Saray Doktor, Huis, tan Tastasi nen Jehova

NEN Marso 1995, angisponsor iray Tastasi nen Jehova na duaran seminar diad Brazil. Say gagala? Pian nagamoray pikoopera na saray empleyado ed medikal tan ley sano say pasienti ed ospital et sakey ed Tastasi nen Jehova tan agmangawat ed panangiyalis na dala.—Gawa 15:29.

Makapaermen, diad arum a kaso imbaliwala na saray doktor iray kaliktan na saray pasientin Tasi tan nanggunaetan day pakala na ganggan na korte pian nipilit so panangiyalis na dala. Diad ontan iran situasyon uusaren na Tastasi so antokaman a walan legal iran paraan pian protektaay inkasikara. Anggaman kuan, lablabayen day pikoopera nen say pikomprontaan. Kanian, nidanet ed saray seminar a dakel iray kasalat ed panagtambal a panangiyalis na homologous a dala tan sililiket ya awaten iratan na Tastasi nen Jehova.a

Sinuportaan na inpanmiting na Regional Council of Medicine na São Paulo so talindeg na Tastasi. Nen Enero 1995, deneside to a no walay kuestion ed nirekomendan panagtambal na doktor, say pasienti so walaan na kanepegan ya ipulisay itan tan manpili na sananey a doktor.

Nakomendaan, wala la natan so nilasus a propesyonal ed medikal ed mismon lawak na medisina ed Brazil a mangipapakurang na panagtambal ya anggapoy dala ed saray pasienti ra ya onkekerew ed satan. Nanlapulad nen Marso 1995 iran impanseminar, makatantanday inyaligwas na kooperasyon ed baetan na saray doktor, huis, tan Tastasi nen Jehova ed Brazil. Nen 1997 impalapag na medikal a magasin ed Brazil ya Âmbito Hospitalar so sakey ya artikulo a mangipipilit ed saray kanepegan na Tastasi nen Jehova a respetoen so talindeg da ed isyun nipaakar ed dala. Malaklaknab la natan a bibidbiren ya, unong ya inkuan na Regional Councils of Medicine parad saray estado na Rio de Janeiro tan São Paulo, “say obligasyon na doktor a protektaan so bilay na pasienti so kaukolan ya agto papalakbatay obligasyon to ya idepensay kanepegan na pasienti a piliey panpatambal to.”

[Paimano ed leksab]