Anto so Gagala na Bilay?—Panon Mon Naromog Itan?
Katuloyan na kapitulo 3
Asumpal a Propesiya
32-34. Antoy lugan na Biblia ya anggapo ed arum a libro?
32 Niarum ni, lugan na Biblia so tanda ya impuyan na Dios diad nikabkabiig a tuloy a paraan: Saya so libro na saray propesiyan walaan tan tuloytuloy a walaan na agnalingon kasumpalan.
33 Alimbawa, say inkaderal na kadaanan a Tiro, say inkaplag na Babilonia, say inkipaalagey lamet na Jerusalem, tan say imbangon tan inkaplag na arari na Medo-Persia tan Gresya so detalyadon tuloy a nipasakbay ed Biblia. Ontanlan inkasusto iray propesiya a sinali na arum a kritiko ya ibagan nisulat iratan kayari na inkagawa na saray ebento, balet sinmaew ira.—Isaias 13:17-19; 44:27–45:1; Ezequiel 26:3-6; Daniel 8:1-7, 20-22.
34 Saray impropesiya nen Jesus nipaakar ed kadederal na Jerusalem nen 70 K.P. et dugarugan asumpal. (Lucas 19:41-44; 21:20, 21) Tan saray propesiya ed “saray kaunoran ya agew” ya inter nen Jesus tan si apostol Pablo so detalyadon nasusumpal ed mismon panaon tayo.—2 Timoteo 3:1-5, 13; Mateo 24; Marcos 13; Lucas 21.
35. Akin a say propesiya na Biblia so nanlapu lambengat ed Manamalsa?
35 Anggapoy atooan a nonot, anggan panon lay inkautek to, a suston makapangipasakbay ed arapen iran ebento. Say kanonotan lambengat na sankamakapanyarian tan sankakabatan a Manamalsa na uniberso so makayari ed satan, a singa nabasa tayo diad 2 Pedro 1:20, 21: “Anggapo so impropeta a Sulat ya impatpatalos ya indumaduma. Ta anggapo so propesiya a nanlapu ed linawa na too, noag saray totoo nansalita ra a nanlapu ed Dios, diad impanenyeg na espiritu santo.”
Iiter toy Ebat
36. Antoy ibabaga ed sikatayo na Biblia?
36 Kanian, diad dakel a paraan, lugan na Biblia so ebidensia a satan so apuyanan a Salita na Supremo a Persona. Lapud satan, ibabaga to ed sikatayo no akin a wadia so totoo ed dalin, no akin a mapalalo so kairapan, no iner so laen tayo, tan no panon ya ondakep iray kipapasen. Ipaparungtal to ed sikatayo a walay sankatagyan a Dios ya amalsa ed totoo tan sayan dalin a walaay gagala tan say gagala to et nasumpal. (Isaias 14:24) Ipaparungtal met ed sikatayo na Biblia no anto so tuan relihyon tan no panon tayon naromog itan. Kanian, satan so alenleneg a lapuan na superyor a kakabatan a makapangibaga ed sikatayo na katuaan nipaakar ed amin ya importantin tepetepet ed bilay.—Salmo 146:3; Uliran 3:5; Isaias 2:2-4.
37. Antoy nepeg a nitepet nipaakar ed Kakristianoan?
37 Anggaman walay daakan a prueba ed autentisidad tan inkamatua na Biblia, amin kasi a mangibabagan angawat ed satan so manutumbok ed saray bangat to? Alimbawa, konsideraen paray nasyon a mangibabagan mangaagamil na Inkakristiano, salanti, say Kakristianoan. Walaan iray Biblia ed loob la na dakel a siglo. Balet kasin tudtuan isisindag na kaisipan tan kiwas da so superyor a kakabatan na Dios?