Intokotok nen Kristo tan Saray Gungguna na Satan ed Sikatayo
SAY akagawaan na intokotok nen Jesus et diad Palandey na Olibo (Gawa 1:9, 12), asingger ed baley na Betania (Lucas 24:50), a satan a baley so walad dapit bukig ed Palandey na Olibo. Pigpigara labat so akatasi ed intokotok, saray matoor ya apostol to. (Gawa 1:2, 11-13) Insalaysay na rekord a “nipaatagey a sankanengneng da; et sikatoy inawat na sakey a lurem a sinaniban to ed kamataan da.” Tuloytuloy iran akatangay ed tawen anggad sikaray binilin na saray anghel, ya angikuan ed sikara: “Saya si Jesus, a naawat ed tawen a nanlapud sikayo, ontan so isabi to unong [a paraan, NW] na anengneng yo ya inyakar to ed tawen.”—Gawa 1:9-11.
Imanoen a say tinukoy na saray anghel et say “paraan” (Griego, troʹpos) aliwan say itsura (Griego, mor·pheʹ) na intaynan nen Jesus. Sanen sikatoy sinaniban na lurem, sikato lay agnanengneng na mata na too. Ipapanengneng na salaysay na Saray Gawa a say intokotok to et aliwan maparungtal odino maparayag, ya atebek lambengat na pigaran matoor a patumbok tan satan so para labat ed manunan kabiangan na intokotok. Lapud paraan na intokotok to et onkualipika iray apostol pian onkanan testigo ed satan ya inkagawa, ontan met ed inkioli nen Jesus. (Gawa 1:3) Kanian, sikatoy aglambengat ‘naandipat’ ed sikara, singa ed akadkaunan ginawa to ed duaran babangatan diad Emmaus, odino singa say anghel a nanpanengneng ed si Gideon so “inmalandipat ed pakanengneng to.” (Lucas 24:31; Uko-ukom 6:21, 22) Unong ed satan, say intokotok to so singa samay impatnag na anghel ed si Manoa tan say asawa to. Impaiparaan to’d sikara so sakey a bagat, tan “sanen say dalang nanpaatagey ya arap ed tawen a manlapu ed altar, a say anghel nen Jehova sinmegep dia ed dalang na altar: et si Manoa tan say asawa to sankanengneng da.”—Uko-ukom 13:20.
Lapud ipapanengneng na Gawa 1:3-9 a say intokotok nen Jesus so agawa 40 ya agew manlapud panaoy inkioli to, wala ni linmabas a panaon ed baetan na saray ebenton nirekord ed Lucas 24:1-49 singa inkagawa’d agew na inkioli nen Jesus tan say intokotok nen Jesus ya adeskribe diad bersikulo 51 na satan a kapitulo. Naimano met ya anggapo iray salitan “tan nipaatagey ed tawen,” a pinmatnag ed satan a bersikulo, diad arum a kadaanan a manuskrito tan inekal sirin ed pigaran modernon patalos (NE, AT). Balet, pinmatnag iratan diad Bodmer Papyrus (P75), say Alexandrine Manuscript, say Vatican Manuscript No. 1209, and arum niran kadaanan a manuskrito.
Epekto ed Saray Babangatan
Ompatnag ya anggad agew na intokotok nen Jesus et siansia nin sankanonot na saray babangatan iray kipapasen na mangaraldalin a panarian ya uleyan to, a singa natalosan ed imbaga ra diad Gawa 1:6. Diad kagapo na nanengneng ya intokotok to tan impangiyabuloy ed saray babangatan ton naimatonan so manunan kabiangan na satan, impabitar nen Jesus ed sikaran say Panarian to et mangatatawen tan satan, so duma manlapud si David ya “agsinmegep ed saray tawen,” lapud si Jesus so nipuesto nanlapulad saman a manpatuloy diad ‘nikawanan na Dios,’ a singa makmakpel a pinaneknekan nen Pedro ed agew na Pentecostes.—Gawa 2:32-36.
Say ontan met ya inkiwas so mangipanonot met ed sikara ed apalabas iran balikas nen Jesus a mangituturo ed satan a mangatatawen a posisyon tan ontulong ed saray babangatan ton natalosan iratan. Akigtot to so pigara diad impangikuan: “Anto sirin no nanengneng yo so Anak na too ya ontokotok ed kawalaan to nensaman?” (Juan 6:62); tan inkuanto ed saray Judio: “Sikayo nanlapu kayo ed leksab; siak nanlapu ak ed tagey.” (Juan 8:23) Diad labi na unor lan impitipon to ed saray apostol to, inkuanto’d sikaran sikatoy ‘onla ed Ama a mangiparaan na pasen parad sikara’ (Juan 14:2, 28); leleg a kaiba to ra ed unor lan labi na bilay to bilang too, sikatoy nanreport ed si Ama to ya ‘asumpal to lay kimey to ed dalin’ a nipabtang ed sikato insan nampikasi, a kuanto: “Igloria mo ak laktip ed inkasika ed samay gloria a walad sikata nen andi ni mundo,” inkuanto met, “onla ak ditan ed sika.” (Juan 17:4, 5, 11) Sanen inerel, angiter na miparan pakapatnagan ed arap na Sanhedrin. (Mateo 26:64) Kayari inkioli to inkuanto’d si Maria Magdalena: “Agmo ak diwiten; ta agak ni tinmokotok ed Ama: ingen onla ka ed saray agagik, tan kuan mo ed sikara, Siak ontokotok ak ed Amak tan Ama yo, tan Dios ko tan Dios yo.” (Juan 20:17) Ingen, anggaman ed sayan amin, mapatnag a say kabaliksan na sarayan balikas so nipaslep ed saray babangatan dia lambengat ed inkagaway intokotok. Saginonor, naikdan si Esteban na pasingawey nen Jesus a walad nikawanan na Dios (Gawa 7:55, 56), tan asagmakan nen Pablo so epekto na mangatatawen a gloria nen Jesus.—Gawa 9:3-5.
Say Inggapo na ‘Balo tan Mabilay a Dalan’
Leleg ya ontotokotok si Jesus ed ereng na too, a sankanengneng ni na saray babangatan to, anggapoy basiyan ya ipasen a sikatoy nantultuloy a silalaman kayarin sikatoy sinanibay lurem. Insalaysay nen Pedro a si Jesus so inatey unong ed laman balet pinaoli “ed espiritu.” (1 Pedro 3:18) Inyabawag nen Pablo so prinsipyon “say laman tan dala agda nayarian a tawiren so panarian na Dios.” (1 Corinto 15:50; ikompara met so balikas nen Jesus diad Juan 12:23, 24 ed 1 Corinto 15:35-45.) Inyaliling nen Pablo so intokotok nen Jesus ed arap na Dios diad katawenan ed say iloloob na atagey a saserdote diad Sankasantosan a dibisyon na tabernakulo ed Agew na Pananakbong tan indatak to a diad satan ya okasyon et awit lambengat na atagey a saserdote so dala (aliwan laman) na saray ibabagat. (Hebreos 9:7, 11, 12, 24-26) Insan inkompara nen Pablo so kurtina, ya angibiig ed unonan dibisyon manlapud Sankasantosan a dibisyon, ed laman nen Kristo. Say ilabas na atagey a saserdote ed Sankasantosan, ed simbolikon kiwawala na Dios, et agto awit so kurtina noagta onlabas ed satan a samben tan ed lagpas to, kanian walad beneg to itan. Diad ontan et inkuan nen Pablo a “katalkan ya onloob ed masantos a pasen lapu ed dala nen Jesus, dia ed sakey a dalan a balo tan mabilay, a sikatoy nilukasan to a nipaakar ed sikatayo, a labasan to so sakbong, salanti, say laman to.”—Hebreos 9:3, 24; 10:10, 19, 20; ikompara so Juan 6:51; Hebreos 6:19, 20.
Say intokotok nen Jesus ed tawen pian ipresenta toy mananondon a balor na bilay to ed si Jehova so angigapo ed ‘sakey a balo tan mabilay a dalan’ na iyaasingger ed Dios diad pikakasi. Inlukas met na satan so dalan ed mangatatawen a bilay a mitunosan ed mismon imbalikas nen Jesus ed epekto a, sakbay na satan et “anggapo so too a sinmegep ed tawen, noag say linmasor nanlapu ed tawen, salanti, Anak na too.” (Juan 3:13) Kanian, agnipasen si Enoc nisay si Elias ed onian dalan, a lalo met ed si David. (Genesis 5:24; 2 Arari 2:11; Gawa 2:34) Singa inkuan nen Pablo: “Saya ipatalos na espiritu santo, ya agni nipaliwawa so dalan ed masanton pasen, legan ni a manalalagey so inmunan tabernakulo.”—Hebreos 9:8.
No Akin a Makana
Say intokotok nen Jesus ed mangatatawen a pasen so makana ed pigaran rason odino gagala. Inkuan ton nakaukolan parad sikato ya ‘onla’ ta pian naibaki to so masanton espiritu na Dios bilang mananulong ed saray babangatan to. (Juan 16:7-14) Say inkikalbo na satan ya espiritu diad panamegley nen Jesus ed agew na Pentecostes ed saray babangatan et sakey a panangipatnag ed katuaan ya akasabi si Jesus ed arap na Dios tan impresenta toy balor na dondon bagat to ed Sikato. (Gawa 2:33, 38) Sayan inkipresenta ed balor na bilay to so nanggawa met ed intokotok a makana, ta agginawa itan ed dalin tan diad Sankasantosan ed templo diad Jerusalem, noagta dia labat ed “tawen a dili . . . ed arap na Dios.” (Hebreos 9:24) Kinaukolan met ed si Jesus so inkaturo tan inkigloria to bilang “sakey a baleg ya atagey a saserdote tayo, a linmabas ed saray katawenan.” (Hebreos 4:14; 5:1-6) Impaliwawa nen Pablo a “natan no sikato et wala ed tapew na dalin bilang aliwa ni komon a sikatoy saserdote,” noagta, lapud “imyurong ed nikawanan na trono na Ari ed saray katawenan,” natan et si Jesus so “akagamor na sakey a pankatangbayan a lapu ed sikato met so manamegley ed sakey a sipan a magmaong ya abangon ed tapew na saray magmaong a sipasipan.” (Hebreos 8:1-6) Lapud saya, saray Kristianon nisilong ed atawir a kasalanan so naligliwa diad impakaamtan sikaray ‘walaay apireng ed Ama, si Jesu-Kristo a matunong.”—1 Juan 2:1; Roma 8:34; Hebreos 7:25.
Diad kaunoran, say intokotok so nakaukolan parad administrasyon nen Jesus nipaakar ed Panarian a sikatoy nagmaliw a mananawir, a “wala . . . ed silong na pakauley to so saray angheles, tan pakauley tan pakayari.” (1 Pedro 3:22; Filipos 2:6-11; 1 Corinto 15:25; Hebreos 10:12, 13; ikompara so Daniel 7:14.) Lapud ‘impanalo ed mundo” (Juan 16:33), akibiang si Jesus diad impanumpal ed propesiya diad Salmo 68:18, a ‘tinmokotok ed tagey tan imbasbas iray arakep,’ say kabaliksan na impaliwawa nen Pablo diad Efeso 4:8-12.