Siopay Natetel?

Dakel so manetetel ed Dios lapud saray problema ra. Isasalaysay na proverbioy Biblia: “Say dilin kabaglan na too so maneral ed bilay to, insan panem-eman toy Katawan.” (Uliran 19:3, The New English Bible) Ingen, say pangitetel ed Dios lapud inkapakaskasi na too et singa panetel ed managpabrikay luganan lapud ikakasmak na saray aksidentin makasengeg ed panmanehon abuek.

Inter la na Dios ed katooan so makanakanan panangigiya a walad Salita to, say Biblia. Diad panaral ed sayan madibinon librarya tan pambilay unong ed saray ganggan tan prinsipyon idadatak to, napaliisan tayoy dakel iran pakakulabotan ed bilay. Misunian, say ikiwas a sumlang ed panangigiyay Dios so makadesyang. Alimbawa, saramay mangaagamil na alabas a panangan, panagsigarilyo, panagbuanges, odino imoralidad so mabetbet a manasagmak na grabe iran pansumpalan ed bunigas. (Lucas 21:34; 1 Corinto 6:18; 2 Corinto 7:1) Insulat nen Kristianon apostol Pablo: “Antokaman ya itanem na too satan met so anien to; ta say mantanem na nipaakar ed laman ton dili, dia ed laman manani na kabulok; balet say mantanem na nipaakar ed espiritu, dia ed espiritu manani na bilay ya andi angga.”​—Galacia 6:7, 8.

Agaylan magmaong so pambilay unong ed saray ganggan tan prinsipyo na Dios! No ontay gawaen tayo, naeksperiensia tayoy inkapeteg na sipan na Dios a sinalita to panamegley nen propeta Isaias: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.”​—Isaias 48:17, 18.