Ibibisita ed Pan-misioniron Lawak ed Mismon Bansa Mi

SAY grupo na Kristiano iran kongregasyon a bibisitaen ko et mangiyaakar ed siak manlapud Portugal ya anggad Tsina​—odino singa ontan. Ingen, agmin balot tinaynan nen Olive, say akulaw ko, so Britanya.

Bibisitaen mi ondarakel a kongregasyon na Tastasi nen Jehova a banyagan-pansasalita a nikaykayat ed intiron bansa. Ya anggad isla na Jersey, a ngalngali 20 kilometro manlapud baybay na Normandy diad Pransya, a walaan kamiy grupon Portuges diman, ya anggad baley na Sunderland diad amianen na Inglatera, a panbibisitaan mi ed grupon mansasalitay-Intsik, mibibiang kami ed ontatalona tan maaligwas ed espiritual, a dakel-lenguahen lawak. Panon ya asabin awalaan kami na onian nikadkaduman asainmin? Tan antoy nagagawa ed pan-misioniron lawak ed mismon bansa mi? Istoryaen ko pa’d sikayo.

Sikami nen Olive so akapanserbi la na 20 taon ed panagbiahin kimey, a bibisitaen so nanduruman kongregasyon ed kada simba. Say panbiabiahi mi so mangiyaakar ed sikami manlapud amianen a manpaabalaten, bukig a manpasagur, ed intiron Britanya, tan agni abayag et diad Kristianon agagi tayon taga-isla na Mediteranea diad Malta, ya akaeksperiensiaan mi na matalonggaring a Kristianon panagparawes. (Ikompara so Gawa 28:1, 2.) Kayari taloy taon ed Malta, uumamengen mi no iner so ontumbok ya asainmin mi. Ninonot min ompan say bisitaen mi et say nibaryon lugar ya Inglis so pansasalita ra, kanian intukoy mi lay kanonotan mi ed ontan a posibilidad. Agaylay impakasurprisa mi sanen naawat mi so asainmin mi a manlingkor ed sayan balon sirkito a tugyopen na saray grupo tan kongregasyon a mansasalitay 23 nanduruman lenguahe!

Panumamengan mi no panon min ontalona’d saya. Nilikud ed naeksperiensia mi ed Malta, agmi nin balot asali inkilanor ed totoon walaay nandurumay abenegan tan kultora. Sarag mi kasin napaseseg iramay agmakatalos a maong na Inglis? Panon kamin mitalosan no agmi amta so arum a lenguahe? Panon to laray tagano tan nambabangil a kustombre na arum? Manangitukoy kami kasi? Pawilpawil irayan tepet ed kanonotan mi legan min sisimoon ya iisipen no awaten iyan tawag ed Macedonia.​—Gawa 16:9, 10; 1 Corinto 9:19-22.

Pananalona ed Babeng na Lenguahe

“Diad inmuna et liknaen kon agak kualipikado lapud agko amtay arum a lenguahe,” inkuan nen Olive. “Agko natalosan no panon kon tulongay agagin bibii. Diad ontan et anonotan ko imay sanasawan angiyaral ed sikami na Biblia a pinaseseg da kamin lawas awaten so asainmin. Imbangat da’d sikamin agbalot pagawa nen Jehova ed sikatayo so bengatlan agtayo nayarian.” Kanian sibubulos min inawat so asainmin.

Diad panadalepdep et amoria min say agpikabat ed arum a lenguhe so akatulong ed sikamin paraparay pantrato mi’d amin. Singa bilang, say pimimiting a nikokondukta ed nanduruman lenguahe ed kada simba et atalosan mi so liknaan na agagi a kaukolan day onyurong pian denglen iray miting ed lenguahen-Inglis anta dagdaiset labat so natalosan da. Kaukolan min talagan iparaanan a maong iray miting ta pian natalosan mi so nipaparungtal. Lawas oneebat si Olive na sakey ed saray tepet ed miting. Iparaan toy ebat diad Inglis insan to pinawiray sakey ya agin ipatalos itan, ya ipaisulat a por silabiko so patalos. Aminen ton masuyat a mangitagey na lima to pian mankomento. No maminsan et saray sagpot to so sengegay panelekan. Balet ag-iya anismaya ed sikato. “Amtak a naliliketan iray agagi ed panasalik a mankomento,” kuanto. “Diad tua, say panagkomentok so mamapaseseg ed saramay marunong ed lenguahe a mibiang ed miting.”

Parad say siak et say panpaliwawa so duma met, lapud kaukolan kon ikday panaon so managpatalos kayari kada estansa. Alay inomay na pakabalang ko’d naalasir a kanonotan. Nalmoan kon kaukolan koy magmaliw a lalon nisentro tan bawasan a maong so materyal ko. Balet ta panggagayagaan ko itan.

Say Nanduruman Panagministro Mi

Diad dakel a syudades ed Britanya, saray totoon walaay banyagan-pansasalita so ataytayak, anganko ta duara labat ed sakey a kalye, insan kaukolan moy manbiahi na andukey ta pian anapey arum. Ingen, sano ibanom ira ed lenguahe ra tan nanengneng moy reaksion da, naliknam a walay gunggunam. No say uulopen kon agi et iparungtal toy mensahe na Panarian ed lenguahe na onabung, say kiwas so mabetbet a makapalikliket.

On, say panagministro ed lawak na pansasalitay taga-arum a bansa so sakey ed nanliliketan min tuloy a naeksperiensia ed loob na 40 taon a serbisyo’d Panarian. Say potensyal na ibubulaslas so abalbaleg. Angapoy duaruwan dakel a totoo so nagkalalo nin makaamtan tampol ed katuaan tan natalosan dan maong sano ibabangat ira ed dili ran pansasalita. (Gawa 2:8, 14, 41) Makapatenyeg so pakanengneng ed agagin mantedter so lua ra lapud gayaga kayari na miting, diad dakel a kaso et lapud sankaunaan a pankanawnawan nadngelan tan atalosan so intiron programa ed dilin lenguahe ra.

Sano mankakabkaabungan, anggan panon et panbabanikelan min say panangigapo mi et diad lenguahe na onabung, anggaman no maminsan et nipaarap kami ed problema. Alimbawa, wadtan so kaslakan a panangibano ed onabung a Gujarati et Kemcho, a say kabaliksan to et “Komusta.” Mapatnag a say aliwan impakabalikas ko’d satan et singano ipapaamtak so sakey a klase na kape. Anggan ontan, say sanasawan nakar ko ed sakey ya abung et akaimis sanen imbanok ira ed Gujarati. Pinaloob da kamin tampol tan pinankape da kami​—aliwan lapud agsuston impakabalikas. Wala manayay kakanayon dan Tastasi nen Jehova ed saray grupon bibisitaen mi, tan impanengneng day puron interes ed katuaan.

Sakey ya agin bii a say salita to et Inglis so naynay a mangititilak na magasin ed loob la na dakel a taon ed sakey a marikit a say salita to et Intsik. Panapanaon ton inyopresi libren panagaral na Biblia ed ayaman, balet ta agto labay. Sakey ya agew et sikatoy inulop na agin biin manaaral na lenguahen Intsik tan inopresian na libron Makapambilay Kayo na Ando lan Ando ed Paraiso diad Dalin ed saman a lenguahe, ya inawat a tampol na interesadon onabung.a Natan ta walaan lay libro ed dili ton lenguahe, impaiyaralan la na Biblia. Saraman a pigpigaran salitan intongtong ed lenguahe na marikit so walaan na positibon epekto ed sikato.

Nanduruman Kultora

Agmi amta a diad arum a kultora manaya et aglabay na lalakin say kaasawaan da et ompaway a manbukbukor ed labi. Amairap iya ed dakel ya agagin bibii ya atendian iray miting ed labi. Moriaen na arum a taga-Asia a say desisyon na mamarikit ya agmiasawa tan siansian manayam ed abung et sakey ya insulto ed pamilya. Walay sakey ya aman labay to lay manbitkel lapud aglabay na marikit toy miasawa ed iyaasawa na pamilya ed sikato. On, talagan makatantanday kaukolan a sungdoan na saratan ya agagin bibii! Anggaman kuan, sano nanengneng moy epekto na katuaan ed bilay na pamilya tan no panon a say katooran na agagin bibii et pandinayewan na agmananisian atateng da, talagan makapakelkelaw itan.

Diad impangawat ed sayan asaimin, kaukolan mi manggawa na saray pananguman. Sakbay min inggapo iyan panagbiahin kimey, say kakanen ko et luton Inglis, balet natan no mas marekadoy tagano, mas mananam itan. Pagbabawian mi linmalabas a taon sakbay min apanggayagaan itan a nambabangil a luto​—manlapud putahen kappokan ya anggad nan-curry.

Nailaloan ya Ilalaknab

Onlilinew a saya la so panaon parad ibubulaslas na lawak na banyagan-pansasalita ed dakel a pasen. Ondarakel a palapagan so niwawala la natan ed nanduruman lenguahe. Natebek mon talagan walay panamendisyon nen Jehova diad kaoorganisa na saray balon kongregasyon. Saray agagin nanlalapud arawin kongregasyon ya amta ray arum a lenguahe so mansasbi pian ontulong.

Sakey a matalonggaring ya alimbawa et say reaksion ed panagpulong na maong a balita na Panarian diad Pransya. Dakel a mansasalitay-Pranses a refugee a taga-Zaire tan arum niran bansa ed Aprika so linmad Britanya ed agano niran taon. Sanen aporma ed London so sankaunaan a kongregasyon a Pranses, walay mililimog a 65 a manangipalapag na Panarian. Kayari sakey taon et say bilang da so 117 la, tan 48 ed saratan so manseserbi a sigpot-panaon bilang regular payunir. Ag-abayag et niletneg so komaduan kongregasyon pian naasikaso so ondarakel ya interesado. Natan et malaglaem lay pakaimano ed saray interesado, a 345 ed sikara so inmatendi’d selebrasyon na Memoryal nen 1995. Saray nangraduar ed Gilead a datin nanlingkor ed Benin, Côte d’Ivoire, Morocco, tan Zaire so manguusar natan ed eksperiensia ra pian asikasoen iyan ombubulaslas a lawak, tan say kiwas et makapakelaw a tuloy.

Diad sakey ya imbisita mi ed kongregasyon a Pranses, akila ak ed impangiyaral na Biblia ed sakey a kalangweran ya Aprikana. Sanen sikami lay onalis, akikasi so bii: “Ipangasin agki ni oonla. Dia ki ni.” Labay ton dakel ni naamtaan to. Impanonot to ed siak si inmunan-siglon Lydia.​—Gawa 16:14, 15.

Say inmunan kimey mi et say itulong ed ankelag iran grupon banyagan-pansasalita a magmaliw a kongregasyon. Diad saramay agagin walaay sinimban Panagaral na Libro ed Kongregasyon, insuheri mi’d sikaray apatikeyan a Teokratikon Eskuelaan Parad Panagministro a gawaen a maminsan ed kada bulan. Ontulong iya ed sikaran nibalikas dan maong so inkasikara ed lawak a ministeryo. Insan kalkalna ran kinimeyan so kagawa na amin a limaran sinimba iran miting ed kongregasyon. Natan et walaan kami la na balo iran kongregasyon a mansasalitay Intsik (Cantonese), Pranses, Gujarati, Hapon, Portuges, Punjabi, Tamil, tan Welsh.

Nanggayagaan mi met so priblihyon pakaatendi ed saray miting na agagin telek. Say panbantay ed agagin mangakansion diad kalimaan da so makapatenyeg. Diad pakaamtan diad ministeryo ra et mansalita ira diad panamegley na sinyas, pandinayewan koy ekselinti iran sagpot dan mibiang ed panangipulong na Panarian. Wala nira ingey managsinyas parad saramay telek tan bulag. Ipapatnag ton seseguroen nen Jehova ya anggapoy nipuera.

No walay bengatlan nepeg min kerewen, pariho itan ed samay kinerew nen Jesus: “Pikasi yo sirin ed Katawan na aanien, pian mangibaki na saray manani ed aanien to.” (Mateo 9:38) Dakel ed agagi tayo so mangaawat ed makapaangat a kimey ya aralen so lenguahe na saray etnikon grupo ed mismon teritoryay kongregasyon da. Anggaman sikatayo so agmamilagron apalangkapay abilidad a mansalitay nanduruman lenguahe, maseguron ilulukas nen Jehova so panagministro ed sayan pan-misioniron lawak ed mismon bansa​—lawak ya akaparaan lan anien. (Juan 4:35, 36)​—Unong ed salaysay nen Colin Seymour.

[Paimano ed leksab]