Siopa si Jehova?
ONIAY inkuan nen Jehova ed sakey ed saray matoor a managdayew to: “Say too agto ak naani nanengneng et manbilay.” (Exodo 33:20) “Say Dios sikatoy sakey ya espiritu,” tan sikatoy agnanengneng na totoo ed literal a kamataan da. (Juan 4:24) No panon a say direktan inengneng ed banwa no kapegpegleyay agew et makaderal ed saray mata tayo, makadesyang met ed sikatayo so inengneng ed mabisbiskeg a Lapuan na enerhiya ya amalsa ed aliwa lambengat a masnag a banwa tayo noagta ontan met ed agnabilang niran banwa ed uniberso.
Makapaliket, agti la kaukolan a nanengneng so Dios pian sikatoy nakabatan tayo. Ipapakabat na Biblia imay Sakey ya angitadia ed satan a makapakelaw a parsela, say dalin, a parad sikatayo tan ipaparungtal toy personalidad to. Kanian makanakana so pangusisa ed Biblia pian naamtaan so nipaakar ed Ama ya angiter ed sikatayoy bilay tan angisuplay na makapalikliket ya ayaman a pakapanggayagaan ed satan a bilay.
Kabaliksan na Ngaran To
Amin a ngaran et walaay kabaliksan, anggaman dakel so agmikabat ed saratan natan. Alimbawa, say maslak ya Ingles a ngaran a David so nanlapud Hebreon salita a mankabaliksay “Inad-aro.” Say ngaran na Manamalsa a, Jehova, so walaay kabaliksan met. Anto itan? Diad orihinal a lenguahe na Biblia a Hebreo, say madibinon ngaran so nisulat ed apatiran letra, YHWH, tan pinmatnag a ngalngalin 7,000 danay ed Hebreon kabiangan na Biblia. Say madibinon ngaran so atalosan a mankabaliksay “Pagmaliwen To.” Ipapabitar na satan a si Jehova et sikakabat ton pagmamaliwen so inkasikato ed antokaman a kaukolan ton pagmaliwan ompian nasumpal iray gagala to. Sikato so Manamalsa, Ukom, Manangilaban, Mananustini na Bilay, tan sirin et nasumpal toray sipan to. Niarum ni, diad Hebreo say ngaran a Jehova so walad porman berbo a mankabaliksay aksion a nasusumpal la. On, siansian pagmamaliwen nen Jehova so inkasikato a mananumpal ed saray gagala to. Sikato so mabilay a Dios!
Matalonggaring a Kualidades nen Jehova
Dedeskribien na Biblia so Manamalsa bilang “Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibo, mamerdona na inkauges, tan impakasumpa, tan kasalanan.” (Exodo 34:6, 7) Say balikas a “maaro ya abig na linawa” so mangipapatalos ed makabkabaliksan a Hebreon salita. Mankabaliksan itan na abig na linawa a simamaaron mangiyaasingger ed inkasikato diad sakey a bengatla anggad nasumpal so gagala to parad satan a bengatla. Naipatalos met itan a “matoor ya aro.” Simamaaron iyaasingger na abig na linawa nen Jehova so inkasikato diad saray pinalsa to tan susumpalen toy makapakelaw a gagala to. Agmo ta pablien so ontan a panangaro na Sakey ya angiter ed sikay bilay?
Si Jehova so mapalna ya onsanok tan maples a mamerdona ed saray kalilingoan tayo. Makapaligsay-puso so onapit ed ontan a persona. Ingen, agto labay ya ibagan aabuloyan toy gawan-mauges. Inyabawag to: “Siak, si Jehova, aroen ko so inkatunong, gulaen ko so pantakew pati inkauges.” (Isaias 61:8) Bilang Dios na inkahustisya, agto magnayon ya abuloyan iray malangas a managkasalanan a mansiasiansia’d karelmengan da. Sirin, napaseguroan itayo a diad dugan panaon to, ipetek nen Jehova iray ag-inkahustisya ed mundo. Agto ibaliwala iray napapairap.
Agmainomay a mantinien so naspot a pakasimbang na aro tan inkahustisya. No sakey kan ateng, naiirapan ka ta’n mandeside no kapigan, no panon, tan diad anton kalaknab so pangorihem ed ananak mo sano bangar ira? Ka ukolan so baleg a kakabatan pian nabalansi so inkahustisya tekep na maaron panangabagey. Satan a kualidad so daakan ya ipapatnag nen Jehova sano sikatoy midedeneng ed totoo. (Roma 11:33-36) On, nanengneng so kakabatan na Manamalsa ed amin a pasen, alimbawa et saray pankelawan ed palsa a walad liberliber tayo.—Salmo 104:24; Uliran 3:19.
Balet, agmagenap so pakawalaay kakabatan. Pian nasumpal so linawa to, say Manamalsa so nepeg met a walaay pakayari, tan ipaparungtal na Biblia a sikatoy mabisbiskeg: “Itangay yo so saray mata yo ed tagey, tan nengnengen yo no siopa so amalsa ed saraya, a sikato alaen to so saray ehersito ra ed bilang; sikato tawagen tora ya amin ed ngaran; lapu ed kabaleg a tuloy na biskeg to ed pakapanyari, tan lapu ed mabiskeg ed pakayari, anggapo so kulang anggan sakey.” (Isaias 40:26) Tekep na ‘baleg a tuloy a biskeg ed pakapanyari,’ nagawaan nen Jehova iray bengatla. Agta nasagyat ka ed sikato lapud ontan a kualidad?
Dios na Amin a Nasyones
‘Balet agta si Jehova so Dios a walad “Daan a Sipan,” say Dios na kadaanan ya Israel?’ so nayarin panumamengan mo. Tua ya imparungtal nen Jehova so inkasikato ed saray Israelita. Siansia, panamegley na autoridad to’d impamalsa ed inmunan sankaparis a too, si Jehova so Dios a “dia ed sikato so pangalaan na ngaran na amin a sankaamongan . . . dia ed dalin.” (Efeso 3:15) No panisiaan mon manepeg a respetoen iray inmuunan atateng mo, agta matukoy so pangigalang ed samay Sakey ya angiter na bilay ed inmunan too, say inmunan ateng tayon amin, a lamut na amin a kailalakan a wala ed dalin natan?
Say Manamalsa na katooan et aliwan makisir so panag-isip to. Tua, ya aminsan a panaon et sikatoy walaay nikaduman siglaotan ed nasyon na Israel. Balet anggad saman a panaon et sinayakop toy amin ya ontawag ed ngaran to. Inkuan na sakey a makabat ya ari na Israel ed pikakasi to’d si Jehova: “Nipaakar ed sankaili, ya aliwa a taga baley mo ya Israel, sano ompaway a manlapu ed arawi a dalin lapu ed kakanaan na ngaran mo, . . . ondengel ka ed tawen . . . , tan gawaen mo komon so unong na amin a say sankaili ibawag to ed sika, pian saray amin a baley ed dalin naamtaan da so ngaran mo.” (1 Arari 8:41-43) Anggad sayan agew, say totoo na amin a nasyones so makapikabat ed si Jehova tan nawalaay makabaliksan a siglaotan ed sikato. Balet panon itan a mangapekta’d sika?
Saray Gungguna na Pakapikabat ed Jehova
No pawilen so ilustrasyon ed akadkaunan artikulo, no akaawat kay balibali so inkabalkot ton parsela, natural lambengat a kabaten mo no parad anto so regalo. Panon itan ya usaren tan laniran? Mipadpara, labay tayon nakabatan no anto so walad kanonotan na Dios sanen intadia toy dalin parad sikatayo. Inkuan na Biblia a “pinalsa to ya aliwa a kibalatar,” balet “tinibukel to ta pian sikato so panayaman,” salanti, na totoo.—Isaias 45:18.
Balet, agla mamantinien na maslak a totoo so regalo na Manamalsa. Dederalen da la so dalin, a kainglit a tuloy nen Jehova. Ingen, mitunosan ed kabaliksay ngaran to, determinado si Jehova a manumpal ed orihinal a gagala to parad too tan say dalin. (Salmo 115:16; Apocalipsis 11:18) Apigeren toy dalin tan ipatawir to itan ed saramay mabulos a manbilay bilang matulok ya ananak to.—Mateo 5:5.
Dedeskribien na sampot a libroy Biblia no antoy nengneng na bengabengatla sano nagawa itan: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, . . . Tan punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot: Ta saray ona a bengatla sikara so linmabas la.” (Apocalipsis 21:3, 4) Anggapo la naani so onnangis ed sinagem odino ermen lapud impatey na inad-aro. Anggapo lay onkelyaw a patulongan lapud inkadesperado odino panasagmak na ot-ot na makapatey a sakisakit. Anggan say ‘patey naekal naani.’ (1 Corinto 15:26; Isaias 25:8; 33:24) Saya so manideskribe ed klase na bilay ya orihinal a kaliktan nen Jehova a panggayagaan tayo sanen pinalsa toy inmunan atateng tayo.
On, napasimaran mo lay ontan iran singa paraison kipapasen natan ed limog na saray managdayew nen Jehova. Inkuanto’d sikara: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:17) Si Jehova so mapangasin Ama a mangibabangat ed sikatayo, saray ananak to, ed sankaabigan a dalan a pambilay. Saray panangigiya to ed saray totoo so mangitatarya, na aliwan alablabas a panameget, noagta maaron pananalimbeng. Say panumbok ed saratan so manresulta ed tuan kawayangan tan liket, a singa walan nisulat: “Natan say Katawan sikato so Espiritu; tan no iner so kawalaan na espiritu na Katawan, diman so kawalaan na kawayangan.” (2 Corinto 3:17) Diad panumbok ed saray panangigiyan nidatak ed Biblia, saramay mangaawat ed pananguley to so makakaeksperiensia lay kareenan na nonot ya onsabi agew et onkayat itan ed intiron mundo na katooan.—Filipos 4:7.
Agaylan abig ya Ama si Jehova! Kasin mabulos kan nagkalalon naaralan so nipaakar ed samay Sakey a walad benegan na amin a pankelawan ed palsa? Parad saramay ontan, anggan natan et mabmabli iray gungguna. Tan diad arapen et magnayon iray bendision.
[Litrato ed pahina 5]
Say madibinon ngaran a nisulat ed apatiran Hebreon letra so nanengneng diad saray bakor na dakel a daan a simbaan