Saray Bendision ed Panagpayunir
“Say bendision nen Jehova makapayaman; tan agmangarum na ermen.—ULIRAN 10:22.
1, 2. (a) Panoy impangibalikas na sakey a payunir ed liknaan to nipaakar ed sigpot-panaon a ministeryo? (b) Akin a walad posisyon iray payunir a lalon makapanggayaga ed panaggaway babangatan?
“WALA ta ni mas makapagayaga nen say pakanengneng ed iyaaralan mon magmaliw ya aktibon manangidayew nen Jehova? Makapalikliket tan makapabiskeg ed pananisia so pakaimano ed kabiskeg na Salitay Dios a mamakiwas ed totoon manguman ed bilay da ta pian napaliket si Jehova.” Ontan so sulat na sakey a payunir a nanlapud Canada a masulok lan 32 taon ed sigpot-panaon a ministeryo. Oniay inkuanto nipaakar ed panagpayunir: “Anggapoy naisip kon arum a nagawaan ko ni. Maseguron anggapo lay naisip kon makapangiter na ontan a gayaga.”
2 Miabobon kayo ta a wala so baleg a gayaga ed pakatulong ed sakey ya onkamang ed dalan a mamaarap ed bilay? Siempre, aliwa labat a saray payunir so makakaeksperiensia ed ontan a gayaga. Amin ya ariripen nen Jehova so niganggan a “manggawa . . . na saray babangatan,” tan panbabanikelan dan gawaen itan. (Mateo 28:19) Anggaman ontan, lapud saray payunir et makapanguusar na dakel ya oras ed lawak a ministeryo, mabetbet a sikaray walad posisyon a lalon makapanggayaga ed panaggaway babangatan. Balet wala niray arum a tumang ed panagpayunir. Mitongtong ed saray payunir, tan seguradon ibaga ra’d sikayo a say panagpayunir so makapakelkelaw a dalan a naeksperiensiay ‘bendision nen Jehova a makapayaman ed sakey.’—Uliran 10:22.
3. Anto so nayarin managyat ed sikatayo legan a manlilingkor tayo ed si Jehova?
3 Agano ni et kinerew ed saray payunir ed nanduruman parti na dalin a deskribien daray bendision a naeksperiensia ra’d sigpot-panaon a ministeryo. Konsideraen tayo paray imbaga ra. Balet agnadidismaya no say serbisyom et gegeteran na makapuy a bunigas, itatatken, odino arum niran sirkumstansia. Tandaan, say importanti et say panlingkor ed si Jehova ya intiron-kamarerwa, diad antokaman a nayarian mo. Siansia, diad pakadngel ed saray komento na pigaran payunir et pagmaliwen to kan lalon interesado ed iloob ed sayan makapatumang a kimey no bilang ta posibli.
Aralem a Liknaan na Inkapnek tan Gayaga
4, 5. (a) Akin a say pananginabang na maong a balita ed arum et makatumang ya eksperiensia? (b) Antoy liknaan na saray payunir nipaakar ed pibibiang ed sigpot-panaon a ministeryo?
4 “Lalo a mapalar so mangiter nen say mangawat,” inkuan nen Jesus. (Gawa 20:35) On, say agmasiblet a panangiter so natumangan. (Uliran 11:25) Nagkalalo lan tua iya no nipaakar ed pananginabang na maong a balita ed arum. Peteg, wala ta ni babaleg a langkap a niiter ed kaparan too nen say pakatulong ed sikaton onggamor na pikakabat ed Dios, a mangitonton ed andi-angaan a bilay?—Juan 17:3.
5 Agmakapasurprisa a mabetbet ya iistoryaen na saramay walad sigpot-panaon a ministeryo so gayaga tan ontanlan inkapnek a nagagamoran da ed panagministeryo ra. “Amtak ya anggapo lay trabahon makapenek ed siak a nagagamoran ed pananginabang na katuaan ed arum,” kuan na 64-años a payunir a taga-Britanya. Oniay imbalikas na sakey a balo a taga-Zaire na kabaliksay panagpayunir ed sikato: “Say panagpayunir so talagan sakey a ligligwa ed siak kayari impakaandi’d bilay na inad-arok a masiken. Diad lanang ya ipapaway ko ed serbisyo pian tulongan so arum et lalon agko naliliknay impakaandi inad-arok. Manmamatalek ak ed sipasipan nen Jehova tan andi lay pinonot ko et say no panon kon natulongan iray iyaaralan ko a manggaway pananguman ed bilay da. Kayari na sanagew et masamsamit so ugip ko, tan say pusok so alimbos na gayaga.”
6. Anton nikaduman gayaga so naeeksperiensia na arum a payunir?
6 Arum a manpapayunir ed loob la na dakel a dekada so awalaan na nikaduman gayaga diad impanserbi ed nisulinek a lugalugar, a sengeg na kapoporma na saray kongregasyon, a diad kaunoran et nagmaliw iran sirkito. Alimbawa, diad Abashiri, Hokkaido (sanka-amianenan ya isla ed Hapon), wala ditan so sakey ya agin biin nampayunir ed loob na 33 taon. Nanonotan to ni a diad inmunan sirkiton asamblea—parad amin a taga-Hokkaido—wala labat lay 70 inmatendi. Komusta natan? Wala lay 12 sirkito ed satan ya isla, tekep na dagup na masulok a 12,000 a manangipalapag. Isipen pay panleppua na gayagay puso to sano sikatoy onaatendi ed saray asamblea tan kombension a kaibay ulop na saray kapara ton manangiyabawag na Panarian ed saman ya isla!
7, 8. Anton gayaga so naeeksperiensia na maslak ya abayag laran payunir?
7 Arum ya abayag laran payunir et nanggayagaan day impakanengneng ed saray iyaalaran da na Biblia a nabautismoan tan insan manadampot na babaleg a pribilihyo ed serbisyo. Diad Hapon et sakey a bii a nanserbi ed siameran nanduruman asainmin bilang payunir nanlapulad 1957 et nanonotan to ni impakapalima to na Awake! magasin ed marikit a mantratrabaho ed banko. Kayari na siameran bulan et sayan marikit so abautismoan. Diad saginonor et akiasawa, tan sikaran sanasawa so nagmaliw ya espisyal payunir. Agaylan amagayaga itan ed sayan payunir sanen, diad komatlon asainmin to et say kongregasyon to so bisitaen na say balon manangasikaso na sirkito tan say asawa to—say datin inyaralan to na Biblia!
8 Agpankelawan a saramay ginawa ran karera so panagpayunir et momoriaen da itan bilang “mabmablin pribilihyo a kaukolan a pablien,” a singa impangibalikas na sakey a manpapayunir ed loob la na 22 taon!
Ebidensia na Panangasikaso nen Jehova
9. Bilang say Baleg a Manangitarya, anto so isisipan nen Jehova ed ariripen to, tan antoy kabaliksan na saya parad sikatayo?
9 Si Jehova, say Baleg a Manangitarya, so mangisisipan a sustinien toray aripen to, ya aasikasoen ira ed espiritual tan materyal a paraan. Kanian nibaga nen Arin David ed inmuna: “Tobonbalo ak nensaman, et natan masiken ak la; agko nin balot anengneng a say matunong et apaulyan, nisay saray bini to mipabpayabol na nakan.” (Salmo 37:25) Siempre, sayan garantiyan manlalapud Dios so agmangipuera’d sikatayo ed obligasyon a legpeten iray pamilya tayo ed materyal a paraan, nisay lisensya itan ya ilaloan lay inkamabunlok na Kristianon agagi tayo. (1 Tesalonica 4:11, 12; 1 Timoteo 5:8) Ingen, sano mabulos itayon manggaway panagsakripisyo ed bilay tayo ta pian lalon makapanlingkor ed si Jehova, agto itayon balot paulyanan.—Mateo 6:33.
10, 11.Manlapud eksperiensia, anto so kabat na dakel a payunir nipaakar ed abilidad nen Jehova a mangitarya?
10 Saray payunir ed intiron mundo et kabat da manlapud eksperiensia a tataryaan nen Jehova iramay ipipia ray inkasikara ra ed mataliman lima to. Konsideraen pay kaso na sakey a sanasawan payunir ya inmalis ed melag a baley a babaleg so pankaukolan ditan parad saray managpulong na Panarian. Kayari na pigaran bulan, dagdaiset so napantrabahoan, tan say tipon da et anggapo la. Kabekta et naawat da so babayaran parad car-insurance ya $81. “Anggapoy kuarta min ibayar ed satan,” insalaysay na agin laki. “Sikami nampikasin maong ed saman a labi.” Diad tinmumbok ya agew, akaawat ira na sakey a kard a nanlapud sakey a pamilyan naiirapan met ed pinansial. Akaawat so pamilya na tax refund, kuan na kard, tan lapud sobsobra itan nen say iilaloan da, labay dan inabang so arum ed sanasawan payunir. Akatekep so tseken mankantidad na $81! “Agkon balot nalingwanan iman ya agew—binmegas so bagok!” kuan na payunir ya agin laki. “Pisalsalamatan min tuloy so inkamabunlok na sayan pamilya.” Aapresiaen met nen Jehova so ontan a kaabigan, a tipikon awawey na inkamabunlok ya ipapaseseg to ed ariripen to.—Uliran 19:17; Hebreos 13:16.
11 Dakel a payunir so makapangisalaysay na mipadpara iran eskperiensia. Tepetan ira, tan ibaga ra ed sika a sikaray agbalot “apaulyan.” Diad inenengneng ed apalabas a 55 taon na sigpot-panaon a ministeryo, oniay kuan na sakey a 72-años a payunir, “Agak balot sinaew nen Jehova.”—Hebreos 13:5, 6.
“Ekselentin Paraan a Lalon Napaapit ed si Jehova”
12. Akin a say kimey a panangiproklama na maong a balita et matalonggaring a pribilihyo?
12 Say impangerew nen Jehova ed sikatayo ya iproklama so maong a balita na Panarian to et sakey la itan a pribilihyo. Momoriaen to itayo—ya anggaman ag-ayadyarin totoo—bilang “kakimeyan” to ed sayan manangisalbay-bilay a kimey. (1 Corinto 3:9; 1 Timoteo 4:16) Legan ya ipupulong tayo ed arum so Panarian na Dios, legan ya iproproklama tayo so anggaan na karelmengan, legan ya isasalaysay tayo ed totoo so makapakelaw ya aron itatarya na dondon, legan ya ipaparungtal tayoy mabilay a Salita to tan ibabangat so mablin lugan to ed matuan-impanpuson totoo, natural a napapaapit tayo ed Manamalsa tayo, si Jehova.—Salmo 145:11; Juan 3:16; Hebreos 4:12.
13. Anto so ibabaga na arum nipaakar ed epekto na payunir a ministeryo ed relasyon da ed si Jehova?
13 Babaleg a panaon so nauusar na saray payunir a binulan ed panaaral tan panbabangat nipaakar ed si Jehova. Anto so liknaan da ed pakaapekto na saya ed relasyon da ed Dios? “Say panagpayunir so ekselentin paraan a lalon napaapit ed si Jehova,” ebat na sakey a matatken ed Pransya a payunir ed masulok lan samploran taon. Sakey nin payunir ed satan a bansa, a 18 taon la ed sigpot-panaon a ministeryo, kuanto: “Mangiiter na pankanawnawa so payunir a serbisyo a ‘tawayan et nanengneng a si Jehova so maong,’ a diad inagew-agew et lalon paeeleten to so mas mabiskeg a relasyon ed Manamalsa tayo.” (Salmo 34:8) Mipadpara met so liknaan na sakey ya agin biin taga-Britanya a mampapayunir ed loob la na 30 taon. “Diad isasaral ed espiritu nen Jehova a mangigiya ed panagministeryok et lalon napapaapit ak ed sikato,” kuanto. “Talagan aminpigapigan alikas kon indirehi ak na espiritu nen Jehova ed partikular ya ayaman ed dugan panaon.”—Ikompara so Gawa 16:6-10.
14. Panon a nagugunggunaan iray payunir manlapud panangusar na Biblia tan nibase’d-Biblia iran palapagan ya inagew-agew pian ibangat so arum?
14 Nalmoan na dakel a payunir a diad inagew-agew a panguusar da na Biblia tan nibase’d-Biblia iran palapagan pian isalaysay tan ibangat iray katuaan ed Kasulatan et pabulaslasen toy pikakabat da ed Salita na Dios. Insalaysay na sakey a 85-años ya agin laki ed España a payunir ed loob la na 31 taon: “Natutulongan ak na panagpayunir a nagamoray araldalem a pikakabat ed Biblia, pikakabat ya uusaren kon itulong ed dakel a totoon mangamta ed si Jehova tan ed saray gagala to.” Sakey met ya agin biin taga-Britanya a payunir ed loob la na 23 taon, et oniay kuanto: “Natutulongan ak na sigpot-panaon a ministeryo a bayuboan so ganas parad espiritual a tagano.” Say pangipaliwawa “ed gapo na satan ya ilalo a wala ed sikayo” ed arum so mamaelet ed dilin kombiksion mo ed saray sisiaen a papablien mon tuloy. (1 Pedro 3:15) Oniay kuan na sakey a payunir a taga-Australia: “Papaaligwasen na panagpayunir so pananisiak legan kon ibabalikas so inkasiak ed arum.”
15. Anto so mabulos a gagawaen na arum ta pian makaloob ed payunir a ministeryo tan mansiansia ed satan, tan akin?
15 Malinlinew, a kombinsido irayan payunir a ministro ya apili ra so pormay serbisyon mangitatarok na dakerakel a bendision a manlalapud si Jehova. Agpankelawan a dakel so mabulos a mangiyaarunsa ed bilay da, ya isasakripisyo ni ingen so sekular a karera tan materyal a kaykayamanan, pian makaloob ed payunir a ministeryo tan mansiansia ed satan!—Uliran 28:20.
Kasin Pirawat na Pusom so Pakapanggawa na Malaglaem?
16, 17. (a) No panumamengan mo no kasin posibli ed sika so panagpayunir, anto so nayarin gawaen mo? (b) Antoy liknaan na arum sano sikaray agmakapanpayunir?
16 Kayari impaningbat ed nibaga na saray payunir nipaakar ed bendisiones na panagpayunir, anganko ta panumamengan mo no kasin praktikal ed sika so panagpayunir. No ontan, akin ya agmitongtong ed sakey a payunir a matalona ed sigpot-panaon a ministeryo to? Naromog mo met a makatulong so pitongtong ed sakey ed mamatatken ed kongregasyon, sakey a kabat tokan maong—say kipapasey laman mo, saray limitasyon mo, tan saray responsabilidad mo’d pamilya. (Uliran 15:22) Say realistikon komento na arum so makatulong ed pangusisam no kasin posibli pakapanpayunir mo odino andi. (Ikompara ed Lucas 14:28.) No makapanpayunir ka, peteg a dakel iray nagamoran mon bendision.—Malaquias 3:10.
17 Komusta balet iray dakel a matoor a manangipalapag na Panarian ya agmakapanpayunir, anggaman pilalek da met so pakapanggawa na malaglaem ed ministeryo? Alimbawa, isipen pay liknaan na Kristianon agin bii a mipupuligesgesan ed pamabaleg na apatiran ananak to. “Naeermenan ak,” kuanto, “lapud datin regular payunir ak, balet natan, lapud sirkumstansiak et agak la makapaway ed lawak a serbisyo a singa kabetbet na datin gagawaen ko.” Inad-aro na sayan agin bii iray anak to tan labay ton legpeten ira. Balet, pirawat to met a malaglaem so nagawaan to ed panagpulong. “Inarok so ministeryo,” salaysay to. Ontan met so liknaan na arum niran debotadon Kristiano a say panangaro ra ed Dios so mamapakiwas ed sikaran kaliktanen so panlingkor ed si Jehova ‘ed amin a puso.’—Salmo 86:12.
18. (a) Anto so iilaloan nen Jehova ed sikatayo? (b) Akin ya agtayo nadidismaya no lilimitaan na sirkumstansia so nagawaan tayo?
18 Tandaan a say iilaloan nen Jehova ed sikatayo et say intiron-kamarerwan serbisyo. Agpareparehoy kinarakel na satan ed kada kamarerwa. Sarag ya iyarunsa na arum so kimkimey da ta pian makapanregular payunir. Dakel met iray onloloob bilang auxiliary payunir balanglan tunggal paminsan odino diad paraan a tuloy-tuloy, a manguusar na 60 oras ed kada bulan ed ministeryo. Anggaman ontan, dakel ed totoo nen Jehova so mangitatalaga na inkasikara ed intiron-kamarerwan panagpulong tan panagbangat bilang manangipalapag ed kongregasyon. Kanian no sika so talagan lilimitaan na bunigas, itatatken, responsabilidad ed pamilya, odino arum niran sirkumstansia, agnadidismaya. Basta say iiter mo et say sankaabigan mo, say serbisyom so mabalor ed imaton na Dios, a singa met ed saramay walad sigpot-panaon a ministeryo!
Amin so Makapangidemostra ed Espiritu na Panagpayunir
19. Anto so espiritu na panagpayunir?
19 Anggaman agka makapanpayunir, nidemostram so espiritu na panagpayunir. Anto so espiritu na panagpayunir? Oniay kuan na paway na Agosto 1988 a Ministeryo Tayo ed Panarian: “Nayarin naukeran a bilang pakawalaan na positibon awawey ed ganggan a manpulong tan manggawa na babangatan, diad nagnap a pangipanengneng na aro tan panagpaga ed totoo, diad dilin-panagsakripisyo, diad pananap na gayaga ed panumbok ed Katawan a maapit, tan manliket ed espiritual, aliwan diad materyal iran bengatla.” Panon mon nipanengneng so espiritu na panagpayunir?
20. Panon a nidemostra na atateng so espiritu na panagpayunir?
20 No sakey kan ateng a walaay ugugaw nin anak, intiron-puson nirekomendam ed sikara so karera bilang payunir. Say positibon awawey mo ed ministeryo so mangipaslep ed sikara a gawaey serbisyo nen Jehova a sankaimportantian a bengatla ed bilay da. Nayarin imbitaan moray payunir tan managbiahen manangasikaso tan kaasawaan da ed abung mo ta pian nagunggunaan iray anak mo manlapud saray alimbawa na saramay panggagayagaan day sigpot-panaon a ministeryo. (Ikompara so Hebreos 13:7.) Anggan diad saray pamilyan naapag lapud relihyon, saray mananisian atateng, diad salita tan diad alimbawa et natulongan daray anak da a gawaen a kalat ed bilay so sigpot-panaon a ministeryo.—2 Timoteo 1:5; 3:15.
21. (a) Panon a makapansuporta itayon amin ed saramay manpapayunir? (b) Anto so nagawaan na mamatatken pian napaseseg iray payunir?
21 Diad loob na kongregasyon, intiron-puso tayon nasuportaan iramay makapanpapayunir. Alimbawa, kasin makapiulop ka ed sakey a payunir ed ministeryo, nagkalalo la sano say payunir et bukbukor toy mankikimey? No ontan et naeksperiensiam so ‘pakapanligliwaan [pakapanpapasesegan, NW].’ (Roma 1:11, 12) No sakey kan matatken, baleg so nagawaan mo ed pakapaseseg ed saray payunir. Sano manmiting so ulop na mamatatken, kaukolan a maparanay dan ikonsidera iray pankaukolan na payunir. Sano say payunir et nadidismaya odino walaay pigaran problema, agmanapurastan mangirekomendan itunda to lay manpayunir. Manwarin kapilitan so ontan a rekomendasyon ed arum a kaso, aglilingwanan a say panagpayunir et sakey a mablin pribilihyon papablien na sakey a sigpot-panaon ya aripen. Say daiset a pamaseseg tan pigaran praktikal a konseho odino pananulong so say nakakaukolan labat. Oniay insulat na sangan opisina na Sosyedad ed España: “Sano ipapaseseg na mamatatken so panagpayunir, manusuporta ed saray payunir ed lawak a ministeryo, tan mamapastol ed sikaran regular, mas baleg so gayaga na saray payunir, liknaen dan mausar ira, tan labay dan ituloy anggaman walaray babeng ya onlesa.”
22. Diad sayan mairap a panaon na awaray too, antoy kaukolan tayon determinadon gawaen?
22 Manbibilay tayo la ed mairap a panaon na awaray too. Initer la nen Jehova ed sikatayo so manangisalbay-bilay a kimey a kaukolan a sumpalen. (Roma 10:13, 14) Balanglan makapibiang tayo ed sayan kimey a sigpot-panaon bilang payunir odino andi, ipanengneng tayo so espiritu na panagpayunir. Nawalaan tayo komon na liknaan na inkaganatan tan espiritu na dilin-panagsakripisyo. Determinado tayo komon ya iter ed si Jehova so kekerewen to ed sikatayo—intiron-kamarerwan serbisyo. Tan tandaan tayo a sano niiter tayon amin so nayarian tayon iter, balanglan satan et kasimbangan toy duaran angkelag a sinsilyo na samay balo a bii odino ed mablin larak nen Maria, say serbisyo tayo so intiron-kamarerwa, tan papablien nen Jehova so intiron-kamarerwan serbisyo tayo!
Kasin Natandaan Yo?
◻ Akin a say sigpot-panaon a ministeryo et mangitatarok na liknaan na inkapnek tan gayaga?
◻ Manlapud eksperiensia, anto so kabat na dakel a payunir nipaakar ed abilidad nen Jehova a manalima parad ariripen to?
◻ Liknaen na saray payunir a walaay anton epekto so ministeryo ra ed relasyon da ed si Jehova?
◻ Panon mon nidemostra so espiritu na panagpayunir?
[Litrato ed pahina 23]
Baleg so gayagan naala na saray payunir manlapud panaggaway babangatan
[Litrato ed pahina 23]
Nagunggunaan iray anak mo manlapud pilimog ed saray sigpot-panaon a manangiproklama na Panarian
[Litrato ed pahina 23]
Napaseseg na saray matatken iray payunir ed lawak a ministeryo