“Aliknak so Mareen a Kaliberliber”

SAKEY a lakin mansasalitay-Aleman so linma’d kombension ya inorganisa na Tastasi nen Jehova ta pian “espiyaan” toray Tastasi. Akin? Say gagala to et pian “iwalwal iyan sekta tan isalba iray kakaaro to ed kabalang.” Kayari impakaatendi ed kombension, insulat toy onggendan ed kakaaro to:

“Sanen asingger ak la ed pankombensionan, pankelawan ko no saya kasi so suston pasen. Anggapoy onkitakitaw a too ed paway na istadyum, tan anggapoy basura odino saray lata na serbesa ed semento. Sanen manasingger ak, anengneng koy duaran lalaki ed lolooban na istadyum. Imbano tan pinaloob da ak.

“Ilaloan ko lan makarengel na ungol lapud nilibo so nayarin wadman, balet ta marmareen. ‘Bueno, ompan pigpigara labat so totoon nikaykayat ed intiron pasen,’ so abaloan ko.

“Sanen kaloob ko, tampol ya asagyat so imanok ed draman niyaakto ed plataporma. Naamtaan ko labat la ed saginonor a napno manaya so istadyum na nilibon atentibon dumerengel. Aliknak so mareen a kaliberliber. Say nadngel, anengneng, tan aliknak leleg na nakekeraan a parti ed kombension so angitilak na aralem ya impresyon ed siak.

“Lapud impilimog ed saray Tastasi, naimanok so maliket a kalupaan tan maaro iran balikas da. Bigbigla et agko la apokpokan a nikuan, “Saraya so peteg a totoo na Dios!’”

Imbes ya ‘isalba so kakaaro to a nababalang,’ kinerew na balolakin sikatoy iyaralan day Biblia. Anto kasi resulta? Natan, sikato lay Kristianon matatken. Sikato tan say pamilya to so aktibo ed sakey ed saray kongregasyon diad Zug, Switzerland.