”—Juan 13:35.
Pinmatnag so ontan ya aro nen Hulyo 1997 sanen agawa ed Chile so abayag a kelang a tinumbokan na biewbiew ya uran tan indelap. Bigbigla, dakel so mankaukolan na tagano, kawesen, tan arum nin bengatla. Diad saray situasyon a walay kalamidad, pambabanikelan na Tastasi nen Jehova a tumboken so simbawa nen Pablo ed saray taga-Galacia: “Ontan sirin, unong a wala so kiambegya manggawa itayo na maabig ed saray amin, nagkalalo ed saray kaamong [tayo ed] pananisia.”—Galacia 6:10.
Kanian, tampol ya inorganisa na Tastasi nen Jehova so inkasikara pian ontulong. Say tagano, kawesen, tan miparan bengatla so kinolekta, imbiig, binalkot, insan impatulor ed lugar a naapektaay kalamidad. Saray ugugaw so angidonasyon ni ingen na saray ay-ayam! Asurprisan maong so sakey ya agin bii sanen anengneng toy Kingdom Hall a napnapnoy abasto. “Nikelkelawan ak, ya agko amta no makalek ak odino makanangis ak,” so inkuanto. “Saratan so eksakton nakaukolan mi.”
Insan, ag-inilaloan, yinmegyeg ed sakey a kabiangan na saman met a lugar a naapektaan na delap. Dakel a kaabungan so akusbo. Pian niiter so pankaukolan, aporma iray dakel nin komite a mangasikaso ed tulong. Say Regional Building Committee, a gendat a mangaasikaso ed panagpaalagey na saray pasilidad a pantitiponan na Tastasi nen Jehova, so inmayuda tan sinmuporta. Say resulta? Saray simplin kaabungan—a denisinyo tan impaalagey na agagi—so indonasyon ed saramay naandiay ayaman. Anggaman simpli irayan ayaman, dumarumay inkipaalagey na saraya ed saramay ayaman a pepelagan ya intarya na sekular iran sagpot ed itutulong, tan saratan so andiay datal tan bintana, ya agni anggan apintaan.
Arawi so biniahe na pigaran agagi pian ontulong. Diad loob na nantumbokan a duaran agew et pinasyar na tsirman na sakey a Regional Building Committee so lugar pian surien so aperdi—anggaman sikatoy aka-wheelchair. Makulikulin nantrabaho so sakey a bulag ya agin laki, ya inulor toray tablan gawaen a biga ed karpenteron manlagari ed kaliktan a sukat. Tinipon met na telek ya agin laki iray biga tan intulor to iratan ed pasen a pangusaran.
Nandinayewan na dakel a maniimaton so tulong ya intarya na saray agagi. Diad sakey a baley, akaparada so sakey a luganan na polis ed asingger na abung na agin bii a peles ya aapigeren. Nanusisa iray popolis. Intepet na sakey ed agi: “Siopa irayan mantratrabaho a nengneng day malikeliket, tan kaunongan kabaleg so imbayar ed saraya?” Impaliwawa na agi a sarayan amin et namboluntaryo. Insalaysay na sakey ed saray opisyal a sikatoy binulan a mangiiter na kakaplo diad relihyon to, ingen ta sikatoy agni anggan binisita na pastor to manlapula’d samay yegyeg! Diad tinmumbok ya agew et akaawat so agin bii na tawag ed telepono manlapud sakey ya opisyal na polis. Naobserbaan to met iray mantratrabaho. Inkuanto a nandinayewan ton maong so maligligsan awawey na saray mantratrabaho a sikato lawari so manboluntaryo met ya ontulong!
Tua, say sagpot na itutulong diad Chile so makapaliket ya eksperiensia parad saray namboluntaryo tan sakey ya ekselentin pantasi ed saray maniimaton.