Totoon “Walaan na Liknaan a Singa Sikatayo”

SIKATOY sakey ya ari tan sakey a propeta balet ta sakey met a maaron ama. Sakey ed saray ilalak to so binmaleg a bagel tan matangsit. Diad impanggagaem a samsamey trono, inggapo na sayan anak so guerra sibil, diad getman pateyey ama to. Balet diad bakal ya agawa, say ilalak so inatey. Sanen naamtaay aman inatey so ilalak to, sikatoy linman bukor ed silir a walad tagey tan nannangis: “O ana’ko Absalom, ana’ko, ana’ko Absalom! Inatey ak komon lapu ed sika, O Absalom, ana’ko, ana’ko!” (2 Samuel 18:33) Sayan ama et si Arin David. Singa say arum a propeta nen Jehova, sikatoy “sakey a toon walaan na liknaan a singa sikatayo.”​—Santiago 5:17, NW.

Diad panaoy Biblia say lalaki tan bibiin nansalitan parad si Jehova et nanlapud amin a nengneng na panagbilay tan ordinaryon totoo. Singa sikatayo, walaan iray problema tan manasagmak lapud ag-inkayadyari. Siopa so pigara’d sarayan propeta, tan panon a saray liknaan da et singa sikatayo?

Manlapud Sobran-Panagmatalek nen Moises ya Angga ed Inkauyamo To

Sakey a bantog a propeta ed sakbay-Kristianon panaon et si Moises. Balet, anggano 40 taon to la, sikatoy agni akaparaan a manserbi a pinagkasangiyan nen Jehova. Akin? Legan a lalamesen nen Faraon na Ehipto iray agagi to, binmaleg si Moises ed sankaabungan nen Faraon tan “makapanyari ed saray salita tan gawa to.” Ibabaga ed sikatayo na rekord: “Inisip to a natalosan na saray agagi to a say Dios iter to ed sikara so kilalaban ed panamegley na lima to.” Sobran-matalek, sikatoy masebeg ya angidepensa’d Hebreon aripen, a pinatey toy sakey ya Ehipsio.​—Gawa 7:22-25; Exodo 2:11-14.

Apilitan natan si Moises ya ombatik, tan nausar toy tinmumbok ya apatiran dekada bilang pastol ed arawin Midian. (Exodo 2:15) Diad pansamposampot na satan a panaon, si Moises, a wala la’d 80 taon to, so ginanggan nen Jehova a manpropeta. Balet ta aliwa lan sobran-matalek si Moises. Liknaen ton agkualipikado kanian sinuppiat toy pangigagangganan ed sikato nen Jehova a manpropeta, ya ibabalikas iray singa, “Siopa ak ta kasi ya onla ed kinen Faraon?” tan, “Anto so iyebat ko?” (Exodo 3:11, 13) Tekep na maaron panamaseguro tan pananulong nen Jehova, sinumpal nen Moises so asainmin to tekep na intalonan tuloy.

Singa si Moises, kasin aabuloyan moy sobran-panagmatalek a mangitonton ed sikan manggawa odino mangibagay bengatlan agmakabat? No ontan, awat moy kaaruman a panangipasal tekep na inkamaapabeba. Odino liknaen mo ta’n agka kualipikadon manumpal ed pigaran Kristianon responsabilidad? Imbes ya onsener, awat moy pananulong ya iyoopresi nen Jehova tan say organisasyon to. Samay tinmulong ed si Moises so makatulong met ed sika.

Walaay Liknaan si Elias a Singa Sikatayo ed Panaoy Pananisiplina

“Si Elias so sakey a toon walaay liknaan a singa sikatayo, tan ingen diad pikakasi et impikasi ton ag-onuran; tan ag-inmuran ed dalin ed loob na taloy taon tan anem bulan.” (Santiago 5:17, NW) Mitukoyan so pikakasi nen Elias ed linawa nen Jehova a manisiplina’d nasyon a binmeneg ed Sikato. Ingen, amta nen Elias a say kelang ya ipipikasi to et panirapay too. Maslak a kimey ed Israel et panagdalus; say linaew tan uran so panbibilayay totoo. Itarok na tuloytuloy a kelang so pirmin gonigon. Namagaan iray tanaman; naperdi iray tanem. Ompatey iray kokomponien ya ayayep a para-kimey tan parad tagano, tan pigaran pamilya so nasesgay eras. Siopa so mas manirap? Say kabanyakan a totoo. Diad saginonor et imbaga na balo ed si Elias a sansankaakop la kalamor so akeraan ya arina tan daiset a larak. Iilaloan to lan sikaran san-ina so agmanbayag et ompatey ed eras. (1 Arari 17:12) Parad si Elias a mangipikasi na ontan et kaukolan a sikatoy nawalaay malet a pananisia a talimaen nen Jehova iray ariripen To​—mayaman odino pobri​—ya ag-angikaindan ed tuan panagdayew. Singa ipapanengneng na rekord, ag-adismaya si Elias.​—1 Arari 17:13-16; 18:3-5.

Taloy taon ed saginonor, sanen impanengneng nen Jehova a magano to lan pauranen, say masimoon a pilalek nen Elias a mangangga lay kelang so nanengneng ed aminpiga, pirmin pikakasi to legan ya ‘ondadakmomo ed dalin, tan iiyan to so lupa to ed leet na saray pueg to.’ (1 Arari 18:42) Aminpigapiga, pinaseseg toy katulongan to: “Ontatdang ka natan, onnengneng ka ed dapit dayat” parad pakapatnagan a nadngel nen Jehova iray pikakasi to. (1 Arari 18:43) Alay liket to sanen diad kaunoran, diad ebat ed saray pikakasi to et “say tawen angiter na uran, et say dalin angiter na bunga to”!​—Santiago 5:18.

No sakey kan ateng odino matatken ed kongregasyon, nayarin pibarangkaan moy ambelat iran liknaan sano mangokorehi. Balet, kaukolan a balansien iratan ya atooan ya emosyon tekep na kombiksyon a makana so disiplina a panapanaon tan sano gawaen itan tekep na aro, satan so “mangiter na bunga a mareen na katunongan.” (Hebreos 12:11) Saray resultay itulok ed saray ganggan nen Jehova so lawas karoyroyo. Singa si Elias, ipikasi tayo manlapud puso a nasumpal iratan.

Nampakpel si Jeremias Anggaman ed Pakadismayaan

Diad amin na saray managsulat na Biblia, si Jeremias anganko so sankarakelay nisulat nipaakar ed personal a liknaan to. Bilang balolaki, sikatoy masuyat a mangawat ed ingganggan ed sikato. (Jeremias 1:6) Anggaman kuan et ginawa to itan tekep na pirmin panagpakpel ya inyabawag so salitay Dios, pian labanay maruksan isusumpa na kapara ton Israelitas​—manlapud ari anggad kabanyakan. No maminsan et satan ya isusumpa so mamasanok tan mamalua’d sikato. (Jeremias 9:3; 18:20-23; 20:7-18) Diad nanduruman agawa sikatoy inambon, pinekpek, impasngat ed panangipokokan, nipangaw, binantaay patey, tan tinaynan ya ompatey ed pitek diad dalem na bobon. No maminsan et anggan say mensahe nen Jehova so makapasakit, a singa niyilustra’d saray salita to: “Say irap ko, say irap ko! Nairapan ak a tuloy ed pusok.”​—Jeremias 4:19.

Siansia, inaro toy salita nen Jehova, a mangibabagan: “Saray salitam sikara nensaman ed siak so sakey a liket tan gayaga na pusok.” (Jeremias 15:16) Ontan met, say inkasaew so amakelyaw ed sikato ed si Jehova: “Sika naani ed siak so singa sakey a kulos a mamalingo, singa saray danum ya onkulang,” a singa say payas a maganon onekat. (Jeremias 15:18) Anggaman kuan, atalosan nen Jehova iray mansusumlangan a liknaan to tan sikatoy nansiansian sinuportaan to ompian nasumpal toy angigangganan ed sikato.​—Jeremias 15:20; nengnengen met so 20:7-9.

Singa si Jeremias, kasin nipapaarap ka’d pakasaew odino isusumpa diad panusumpal moy ministeryom? Manilalo ed si Jehova. Mantultuloy a paiderihe’d sikato, tan tumangan met nen Jehova iray sagpot mo.

Si Jesus so Walaan na Liknaan a Singa Sikatayo

Say sankabalgan a propeta ed amin a panaon et say dilin Anak na Dios, si Jesu-Kristo. Anggaman sikatoy ayadyarin too, agto pinokpokay emosyon to. Mabetbet tayon nabasay akindalem iran liknaan to, a napatnagan ed lupa to tan ed reaksion to’d arum. Mabetbet ya ‘atenyeg ed panangabagey’ si Jesus, tan inusar toy parehon balikas a maneskribe’d saray walna ed saray ilustrasyon to.​—Marcos 1:41; 6:34; Lucas 10:33.

Maseguron inkasil toy bosis to sanen inablog toray managtagilako tan ayayep ed templo tekep na saray salitan: “Ekal yo dia so sarayan bengatla!” (Juan 2:14-16) Say insuheri nen Pedro a, “Sikato so niarawi komon ed sika, Katawan,” so binesngaway mapuersan ebat ya, “Ekal ka’d arap ko, Satanas!”​—Mateo 16:22, 23.

Nikadumay panamabli nen Jesus ed pigaran nagkalalo lan maapit ed sikato. Adeskribe si Juan bilang say ‘babangatan ya inaro nen Jesus.’ (Juan 21:7, 20) Tan nabasa tayo: “Bang si Jesus inaro to si Marta, tan say agi to, tan si Lazaro.”​—Juan 11:5.

Si Jesus so asakitan met. Liliknaen so trahedyay impatey nen Lazaro, ‘si Jesus so nannangis.’ (Juan 11:32-36) Diad pangipaliknay sakit na pagew to lapud impangitapat nen Judas Iscariote, inaon nen Jesus so makapasakit a balikas ed Salmos: “Say mangan na tinapay ko intagey to so mokor to ya inkonsil ed siak.”​—Juan 13:18; Salmo 41:9.

Anggan nen manasagmak na pirmin ot-ot ed istaka, impanengneng nen Jesus so akindalem a liknaan to. Matamoy ton impudir so ina to ed “inaro to a babangatan.” (Juan 19:26, 27) Sanen anengneng toy impanbabawi na sakey ed saray managgaway-mauges a nipasak ed dikingan to, si Jesus so maabagey ya angikuan: “Wala ka ed siak dia ed Paraiso.” (Lucas 23:43) Nalikna tayoy besngaw na liknaan diad akis to: “Dios ko, Dios ko, akin et inkaindan moak?” (Mateo 27:46) Tan napatnagan ed manpapanabos iran salita to so masimoon ya aro tan talek: “Ama, dia ed saray limam imatalek ko so espirituk.”​—Lucas 23:46.

Alay panamaseguro so iiter na sayan amin ed sikatayo! “Ta anggapo so sakey ya atagey a saserdote tayo ya agmakayarin mangasi ed saray kakapuyan tayo; noag say sakey [si Jesus] a tinukso ed amin a singa sikatayo, ingen anggapo so kasalanan to.”​—Hebreos 4:15.

Kompiyansa nen Jehova

Agbalot nambabawian nen Jehova so impamili to’d saray pinagkasangiyan to. Amta toy katooran da’d sikato, tan siaabagey ton imbaliwala iray kakapuyan na saramay ag-ayadyari. Ingen inilaloan toran sumpalen day nigangganan ed sikara. Diad tulong to et ayarian da itan a gawaen.

Maanos tayo komon ya ipanengneng so kompiyansa ed saray matoor ya agagi tayo. Lawas iran ag-ayadyari ed sayan sistema na bengabengatla, a singa sikatayo. Siansia, agtayon balot uukomen iray agagi tayo bilang agmakanepegan na aro tan atension tayo. Insulat nen Pablo: “Kanian, sikatayo a mabiskeg nepeg tayo a sungdoan so kaleteyan na makapuy, tan aleg a paliketen tayo so inkasikatayon dili.”​—Roma 15:1; Colosas 3:13, 14.

Alikna na saray propeta nen Jehova so amin ya emosyon a nalilikna tayo. Anggaman kuan, nanmatalek ira’d si Jehova, tan sinustini ira nen Jehova. Nagkalalo ni nen say satan, inikdan ira nen Jehova na panggayagaan​—maong a konsiensia, kasumpalay pabor to, matoor iran kakaiba a manustini ed sikara, tan say panamaseguro na maliket ya arapen. (Hebreos 12:1-3) Komon ta mansiansia tayo met ed si Jehova tekep na sigpot a kompiyansa legan tayon aaligen so pananisia na saray propeta nensaman, totoon “walaan na liknaan a singa sikatayo.”