Say Biblia—Kasin Salita na Dios Odino Too?
Katuloyan na Kapitulo 11
Siopa so Bini na Bii?
12, 13. (a) Panon nen Jehova ya imparungtal ed si Abraham a say bini na bii so ompatnag ed saray kapolian to? (b) Siopay anawir na sipan nipaakar ed Bini?
12 Sirin, siopa so ‘bini [odino ilalak] na bii’? Sakey iya ed saray sankaimportantian a tepet a nitepet, lapud say bini na bii so manmekmek ed ulo nen Satanas ed kaunoran tan mangekal ed mauges iran epekto na orihinal a rebelyon. Sanen koma-20 siglo K.K.P., imparungtal na Dios so manunan pakapatnagan nipaakar ed saya ed kinen matoor a lakin Abraham. Lapud baleg a pananisia nen Abraham, nantutumbokan ya insipan na Dios ed sikato so nipaakar ed ilalak a nianak ed sikato. Sakey ed saraya so angipabitar a ‘say bini na bii’ a ‘manugat ed ulo na uleg’ so ompatnag ed limog na saray ilalak nen Abraham. Inkuan na Dios ed sikato: “Say ilalak mo [“binim,” NW] kayarianen to naani so pulongpinto na kakabusol to. Tan dia ed ilalak mo so pakapikapalaranan na saray amin a nasyon dia, lapu ed tinulok mo so bosis ko.”—Genesis 22:17, 18.
13 Diad inlabas na saray taon, say sipan nen Jehova ed si Abraham so naulit ed ilalak ton laki a si Isaac tan ed apo ton Jacob. (Genesis 26:3-5; 28:10-15) Diad kaunoran, say kapolian nen Jacob so nagmaliw a 12 tribu, tan sakey ed saraman a tribu, si Juda, so akaawat na espisyal a sipan: “Say setro ag-ontainan ed Juda naani, nisay tayukor na mananguley agnaekal ed leet na saray salisali to, angga ed isabi nen Siloh; tan dia ed sikato wala naani katutulok na saray katooan.” (Genesis 49:10) Mabitar, say Bini so ompatnag ed tribu na Juda.
14. Anton nasyon so naorganisa pian akaparaan ed isabi na Bini?
14 Diad pansamposampot na koma-16 siglo K.K.P., say 12 tribu na Israel so naorganisa ed sakey a nasyon bilang espisyal a totoo na Dios. Diad sayan gagala, akigawaan so Dios na masanton sipanan ed sikara tan sikaray inikdan to na sakey a kodigo na ganggan. Say manunan rason ed saya et say pangiparaan ed baley parad isabi na Bini. (Exodo 19:5, 6; Galacia 3:24) Manlapulad saman, say gula nen Satanas ed Bini na bii so anengneng ed inkaruksa na nasyones ed pinilin totoo na Dios.
15. Anton kaunoran a pakapatnagan so niiter ed no siopan pamilya ed limog na kapolian nen Abraham so mamawala na Bini?
15 Nen koma-11 a siglo K.K.P., niiter so kaunoran a pakapatnagan no siopan pamilya so mamawala ed Bini. Diad saman, akisalita so Dios ed komaduan ari na Israel, si David, tan angisipan a say Bini so manlapud linya to tan say trono na sayan Sakey so “niletneg lawas.” (2 Samuel 7:11-16) Nanlapulad saman, say Bini so suston natukoy a bilang anak nen David.—Mateo 22:42-45.
16, 17. Panon so impaneskribe nen Isaias ed saray bendision ya itarok na Bini?
16 Diad tinmumbok iran taon, pinatalindeg na Dios iray propeta pian mangiter na malaem ya apuyanan ya impormasyon nipaakar ed onsabin Bini. Alimbawa, diad komawalon siglo K.K.P., insulat nen Isaias: “Dia ed sikatayo nianak so sakey ya ugaw, dia ed sikatayo sakey ya ugaw a laki so niiter; et say uley wala naani ed tapew na abala to. Et say ngaran to natawag naani a Makapakelaw, Mananimbawa, Makapanyari a Dios, Andi-anggaan ya Ama, Prinsipe na Kareenan. Ed ibaleg na pananguley to tan kareenan anggapo naani anggaan, ed trono nen David, tan ed panarian to.”—Isaias 9:6, 7.
17 Onia so kaaruman nin impropesiya nen Isaias nipaakar ed sayan Bini: “Dia ed kaptekan ukomen to so duka, tan mangigeter a situtunong nipaakar ed saray mauyamo ed dalin. . . . Et say lobo miayam naani ed kordero, tan say leopardo miakdol naani ed kanding, et say kilaw na baka tan kilaw na leon tan saray pinataba mantitipon ira . . . Ag-ira naani mamaunong odino mamagbag dia ed amin a masanton palandey ko; ta say dalin napano naani ed pikakabat ed Jehova, singa saray danum sakbongan da so dayat.” (Isaias 11:4-9) Agaylan mayaman iran bendision so itarok na sayan bini!
18. Anton kaaruman ya impormasyon so inkurit nen Daniel nipaakar ed Bini?
18 Sanen komanem a siglo sakbay na Komon a Panaon tayo, inkurit nen Daniel so kaaruman a propesiya nipaakar ed Bini. Impasakbay to so panaon sano say sakey a singa anak na too so ompatnag ed tawen tan nibagan “sikato so naikdan na panuley, tan gayaga tan sakey a panarian, ya amin so saray baley, saray nasyon, tan pansasalita manlingkor ira komon ed sikato.” (Daniel 7:13, 14) Kanian say onsabin Bini so manawir na mangatatawen a panarian, tan say maarin pakauley to so onlaknab ed intiron dalin.
Asolbar so Pakakakewkewan
19. Unong ed imparungtal na anghel, anton betang so gawaen nen Maria ed isabi na Bini?
19 Diad kaunoran niparungtal so pakabidbiran ed Bini diad kasakbayan na Komon a Panaon tayo. Diad taon 2 K.K.P., sakey ya anghel so inmapireng ed sakey a Judion bii a manngaran na Maria, a kapolian nen David. Imbaga na anghel a sikato so mangiyanak ed sakey a nikadkaduman tuloy ya ugaw tan inkuanto: “Sikato naani baleg, et ningaran ya Anak na Sankatagyan; tan iter na Dios a Katawan ed sikato so trono nen David ya ama to, et manari ed abung nen Jacob lawas, et say panarian to andi angga to.” (Lucas 1:32, 33) Kanian diad kaunoran et say abayag lan panaalagar ed “bini” so mansamposampot la.
20. Siopa so insipan a Bini, tan anton mensahe so impulong to ed Israel?
20 Diad taon 29 K.P. (say petsan abayag lan tinukoy nen Daniel), si Jesus so abautismoan. Linmeksab ed sikato so masanton espiritu, tan sikato so binidbir na Dios bilang Anak to. (Daniel 9:24-27; Mateo 3:16, 17) Diad talora tan kapalduan taon kayari to, si Jesus so nantasi ed saray Judios, ya angiyabawag: “Asingger la so panariay tawen.” (Mateo 4:17) Legan na saman a panaon, sinumpal to so dakel iran propesiya ed Hebreon Kasulatan ya anggapo so antokaman a panduaruwa a sikato so peteg ya insipan a Bini.
21. Anto so atalosan na saray inmunan Kristianos nipaakar ed pakabidbiran ed Bini?
21 Saya so atalosan a maong na saray inmunan Kristianos. Impaliwawa nen Pablo ed saray Kristianos ed Galacia: “Agawa lanti so saray sipan ed Abraham tan say ilalak to. Agto kuan: ‘Tan saray ilalak to,’ singa nipaakar ed dakerakel, noag ingen ed saksakey: ‘Tan say ilalak mo,’ a sikato si Kristo.” (Galacia 3:16) Si Jesus so magmaliw a “Prinsipe na Kareenan” ya impasakbay nen Isaias. Diad kaunoran kayari isabi to ed Panarian to, say inkahustisya tan inkatunong so niletneg ed sankamundoan.
Siopa Sirin, so Bii?
22. Siopa so bii ya atukoy ed propesiya nen Jehova ed Eden?
22 No si Jesus so Bini, siopa so bii ya atukoy diman ed Eden? Lapud say pakayari ed benegan na uleg et sakey ya espiritun palsa, agtayo nepeg a pankelawan a say bii et espiritu met tan aliwan too. Sinalita nen apostol Pablo so nipaakar ed mangatatawen a “bii” sanen inkuanto: “Balet saman so Jerusalem a wala ed tagey sikatoy bulos, a sikatoy ina mi a lapag.” (Galacia 4:26) Ipapanengneng na arum a kasulatan a sayan “Jerusalem a wala ed tagey” so wala la ed nilibulibon taon. Sikato so mangatatawen ya organisasyon nen Jehova a tugyopen na saray espiritun palsa, a ditan so nanlapuan nen Jesus pian sumpalen so betang na ‘bini na bii.’ Mogmon sayan nengneng na espiritual a “bii” so makapansungdo ed nilibulibon taon a gulaan ed “daan ya uleg.”—Apocalipsis 12:9; Isaias 54:1, 13; 62:2-6.
23. Akin ya ontanlan makatantanda so progresibon panangiparungtal ed kabaliksan na Edenikon propesiya nen Jehova?
23 Sayan antikey ya impanrepaso ed aligwas na saman a kadaanan a propesiya ed Genesis 3:15 so mabiskeg a pantasi ed engranden impantunosan na Biblia. Peteg a makatantandan say propesiya so natalosan lambengat sano pantitiponen tayoray ebento tan balbalikas manlapud koma-20, say koma-11, say koma-8, tan say koma-6 iran siglo K.K.P. ed saray balbalikas tan ebento manlapud inmunan siglo na Komon a Panaon tayo. Saya so ag-agawan nibanbana. Peteg a wala so mangigigiyan lima ed benegan na sarayan amin.—Isaias 46:9, 10.
Say Kabaliksan to ed Sikatayo
24. Anto so kabaliksan ed sikatayo na pakabidbiran ed Bini?
24 Anto so kabaliksan na sayan amin ed sikatayo? Bueno, si Jesus so manunan ‘bini na bii.’ Impasakbay na satan a kadaanan a propesiya ed Genesis 3:15 a say mukor to so ‘sugaten’ na Uleg, tan saya so agawa sanen si Jesus so inatey ed panamairapan a kiew. Say sakey a sugat so aliwan magnayon. Kanian, say singa impanalo na Uleg so tampol a nagmaliw ya inkatalo sanen si Jesus so apaoli. (Unong ya anengneng tayo ed Kapitulo 6, wala so sigpot ya ebidensian saya so peteg ya agawa.) Say impatey nen Jesus so nagmaliw a letnegan parad kilalaban na maptek-impanpuson katooan, kanian say Bini so ginmapon magmaliw a bendision, unong ya insipan na Dios ed si Abraham. Ingen komusta so propesiya a si Jesus so manuley ed amin a mangaraldalin ya uuleyan to diad mangatatawen a panarian?
25, 26. Anton salisalan so alanor diad gulaan na ‘bini na bii’ tan say Uleg, unong ya adeskribe ed Apocalipsis?
25 Diad malinew a mapropetikon pasingawey a nikurit ed Apocalipsis kapitulo 12, say gapo na sayan Panarian so nilitrato ed inkianak na sakey ya ugaw a laki ed tawen. Diad sayan Panarian, say insipan a Bini so mamemben na pakayari ed silong na titulon Miguel, a say kabaliksan to et “Siopa So Mipara’d Dios?” Ipapanengneng ton anggapo so siopaman a manepeg a manuppiat ed inkasoberano nen Jehova, sanen imbasileng to ed andi-anggaan so “daan ya uleg” manlapud tawen. Nabasa tayo: “Tan nibantak dia ed dalin so baleg a dragon, say daan ya uleg, a manngaran na Diablo tan Satanas, a sikato so mantila ed lapag na sankamundoan; [sikato so] nibantak dia ed dalin.”—Apocalipsis 12:7-9.
26 Say pansumpalan et inawa parad katawenan balet gonigon ed dalin. “Natan sinmabi la so kilalaban tan say pakayari tan say nanarian na Dios tayo, tan say pakauley nen Kristo to,” so mananalon eyag. Niarum ni, nabasa tayo: “Kanian manliket kayo, O katawenan, tan sikayon manaayam ed sikara! Kasi lara so dalin tan say dayat, ta say Diablo inmakseb ed sikayo, a wala ed baleg a sanok to, ya amta to a daiset la so panaon to.”—Apocalipsis 12:10, 12.
27. Kapigan asumpal so propesiya nipaakar ed inkibasileng nen Satanas manlapud katawenan? Panon so pakaamta tayo?
27 Kasin nibaga tayo no kapigan so kasumpal na sayan propesiya? On, sayan mismo so intepet na saray babangatan ed si Jesus nipaakar ed ‘tanda na kiwawala to tan ed anggaan na sistema na bengabengatla’—unong ya asingbat tayo la ed Kapitulo 10. (Mateo 24:3) Unong ed anengneng tayo, mabitar so ebidensian say kiwawala nen Jesus ed pakayari diad mangatatawen a Panarian so ginmapo nen 1914. Nanlapulad saman, naeksperiensia tayon peteg so ‘inkakaskasi na dalin’!
28, 29. Anton baleg iran pananguman ed mangaraldalin ya eksena so siansian walad arapen, tan panon so pakaamta tayon sikaray magano lan nagawa?
28 Ingen imanoen: Inyabawag na saman a kelyaw a si Satanas so walaan lambengat na ‘daiset a panaon.’ Kanian satan ya orihinal a propesiya ed Genesis 3:15 so ontutundas ed peteg a pantok to. Say uleg, say bini to, say bii, tan say bini to so amin et nipabidbir. Say Bini so ‘sinugatan ed mukor,’ ingen ta sikatoy inmabig. Agmanbayag, onggapo so panmekmek ed si Satanas (tan ed bini to) diad silong na manuuley-lan-Ari na Dios, si Kristo Jesus.
29 Isakup na saya so angkabaleg iran pananguman ed eksena na mundo. Kaiba nen Satanas, saramay mamaneknek ed inkasikaran bini to so naekal. Unong ya impropesiya na salmista: “Wala ni so daiset, et say bagel onandi; on, imanom so pasen to, et onandi.” (Salmo 37:10) Agaylan sigpot a pananguman itan! Insan, saray kaaruman a balikas na salmista so nasumpal: “Ingen ta saray mauyamo tawiren da naani so dalin, tan manliket ira a dili ed inkadaakan na kareenan.”—Salmo 37:11.
30. Akin a saray manduaruwa ed inkapuyanan na Biblia tan anggan diad kiwawala na Dios so diad tua et sikaray aliwan realistiko?
30 Diad onian paraan, say “Prinsipe na Kareenan” so mangitarok la’d satan na kareenan ed katooan. Saya so sipan na Biblia, unong ya anengneng tayo ed Isaias 9:6, 7. Diad sayan panaon na panduaruwa, dakel so mangikuan ya aliwan peteg so ontan a sipan. Ingen anton kasalat so niyopresi na too? Anggapo! Diad biek a dapag, sayan sipan so malinew ya ibabaga na Biblia, tan say Biblia so ag-onsaew a Salita na Dios. Diad tua, saray manduaruwa so aliwan realistiko. (Isaias 55:8, 11) Ibabaliwala ra so Dios, ya angipuyan ed Biblia tan say sankapetegan ed amin.