Maong a Balita na Paraiso ed Tahiti
TAHITI! Singano ipapasabi na say ngaran so nikadkaduman panliketan. Pinabantog itan na saray pintor tan managsulat a singa di Paul Gauguin, Robert Louis Stevenson, tan Herman Melville, a saray impinta tan insulat da nipaakar ed karakpan tan inkaligen na South Sea Islands so akasagyat ed interes na dakel.
Say Tahiti so sankabalgan ed masulok a 120 isla na French Polynesia, a walad South Pacific. Anggaman sayan islan South Sea et kaparparan tuloy na paraison nonoten na maslak a totoo, siansian kaukolan a narengelan na totoo ed Tahiti so nipaakar ed sananey nin paraison asingger lan onsabi. (Lucas 23:43) Saray Tastasi nen Jehova, a walaay dagup natan ed Tahiti a 1,918, so okupadon tuloy a mangitotongtong ed 220,000 a totoo dia nipaakar ed maong a balita a say Panarian na Dios so asingger lan mangitarok ed peteg iran kipapasen na paraiso aliwa lambengat ed Tahiti noagta ed sankadalinan.—Mateo 24:14; Apocalipsis 21:3, 4.
Diad dakel a taon say panagpulong a kimey ed Tahiti so ididirehi na sangan opisina na Watch Tower Society ed Fiji, ngalngali 3,500 kilometro ed kaarawi. Say andukey a distansya so mamapairap ed bengabengatla, tan matantan so ibubulaslas. Kanian, nen Abril 1, 1975, nipaalagey so sangan opisina ed Tahiti, tan makatantanda itan ed kimey na tuan Kristianos ed sayan teritorya. Anto so angipaarap ed onian iyaaligwas, tan panon a nigapo so panagpulong a kimey ed Tahiti?
Melag a Gapoan
Inmunan nadngelan so maong a balita na Panarian ed Tahiti diad saray taon 1930, tan dakel ed saray taga-isla, a walaan na aralem a respito ed Biblia, so kinmiwas tekep na baleg ya interes. Balet, bilang resulta na pananebel na gobierno tan arum niran panameget, siansian anggapo ni Tastasi ed isla ya anggad kaunoran na dekada na 1950. Diad satan a panaon, si Agnès Schenck, a tubo ed Tahiti so manaayam ed Estados Unidos, so nandesiden onsempet ed Tahiti a kaibay masiken tan anak to. Inistorya to no panon itan ya agawa.
“Diad 1957 a distrito kombension diad Los Angeles, impaliwawa nen Brother Knorr [say presidenti ed saman na Watch Tower Society] a wala so baleg a pankaukolan parad manangipalapag na Panarian ed Tahiti. Saksakey taon ko nin abautismoan ed saman et nikelyaw kon, ‘Onla tayo sirin ed Tahiti!’ Duaran pamilya, saray Neill tan saray Carano, maapit a kakaaro mi so akadngel ed imbagak. Imbaga ran labay da so mila ed sikami, balet ta andian kami na magenap a kuarta. Abayag lan mansasakit so masiken ko, tan say anak kon lakin so ugaw nin tuloy. Kanian mairap parad sikami iyalis. Saman a kalat so nadngelan na kakaaro mi ed kabangibang iran kongregasyon, tan pinawitan da kami na kuarta tan kagawaan ed abung. Diad ontan et nen Mayo 1958 nanlayag kamin amaarap ed Tahiti, nilikud ni, 36 ya apis na kama!
“Sanen sinmabi kami ed Tahiti, singa ak no sakey a dayo lapud 20 taon lan andi ak la’d man. Ginapoan miy nampulong, balet ta kaukolan a manalwar kami ta nisesebel so Kristianon kimey tayo diman. Kaukolan min iyamot iray magasin, tan say uusaren mi labat et say Biblia. Diad inmuna et nampulong kami labat ed saramay walaan laray subskripsion na Panag-Bantayan tan Awake! a magasin.
“Sikara di Clyde Neill tan David Carano, a kaibay pamilya ra, so akaiba mi kayari na internasyonal a kombension ed New York City nen 1958. Saniiba kamin nampulong tan angimbita ed totoo ya ontalineng ed saray paliwawan nagawa ed kaabungan na saray agagi. Kalkalnan naorganisa iray bengatla, tan nigapo mi sakey a grupo na 15 ed panagaral na Biblia. Kayari taloy bulan saray Neill tan Carano so kaukolan ya onsempet la lapud pinmaso lay visa ra bilang turista. Kanian deniside na mamatatken a sakbay na iyalis da et bautismoan da lan amin iray interesadon kaulipikado. Apribilihyoan ak ya ipatalos so sankaunaan a paliwawa ed bautismo. Diad sayan inkagawa et waloran tubo na isla so angisimbolo na dedikasyon da ed si Jehova diad bautismo. Kayari to et pinmawil laray Neill tan Carano ed Estados Unidos.
“Nantultuloy so panagpulong a kimey. Inorganisa mi inkasikami ed angkelag a grupo tan nampupulong ed totoo diad labi. Mabetbet ya anggad pegley labi impitongtong mi ed saray interesado. No maminsan et anggan saray ministro na Protestanti so akibiang met ed saray diskusyon mi. Kasabi 1959 et apormay inmunan kongregasyon. Insan, diad baleg a liket mi, nen 1960 et opisyal a binidbir la na gobierno so asosasyon na Tastasi nen Jehova. Saraman ya inmuunan taon so napno na gayaga tan kapantokan ed espiritual a pamaakaran. Talagan benindisionan nen Jehova so desisyon min onalis ed lugar a wala so babaleg a pankaukolan.” Si Sister Schenck so mantaon la natan na 87, tan siansia nin manlilingkor a sitotoor ed si Jehova ed kawalaan ton kongregasyon.
Inmabanti so Kimey
Nen 1969 say duaran Tastasin nanlapud Pransya, di Jacques tan Paulette Inaudi, so niasain ed Tahiti bilang espisyal payunir. Nanonotan ni nen Jacques: “Sanen sinmabi kami ed Tahiti, wala lambengat so 124 manangipalapag, sakey a kongregasyon ed Papeete, tan duaran espisyal payunir ed Vairao, diad peninsula.” Pinantekepan na sakey ya isthmus so peninsula tan say Tahiti. Asingger lan nagawa so “Peace on Earth” ya Internasyonal ya Asamblea. “Saman so sankaunaan ya eksperiensiak ed panangorganisa na kombension,” kuan ni nen Jacques. “Kaukolan ya iplano mi sakey ya Ingles sesyon parad saray bisita, manugyop na sakey ya orkestra parad saray kanta na Panarian, tan mangipasal na duaran drama. Amin na sayan kimey so gawaen labat na 126 a manangipalapag. Segurado ak a baleg so ginawaan nen Jehova ed satan.” Say inmatendi ya 488 so nanliketan na saray taga-isla. Ta dakel ed sikara et sankaunaan itan a pankanawnawan akapikabat ira ed kaparan Tastasi a nanlalapud arum a daldalin.
Ag-abayag, si Jacques Inaudi so niasain bilang managbiahen manangasikaso. Diad ibibisita to ed nanduruman isla, naimano ton dakel so interesado balet ta dagdaiset iray manangipalapag na Panarian a mamayubo ed saratan. “Kanian pinaseseg ko so dakel a pamilyan onalis ed sarayan isla pian manlingkor ed lugar a babaleg so pankaukolan,” impaliwawa nen Jacques. “Kanian kalkalanan say maong a balita so nikayat ed saraman ya arkipelago.” Si Brother Inaudi so nanlingkor bilang managbiahen manangasikaso manlapud 1969 ya anggad 1974, tan natan et manlilingkor bilang sakey a matatken ed sakey ed saray kongregasyon ed Tahiti.
Sakey ed saramay kinmiwas ed panamaseseg nen Brother Inaudi et si Auguste Temanaha, a sakey ed saray waloran nampabautismo nen 1958. Nanonotan to ni agawa. “Nen 1972 say manangasikaso na sirkito, si Jacques Inaudi, so amaseseg ed sikamin nonotey panlingkor ed lugar ya Huahine, sakey ed Leeward Islands a kabiangay Society group. Masuyat ak ta say nipapabtang labat ed siak et say panagbasa na Biblia ed kongregasyon tan liknaen kon agak kualipikado pian napabtangan na ontan a responsabilidad. Anggaman kuan, agsinmaway Brother Inaudi a mangibabaga ed siak, ‘Agka mapaga, sarag mo!’ Agnambayag et akapandesisyon ak. Kanian, nen 1973 inlako min amin so kayarian mi tan kaibay taloran ugugaw nin anak mi et inmalis kami ed Huahine.
“Diad insabi mi, aromog kon kaukolan kon igapo so amin—say Panagaral na Panag-Bantayan, say Teokratikon Eskuelaan Parad Panagministro, tan arum nira. Aliwan mainomay iman, balet ta naeksperiensia mi so proteksion tan tulong nen Jehova. Aminpigapigan tinulongan to kamin makaromog na napanayaman. Insan, sanen walay grupo na sumusumpan manasalin mamatakkias ed sikamin Tastasi ed isla, sakey a politikon taga diman so angidepensa ed sikami. Tua, si Jehova so talagan mangaasikaso ed sikami a lanang.” Natan, wala lay duaran kongregasyon ed Huahine—sakey a kongregasyon a Pranses a walaay 23 manangipalapag tan sakey a kongregasyon a Tahitian a walaay 55 manangipalapag.
Nen 1969, si Hélène Mapu so niasain bilang espisyal payunir pian kimeyay peninsula. “Dakel so interesado dimad peninsula, tan diad antikey a panaon et akapangigapo ak na dakel a panangiyaral na Biblia,” kuan nen Hélène. Ag-abayag et apormay melag a kongregasyon diad Vairao, balet kaukolan iray mamatatken. Asabi panaon, si Colson Deane, a manaayam ed Papara a 35 kilometro ed kaarawi, so akapangiter na tulong. “Kaukolan mi magmaliw ya organisadon maong ta pian napanserbian so Vairao,” nanonotan ni nen Brother Deane. “Mantratrabaho ak ed syudad na Faaa, 70 kilometroy kaarawi to manlapud Vairao diad basil na isla. Kayari trabaho, kaukolan koy manapuran onsempet, samarey pamilyak, insan onlad Vairao. Diad saginonor et kaukolan mi onalis ed Faaa nisesengeg ed trabahok. Kasin nasuportaan mi ni Vairao Congregation? Labalabay min tulongan iray agagi diman, kanian deniside min ituloy. Diad saray miting ed labi et mataltalag so pakasempet mi sakbay na pegley labi lapud kaukolan min itulor iray agagin andian na kotse. Ginawa mi itan ed loob na limay taon. Natan et baleg a gayaga so pakanengneng a wala lay apatiran kongregasyon ed sayan parti na isla, tan dakel so nanodnonotan mi ed saraman ya agew.”
Nagmaliw a Sakey a Sanga so Tahiti
Kasabi 1974 say bilang na manangipalapag na Panarian ed Tahiti so nagmaliw a 199. Diad tinmumbok a taon sanen si N. H. Knorr tan F. W. Franz, say presidente tan bise-presidente ed saman na say Watch Tower Society, so binmisita ed French Polynesia, naimano ran mas praktikal a say panagpulong a kimey diad French Polynesia et niwanwan, aliwa lan say Fiji a masulok a 3,500 kilometro ed kaarawi, noagta manlapulad Tahiti. Kanian, nen Abril 1, 1975, niletneg so sanga ed Tahiti, tan say manangasikaso na sirkito, si Alain Jamet, so aturon manangasikaso na sanga.
Pigaran taon ed apalabas, anonotan nen Brother Jamet iray makapakelaw a panamendision nen Jehova. “Nanlapulad 1975 baleg a sagpot so nisesekar ed pangipasabi na maong a balita ed amin ya isla tan arkipelago ed teritorya mi, a kokobrian to so sakey a lugar a singa kabaleg na Mamasagur a Europa. Saray resulta so makapalikliket. Kasabi 1983 say bilang na manangipalapag so sinambi ed 538. Diad saman a taon et nipaalagey so sangan opisina tan Bethel Home diad Paea. Natan et wala la so ngalngali 1,900 a manangipalapag a nitaytayak ed 30 kongregasyon diad Society Islands, sakey a kongregasyon tan sakey a nisulinek a grupo ed Austral Islands, sakey a kongregasyon tan duaran nisulinek a grupo diad Marquesas, tan pigaran nisulinek a grupo diad Tuamotu tan Gambier Islands. Dakel so nipapaalagey a balon Kingdom Hall—talora ed Marquesas tan pitora ed Tahiti—pian naasikaso so lawas-ondarakel a bilang na saray balo nin onaatendi ed saray miting. Diad apalabas a 20 taon, talagan bebendisionan nen Jehova iray sagpot mi a bayuboan so lawak na saray taga-Tahiti.”
Dakel Ni so Kaukolan a Gawaen
Saray ilalo parad ibubulaslas ed French Polynesia so ekselenti. Nen Marso 23, 1997, 5,376 a totoo so akitipon ed Tastasi nen Jehova ed intiron French Polynesia parad Memoryal na impatey nen Jesu-Kristo. Pian nakapet so pankaukolan ed espiritual na sarayan interesadon totoo, saray publikasyon tayo ed Biblia so niwala ed pigaran lokal a lenguahe. Niarum ed Tahitian, nipaparaan iray literatura ed Paumotu, a pansasalita ed Tuamotu Archipelago tan diad Amianen tan Abalaten na Marquesia.
Natutulongan na tuloy-tuloy ya ibubulaslas tan mararakep ya eksperiensia iray manangipalapag na Panarian ed Tahiti a nagkalalon mangapresia ed panangaro tan anos nen Jehova, “a sikato labay to a saray amin a totoo nilaban ira komon, tan ondago ra ed pakapikabat ed katuaan,” anggano diad ararawin isla na South Sea. (1 Timoteo 2:4) Saray Tastasi nen Jehova ed Tahiti tan ed arum niran isla na French Polynesia so nagnap a manmamatalek ed sipan nen Jehova: “Saray polpolo alagden da ak naani, tan manmatalek ira naani ed saray taklay ko.”—Isaias 51:5.
[Mapa ed pahina 26]
(Parad aktual a format, nengnengen so publikasyon)
Aasikasoen na sanga ed Tahiti iray pankaukolan na French Polynesia
AUSTRALIA
[Litrato ed pahina 25]
Manlapud kawigi a manpakawanan: Alain Jamet, Mary-Ann Jamet, Agnès Schenck, Paulette Inaudi tan Jacques Inaudi
[Litrato ed pahina 27]
Sangan opisina ed Tahiti