Anto so Kakaukolanen na Dios ed Sikatayo?
“Saya so aro na Dios, a sumpalen tayo so saray ganggan to; tan saray ganggan to aliwa ran ambelat.”—1 JUAN 5:3.
1, 2. Akin ya agmakapasurprisa a walaan so Dios na saray kakaukolanen parad saraman so malabay a mandayew ed sikato ed naabobonan a paraan?
“MALIKETAK la ed relihyon ko!” Agta ontan so mabetbet ya ibabaga na totoo? Balet, diad tua et say tepet so nepeg komon a, “Kasin say relihyon ko so makapaliket ed Dios?” On, say Dios so walaan na kakaukolanen parad saraman so malabay a naabobonan so panagdayew da ed sikato. Kasin manurprisa itan ed sikatayo? Andin balot. Iyaliling pan walaan ka na marakerakep ya ayaman, ya agano nin pinaapiger mo tan nangastosan moy baleg. Kasin basta abuloyan moy siopaman a manayam ditan? Siempre andi! Siopaman a mangabang so kaukolan nin makakapet ed kakaukolanen mo.
2 Mipadpara, intarya nen Jehova a Dios iyan mangaraldalin ya ayaman parad pamilya na too. Diad silong na uley na Panarian to, say dalin so “naapiger”—pagmaliwen a marakerakep a paraiso. Gawaen nen Jehova iya. Diad baleg ya impansakripisyo to, inter toy bogbogtong ya Anak to pian nagawan posibli itan. Maseguro, say Dios so walaan na kakaukolanen parad saramay manayam diman!—Salmo 115:16; Mateo 6:9, 10; Juan 3:16.
3. Panon a sinegek nen Solomon so iilaloan na Dios ed sikatayo?
3 Panon tayon naamtaan iratan a kakaukolanen? Pinuyanan nen Jehova so makabat ya Arin Solomon a manegek ed iilaloan To ed sikatayo. Kayari ton minolimoli so amin a ginegemtan to—pati say kayamanan, panagpaalagey, musikal iran interes, tan romantikon aro—onia so amoria nen Solomon: “Saya sikato so anggaan na kanonotan; amin, sikara so nadngel. Takotan mo so Dios, tan unoren mo so saray ganggan to. Ta saya sikato so katipunan na kanepegan na too.”—Eclesiastes 12:13.
“Saray Ganggan To Aliwa ran Ambelat”
4-6. (a) Anto so literal a kabaliksan na Griegon salitan nipatalos ya “ambelat”? (b) Akin a nibaga tayo a saray ganggan na Dios so aliwa iran ambelat?
4 “Unoren mo so saray ganggan to.” Manuna, ontan so iilaloan na Dios ed sikatayo. Kasin inkasobra itan parad sikato a kerewen? Andin balot. Ibabaga ed sikatayo nen apostol Juan so sakey a bengatlan makaligliwan tuloy nipaakar ed saray ganggan na Dios, odino kakaukolanen. Insulat to: “Saya so aro na Dios, a sumpalen tayo so saray ganggan to; tan saray ganggan to aliwa ran ambelat.”—1 Juan 5:3.
5 Say Griegon salita dia a nipatalos ya “ambelat” so literal a kabaliksan toy “ambelat.” Ontutukoy itan ed bengatlan mairap a kapeten odino mairap a sumpalen. Diad Mateo 23:4, nausar itan pian deskribien so “ambelat ya awiawit,” saray ginaway-toon totontonen tan tradisyon, ya impasakbat na eskribas tan Fariseos ed totoo. Kasin natatalosan yoy ibabaga nen masiken lan apostol Juan? Saray ganggan na Dios so aliwan ambelat, nisay saratan so alay irap tayon sumpalen. (Ikompara so Deuteronomio 30:11.) Diad pidumaan to, sano inaro tayoy Dios, say panangapet ed saray kakaukolanen to so mamaliket ed sikatayo. Mangiiter itan ed sikatayo na mablin pankanawnawa pian nipanengneng tayo so aro tayo ed si Jehova.
6 Pian nipanengneng tayo so aro tayo ed Dios, nakaukolan tayon amtaen iray pihon iilaloan to ed sikatayo. Singbaten tayo pay limaran kakaukolanen na Dios. Legan tayon sisingbaten, lawas nonoten so insulat nen Juan: ‘Saray ganggan na Dios so aliwa iran ambelat.’
Mangala na Pikakabat ed Dios
7. Diad anto so pandedependian na kilalaban tayo?
7 Say unonan kakaukolanen et say pangala na pikakabat ed Dios. Konsideraen tayo paray salita nen Jesus a nikurit diad Juan kapitulo 17. Agawa iya ed kaunoran a labi na impanbilay nen Jesus bilang too. Saman a labi so pirmin inusar nen Jesus pian iparaan iray apostol to ed itaynan to. Sikatoy mapaga nipaakar ed arapen da, say andi-anggaan ya arapen da. Tinmangay ed tawen tan impikasi to ra. Diad bersikulo 3, onia so nabasa tayo: “Saya so andi-anggaan a bilay, a naamtaan [panangala na pikakabat, NW] da ka a saksakey a tuan Dios, tan saman so inbakim, salanti, Jesu-Kristo.” On, say kilalaban da so mandedependi ed ‘panangala ra na pikakabat’ ed Dios tan ed Kristo. Satan so onaaplika met ed sikatayo. Pian nagamoran so kilalaban, nepeg itayon mangala na ontan a pikakabat.
8. Anto so kabaliksan na ‘pangala na pikakabat’ ed Dios?
8 Balet antoy kabaliksan na ‘pangala na pikakabat’ ed Dios? Say Griegon salita dia a nipatalos a “pangala na pikakabat” et kabaliksan toy “pian naamtaan, nabidbiran,” odino “pian sigpot a natalosan.” Imanoen met a say patalos a “pangala na pikakabat” et kabaliksan toy tuloytuloy a proseso. Say pangala sirin na pikakabat ed Dios et kabaliksan toy pangamta ed sikato, aliwan ataptapew noagta maap-apit, a babayuboan so malet a pikakaaro ed sikato. Say mantutultuloy a siglaotan ed Dios so mangitatarok na lawas-ondaraak a pikakabat ed sikato. Sayan proseso so mantultuloy ed ando lan ando, lapud agtayon balot naaralan so amin a bengatla nipaakar ed si Jehova.—Roma 11:33.
9. Anto so naaralan tayo nipaakar ed si Jehova manlapud libro na palsa?
9 Panoy pangala tayo na pikakabat ed Dios? Walay duaran libron makatulong ed sikatayo. Say sakey et say libro na palsa. Saray bengatlan pinalsa nen Jehova—namparan mabilay tan andian na bilay—so mangiiter ed sikatayo na aralem a pakatalos ed nengneng na inkapersona to. (Roma 1:20) Konsideraen paray pigaran alimbawa. Say panongol na alay dakep a pelag na danum, say sipwak na daluyon legan na bagyo, say nengneng na mabitewen a katawenan ed maliwawan labi—agta saratan so mangibabangat ed sikatayo a si Jehova et Dios a ‘mabiskeg ed pakapanyari’? (Isaias 40:26) Say panelek na ugaw ed panbabantay toy oken a manguusil ed dilin ikol to odino kuting a panggagalawan toy bolan inaramey—agta saya so mangipapatnag a si Jehova, “say bendito [maliket, NW] a Dios,” so walaan na panagpaelek? (1 Timoteo 1:11) Say taway na mananam a tagano, say makapalikliket a samyong na karosasan ed karikaan, say mabilabilay iran kolor na magapil a kompapey, say panuni na saray manok ed panaon na subol, say ampetang a lakap na inadaro—agtayo ta natebek ed saratan a bengatla a say Manamalsa tayo et Dios na aro, a labay ton panggayagaan tayoy bilay?—1 Juan 4:8.
10, 11. (a) Antoran bengatla nipaakar ed si Jehova tan saray gagala to so agtayo naaralan manlapud libro na palsa? (b) Saray ebat ed antoran tepet so naromog lambengat ed Biblia?
10 Balet, walay getar na naaralan tayo nipaakar ed si Jehova manlapud libro na palsa. Diad pangiyilustra: Antoy ngaran na Dios? Akin a pinalsa toy dalin tan impasen so too ditan? Akin ya aabuloyan na Dios so karelmengan? Antoy itatarya na arapen ed sikatayo? Pian naebatan iratan a tepet, nepeg itayon ontupleg ed arum a libron manginanabang na pikakabat na Dios—say Biblia. Diad saray pahina to, ipaparungtal nen Jehova iray bengatla nipaakar ed sikato, pati say ngaran to, say personalidad to, tan saray gagala to—impormasyon ya agtayo naaralan ed arum nin lapuan.—Exodo 34:6, 7; Salmo 83:18; Amos 3:7.
11 Diad Kasulatan, ipapanabang met nen Jehova so makanan pikakabat nipaakar ed arum a personan nakaukolan tayon kabaten. Alimbawa, siopa si Jesu-Kristo, tan antoy betang to ed pakakasumpal na saray gagala nen Jehova? (Gawa 4:12) Siopa si Satanas a Diablo? Diad antoran paraan ya ibabalang toy totoo? Panon tayon napaliisan so pangibabalang to? (1 Pedro 5:8) Say manangisalbay-bilay iran ebat ed sarayan tepet so naromog lambengat ed Biblia.
12. Panon mon ipaliwawa no akin ya aliwan pabelat so pangala na pikakabat ed Dios tan ed saray gagala to?
12 Kasin pabelat so pangala na ontan a pikakabat ed Dios tan ed saray gagala to? Andin balot! Kasin nanonotan mo ni liknaan mo sanen inmunan naaralan mo a say ngaran na Dios et Jehova, a say Panarian to so mangipawil na Paraiso ed sayan dalin, ya inter toy inadaro ton Anak bilang dondon ed saray kasalanan tayo, ontan met ed arum niran mablin katuaan? Agta satan so singa pakakaekal na belo na inka-ignorante tan nanenengneng iray bengatla a malinew ed unonan pankanawnawa? Say pangala na pikakabat ed Dios et aliwan pabelat. Satan so makapaliket!—Salmo 1:1-3; 119:97.
Pakakapet ed Saray Estandarte na Dios
13, 14. (a) Legan a mangaala itayo na pikakabat ed Dios, antoran pananguman so kaukolan tayon gawaen ed bilay tayo? (b) Kakaukolanen na Dios ya arawian tayo so antoran agmalinis ya agagamil?
13 Legan a mangaala tayo na pikakabat ed Dios, namoria tayon nakaukolan tayo so manggawa na pananguman ed bilay tayo. Saya so mangitatarok ed sikatayo ed komaduan kakaukolanen. Nepeg itayon makakapet ed saray estandarte to parad dugan kondukta tan awaten so katuaan to. Anto so katuaan? Wala ta so pibabali na Dios no antoy sisiaen tan gagawaen tayo? Diad padesir na dakel a totoo et andi. Sakey a report ya impalapag na Church of England nen 1995 so angikuan a say panamong ya agkasal so agnepeg a moriaen bilang kasalanan. “Say balikas a ‘panamong ya agkasal’ so makapabaing tan agmakatulong,” so inkuan na sakey ya obispo na simbaan.
14 Kanian, kasin say “panamong ya agkasal” so aliwa lan kasalanan? Ibabaga nen Jehova ed sikatayo diad malinew iran balikas so liknaan to ed ontan a kondukta. Onia so ibabaga na Salita to, say Biblia: “Say panangasawa sikato komon so narayew ed saray ganagana, tan say dokolan andi komon so tilol to. Ta saray managlawan tan saray managkalugoran ukomen ira na Dios.” (Hebreos 13:4) Say sekso sakbay na pankasal so aliwan kasalanan ed panmoria na malukak iran klerigo tan mimimisa, balet diad imaton na Dios et seryoson kasalanan itan! Ontan met ed pikakalugoran, insesto, tan homoseksualidad. (Levitico 18:6; 1 Corinto 6:9, 10) Kakaukolanen na Dios a paliisan tayo so ontan ya agagamil, a momoriaen ton agmalinis.
15. Panon a sasaglawien na saray kakaukolanen na Dios so panagtrato tayo ed arum tan ed no anto so sisiaen tayo?
15 Balet, aliwan magenap so ipaliis ed agagamil a momoriaen na Dios a kasalanan. Saray kakaukolanen na Dios so manasaglawi met ed panagtrato tayo ed arum. Diad loob na pamilya, iilaloan ton say sanasawa so manaroan tan manrespetoan. Kakaukolanen na Dios ya asikasoen na atateng so materyal, espiritual, tan emosyonal iran nakaukolan na ananak da. Ibabaga to ed ananak a magmaliw iran matulok ed atateng da. (Uliran 22:6; Colosas 3:18-21) Tan komusta met iray sisiaen tayo? Labay nen Jehova a Dios a paliisan tayoray sisiaen tan kustombre a manlalapu ed palson panagdayew odino saramay onkontra ed malinew a katuaan a nibabangat ed Biblia.—Deuteronomio 18:9-13; 2 Corinto 6:14-17.
16. Ipaliwawa no akin ya aliwan pabelat so pangapet ed saray estandarte na Dios parad maptek a kondukta tan ed pangawat na katuaan to.
16 Kasin pabelat parad sikatayo so pangapet ed saray estandarte na Dios parad maptek a kondukta tan ed pangawat ed katuaan to? Andi sano konsideraen tayoray gungguna—panamaley a ditan et say sanasawa so manaroan tan manmatalek ed sakey tan sakey imbes ya abuyak a panamaley lapud ag-inkamatoor; ayaman a ditan et liknaen na ananak a naaaro tan labalabay na atateng da imbes a pamilyan liknaen na ananak ya agnaaaro, kakaindanan, tan aglabalabay; sakey a malinis a konsiensia tan maong a bunigas imbes a liknaan a pankakasalanan tan laman a sasaloten na AIDS odino arum nin makaalis a sakit ed sekso. Maseguro, saray kakaukolanen nen Jehova so agmaniblet na antokaman ed sikatayo a nakakaukolan tayo ta pian panggayagaan so bilay!—Deuteronomio 10:12, 13.
Ipanengneng so Respeto ed Bilay tan Dala
17. Panon so panmoria nen Jehova ed bilay tan dala?
17 Legan mon itutunos so bilay mo ed saray estandarte na Dios, naapresyam no panon so inkamabli na bilay. Singbaten tayo natan so komatlon kakaukolanen na Dios. Nepeg tayon ipanengneng so respeto ed bilay tan dala. Say bilay so sagrado ed si Jehova. Satan so manepeg labat, lapud sikato so Subol na bilay. (Salmo 36:9) Agayla, anggan say bilay na agni nianak ya ugaw ed eges na ina to so mabli ed si Jehova! (Exodo 21:22, 23) Irerepresenta na dala so bilay. Kanian, sagrado met so dala ed imaton na Dios. (Levitico 17:14) Sirin, ag-itayo nabigla ya iilaloan met na Dios a moriaen tayo so bilay tan dala unong ed panmomoria to.
18. Anto so kakaukolanen ed sikatayo na panmoria nen Jehova ed bilay tan dala?
18 Anto so kakaukolanen na panagrespeto ed bilay tan dala ed sikatayo? Bilang Kristianos, agtayo kaukolan ya irisga so bilay tayo lapu labat ed panliket. Sikatayoy mapaga ed inkaligen, kanian seguroen tayo a saray kotse tan ayaman tayo so agmapeligro. (Deuteronomio 22:8) Ag-itayo mantatabako, manggagagal, odino mandrudruga parad panliket. (2 Corinto 7:1) Lapud ontatalineng itayo ed Dios sano ibabaga ton ‘onarawi manlapud dala,’ agtayo labay ya ipaloob ed laman tayo so dala. (Gawa 15:28, 29) Anggaman inaro tayo so bilay, agtayo salien ya isalba so kaplesan a bilay tayo diad pamuyak ed ganggan na Dios a sengegay pakapeligroan na ilalo tayon andi-anggaan a bilay!—Mateo 16:25.
19. Ipaliwawa no panon itayon nagugunggunaan ed panagrespeto ed bilay tan dala.
19 Kasin pabelat parad sikatayo so pantrato ed bilay tan dala bilang sagrado? Andin balot! Isipen pa itan. Kasin pabelat no anggapo so kanser ed bala ya iiter na panagsigarilyo? Kasin pabelat no aliwa kan adik ed mental tan pisikal lapud makaderal iran druga? Kasin pabelat so ipaliis ed makaalis ya AIDS, hepatitis, odino arum nin sakit a naala ed panangiyalis na dala? Malinew, say ipalis tayo ed ontan iran makapasakit ya inkailuam tan agagamil so pankaabigan tayo.—Isaias 48:17.
20. Panon ya agunggunaan so sakey a pamilya manlapud impakawalaan na panmoria na Dios ed bilay?
20 Konsideraen pa iyan eksperiensia. Pigaran taon ed apalabas, sakey a Tasin bii a ngalngalin mantalora tan kapalduan bulan a malukon so nanparala ed sakey a labi tan imbatik ed ospital. Kayari impan-iksamin na doktor ed sikato, nadngel ton imbaga na doktor ed sakey ed saray ners ya ekalen so lukon to. Lapud kabat to so panmoria nen Jehova ed bilay na agni nianak, sikatoy mapekder ya ag-inmabuloy ed aborsyon, ya inkuanto ed doktor: “No mabilay, paulyan yo!” Sikato so nantultuloy a nanparala tunggal paminsan, balet pigaran bulan ed saginonor et sikatoy angiyanak na maligsan ugaw a laki a kulang ed bulan a natan et sikato lay mantaon na 17. Insalaysay na sayan agin bii: “Imbaga mi iyan amin ed anak min laki, tan inkuanto a panliketan ton tuloy ta sikatoy ag-imbasura. Kabat ton say panlilingkor mi ed si Jehova so alenleneg a rason a sikatoy mabilay natan.” Maseguro, say kiwawala na ontan a panmoria na Dios ed bilay so aliwan pabelat parad sayan pamilya!
Panlingkor a Kaibay Organisadon Totoo nen Jehova
21, 22. (a) Iilaloan itayo nen Jehova a manlingkor ed sikato a kaiba iray siopa? (b) Panon a nabidbiran so organisadon totoo na Dios?
21 Agtayo bokbokor so manggagawa na nakakaukolan a pananguman pian itunos so kabibilay tayo ed saray estandarte na Dios. Walaan si Jehova na totoo ed sayan dalin, tan iilaloan to itayon manlingkor ed sikato a kaiba ira. Saya so mangitatarok ed sikatayo ed komapat a kakaukolanen. Nepeg tayo so manlingkor ed si Jehova a kaiba so ididirihe-espiritu ya organisasyon to.
22 Balet, panon a nabidbiran iray organisadon totoo na Dios? Unong ed saray estandarte a nidatak ed Kasulatan, sikaray walaan na tuan aro ed limog dan dili, walaan ira na aralem a respeto ed Biblia, igagalang da so ngaran na Dios, ipupulong da so nipaakar ed Panarian to, tan ag-ira kabiangan na sayan marelmeng a mundo. (Mateo 6:9; 24:14; Juan 13:34, 35; 17:16, 17) Wala labat so alenleneg a relihyoson organisasyon ed sayan dalin a walaan na sarayan amin a marka na tuan Inkakristiano—Tastasi nen Jehova!
23, 24. Panon tayon niyilustra ya aliwan pabelat so panlingkor ed si Jehova a kaiba so organisadon totoo to?
23 Kasin pabelat so panlingkor ed si Jehova a kaiba so organisadon totoo to? Peteg ya andi! Diad pidumaan, mablin pribilihyo so pakawalaan na aro tan suporta ed sankamundoan a pamilya na Kristianon agagi. (1 Pedro 2:17) Isipen pan akaliktar ka ed inkakneb na barko tan sikay walad danum, mipupuligesgesan pian mansiansian akaletaw. Sanen liknaen mon agmo la naanosan et walay tinmulong ed sika manlapud manangisalban-baloto. On, walaray arum ya akaliktar! Diad manangisalban-baloto et sika tan saray arum so mantutulongan a mansakay pian ilugan so arum ya akaliktar a nadalanan.
24 Agta sikatayo so walad mipadparan situasyon? Sikatayo so inagwat manlapud mapeligron “danum” na sayan marelmeng a mundo ya inlugan ed “manangisalban-baloto” na mangaraldalin ya organisasyon nen Jehova. Diad loob to, sikatayoy manbabansag a manlilingkor legan a mamapaarap itayo ed “sakbit” na matunong a balon mundo. No saray desdes ed bilay so mamakapuy ed sikatayo ed dalan, agaylan sikatayo so misalsalamat ed tulong tan ligliwa na tuan Kristianon kakaiba!—Uliran 17:17.
25. (a) Antoy obligasyon tayo nipaakar ed saraman so wala ni ed “danum” na sayan marelmeng a mundo? (b) Anton kakaukolanen na Dios so nasingbat ed ontumbok ya artikulo?
25 Komusta balet so arum—saray matuan-impanpuso a totoo a wala ni ed “danum”? Obligado tayon tulongan ira ya onloob ed organisasyon nen Jehova, agta ontan? (1 Timoteo 2:3, 4) Nakaukolan da so tulong pian naaralan no antoy kakaukolanen na Dios. Saya so mangitatarok ed sikatayo ed komalima tan unor a kakaukolanen na Dios. Nepeg tayo so magmaliw a matoor iran manangiproklama na Panarian na Dios. Singbaten tayo ed ontumbok ya artikulo no anto so sasaglawien na saya.
Kasin Natandaan Yo?
◻ Akin ya aliwan pabelat iray ganggan na Dios?
◻ Panon so pangaala tayo na pikakabat ed Dios?
◻ Akin ya aliwan pabelat so pangapet ed saray estandarte na Dios parad maptek a kondukta tan diad pangawat ed katuaan to?
◻ Anto so kakaukolanen ed sikatayo na panmoria na Dios ed bilay tan dala?
◻ Iilaloan itayo na Dios a manlingkor ed sikato a kaiba iray siopa, tan panon iran nabidbiran?
[Saray litrato ed pahina 18]
Naaaralan tayo so nipaakar ed si Jehova manlapud libro na palsa tan manlapud Biblia
[Credit Lines]
Buwaya: Diad panangiyabuloy na International Public Relations; oso: Safari-Zoo of Ramat-Gan, Tel Aviv