Panangipasabi na Maong a Balita ed Mas Dakel Ni
DIAD paniisip ko’d totoo diad bansan panaayaman ko, amoriak a dakel so makaamta lambengat ed Tastasi nen Jehova diad panamegley na saray balita. Inisip ko, nepeg a nakatongtong irayan totoo ta pian naamtaan da no sioparay Tastasi nen Jehova tan no antoy peteg a sisiaen da. Balet panon kon makatulong? Sakey a Kristianon matatken so masiken ko, tan inikdan toak na makabat a panangigiya tan saray suhestion.
Aromog mi so importantin ideya diad artikulon “Magazines That Give Practical Comfort,” a nipalapag ed Enero 8, 1995, paway na Awake! a magasin. Tutukoyen so kimey na sakey a Tasi, inkuay artikulo: “Panggugunaetan ton kolektaen iray daan a kopya na pigaran Awake! a magasin a tinipon na arum a Tastasi ed abung. Insan to bisitaen iray ahensya ya isipen ton mangipanengneng na nikaduman interes ed arum ed saray tema.”
Diad tulong na masiken ko, agnambayag et akolektak so pigan lasus a kopya na magasin. Manlapud saraya et apilik iray nanduruman tema ya ontukoy ed totoon salien kon katongtongen.
Uusaren iray directory na telepono tan public records, akatugyop ak na sakey a listaan a mangilalaman ed saray ospital, pundoan na saray tobonbalo, tan nursing homes. Inlistak met iray manangipakurang na punerarya, superbaysor tan managkonseho na eskuelaan, medikon managsuri, tan opisyales na saray prisoan tan korte. Laktipen na listaan ko iray direktor na saray institusyon parad saray alkoholiko tan managdruga, saray asosasyon nipaakar ed saray isyu ed kaliberliber, parad saray abaldado tan biktima na bakal, tan parad pan-nutrisyonal a panagsukimat. Agko met nilingwanan iray manedyer na opisina parad saray pankaabigan, serbisyo ed sosyedad, tan ed pamaakaray pamilya.
Antoy Ibagak?
Say inmunan ginawak sanen binmisita ak et say malinew a pangipakabat no siopa ak. Insan sinalambit kon say ibibisitak et aboten to lambengat so pigaran minuto.
No kaarap ko la so toon inkargado, ikuankon: “Sakey ak ed Tastasi nen Jehova. Balet, agak linma’d dia pian misingbatan nipaakar ed relihyon, a nayarin agmatukoy legay panag-opisina.” Kaslakan et say atmospera so nagmaliw a mas relaks. Insan, iyaadapta iray komentok ed kipapasen, ituloy ko: “Nankaddua so rason na imbisitak. Unona, labay kon ibalikas so apresasyon ed kimey ya iyoorganisay departamento yo. Diad tua, nepeg ya agleglemewen so panguusar na sakey ed panaon tan biskeg to nisesengeg ed lapag a publiko. Talagan nakomendaan iya.” Diad dakel a kaso say toon inasinggeran ed onian paraan et nasurprisa.
Natan et maseguron umamengen na too no antoy onkomaduan rason na imbisitak. Ituloy ko: “Say komaduan rason na imbisitak et saya: Manlapud magasin min Awake!, ya internasyonal so kipapalapag to, pinilik so pigaran artikulo a nagkalautlan manasaglawi ed trabahom tan saray probleman misiglaotan ed satan. Maseguro ak a labay mon amtaen no panoy panmoria na sakey ya internasyonal a palapagan ed sarayan problema. Panliketan kon itilak irayan kopya ed sika.” Mabetbet a nibaga’d siak a naapresia iray sagpot ko.
Makapasurprisa tan Makatumang Iran Resulta
Sanen inusar ko iyan iyaasingger, maslak et makaaron angawat ed siak; sakey lambengat ed 17 so ag-angawat. Dakerakel so eksperiensiak a namparan makapasurprisa tan makatumang.
Alimbawa, kayari amipat ya impanali tan maanos ya impanalagar, akapitongtong ak a siansia ed district inspector na eskuelaan. Sikatoy okupadon tuloy a too. Ingen, sikatoy makakkaaro tan akitongtong ed siak ya agano. Nen onalis ak la, inkuanto: “Apresiaen kon tuloy so sagpot mo, tan basaen kon maong so literatura yo.”
Diad sananey ya inkagawa, dinmalaw ak ed korte na distrito, a pegdatey manunaan a huis, sakey a walad kapegleyay-edad a laki. Sanen linmoob ak ed opisina to, binukayan to lay papeles to a naingongotan.
“Say opisina et Martes na kabuasan labat, a ditan ak la makapangiter na antokaman ya impormasyon,” so makapapasnok ton inkuan.
“Despensa yoak ed insabik ya agmatukoy a panaon,” so tampol ya inyebat ko tan insan inyarum ko, “Siempre, maliket ak ya ompawil lamet ed arum a panaon. Balet diad tua et say ibibisitak so personal a pamaakaran.”
Diad saman et mausisa lay huis. Intepet to, diad aliwan tanton mapasnok a tono, no antoy pegdat. Inulit kon ombisita ak lamet no Martes.
“Ipangasim, yurong ka,” so impilit to, ya akasurprisaan kon tuloy. “Antoy pegdat mo?”
Insan agaway mabilabilay a tongtongan, tan sikatoy akidespensa ed impagmaliw ton agmakaaron tuloy ed gapo lapud sikaton talagay okupado.
“Antam no antoy labalabay ko’d Tastasi nen Jehova?” so intepet na huis ed kaunoran. “Walaan iray niletneg a maong a prinsipyo ya agda italirak. Sinali nen Hitler so anggaay nayarian to, balet ta siansian agmibakal iray Tastasi.”
Sanen duara’d sikami so linmoob ed sakey ya opisina, abidbir kami na saray sekretaryo diman. Insan say executive secretary so makapapasnok ya angibando’d sikami. “Agbalot mangaawat so presidenti na antokaman iran partido.”
“Balet ta abrasaen to kami,” so kalmadon inyebat ko, “lapud Tastasi kami nen Jehova. Agkami manpepetisyon, tan say ibibisita mi so agmanbayag na taloran minuto.” Diad pusok et masimoon ak a nampikasi, “O Jehova, ipangasim a maong komon so pawayan na saya!”
Mabinbintan inmebat so sekretarya, “E, sige, salien ko.” Sikatoy linma. Kayari manga duaran minuto, ompatnag a singa tuloytuloy la itan ed siak, sikatoy pinmarisi a tumtumbokey mismon presidenti. Agmansasalita, inggiya na presidenti so paarap ed opisina to, ya alabasay duara nin kuarto.
Leleg na pantotongtong mi, sikatoy nagmaliw a mas makaaro. Mabulbulos ton inawat iray espisyal a paway na Awake! a magasin sanen inyopresi mi iratan. Akisalamat kami ed si Jehova ed sayan maong ya impakapantasi nipaakar ed gagala na kimey tayo.
No nodnonoten so dakel a makapakelaw ya eksperiensia, mas lalon naapresiak so ibabaga nen apostol Pedro: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na inkatunong.” (Gawa 10:34, 35) Say linawa na Dios et say totoo na amin ya abenegan, lenguahe, odino posisyon ed sosyedad so naikdan na pankanawnawan makaamtay gagala to parad katooan tan parad dalin.—Insulat.