Balon Uusaren ya Ontulong ed Totoo a Makaaral ed Saray Kakaukolanen na Dios
“SAY simpli, direkta, tan maabig a paraan to so manresulta ed labas ni na iilaloan. Nipresenta iray tema ed agkomplikado tan marakep a paraan a siopaman a masimoon, manusukimat a too so napakiwas a mangikuan, ‘Say Dios wala ed sikayo.’” (1 Corinto 14:25) Ontan so inkuan na sakey ed Tastasi nen Jehova a taga-Thailand sanen dedeskribien to so balon brosyur, Anto so Kakaukolanen na Dios ed Sikatayo? Impaway itan na Watch Tower Society diad “Mensaheros na Maridios a Kareenan” a Distrito Iran Kombension legan na 1996/97.
Sayan 32-pahina, makolor a brosyur so denisinyo bilang sakey a kurso ed panagaral na Biblia. Kokobrian to so manuna iran bangat na Biblia. Simpli tan pinatikey iray inkisulat to, ya ipapaliwawan malinew iray kakaukolanen na Dios ed sikatayo. Agnairapan iray managbasa a talosan itan. Panon yon ikondukta so panagaral na Biblia ed sayan balon brosyur?
Usaren iray tepet. Walaray tepet diad gapo na kada leksion. Diad saray parenthesis kayari na kada tepet, naimano yoray numero na parapo a pakaromogan na saray ebat. Sarayan tepet so nayarin usaren bilang pauna tan bilang repason katulongan ed panagbangat. Alimbawa, diad gapo na sakey a panagaral na Biblia ed ayaman, nayarin itepet yo ed estudyante iray tepet ta pian naala so komento to. Imbes a korihien a tampol so antokaman ya aliwa iran ebat, nayari yon ituloy ed panagaral. Diad sampot na leksion, nayari yon pawilen iray tepet ta pian nengnengen no kasin naebatan la natan na estudyante iratan a mitunosan ed Biblia.
Nengnengen iray kasulatan. Diad kada leksion, saray antikey a komento na saray katuaan na Biblia so uulopen na manusuporta iran kasulatan. Lapud maslak ed saray kasulatan et nisita, aliwan inaon, importantin pasesegen so estudyante a nengnengen irayan tekso ed dili ton Biblia. Kaukolan ton basaen tan dalepdepen so Salita na Dios sakbay ton niyaplika itan ed bilay to.—Josue 1:8.
Ipabitar iray litrato. Say brosyur so niyilustran tuloy tekep na saray litrato tan pintura—ami-amin et masulok a 50 pirason ilustrasyon. Saraya so nitarya pian aglabat makasagyat na imano noagta bilang kaaruman a katulongan ed panagbangat. Alimbawa, say unor a duaran leksion (sansakey pahina, ed nantupag a pahina) so atituloan na “Pananulong ed Arum a Gawaen so Linawa na Dios” tan “Say Desisyon Mon Manlingkor ed Dios.” Saray litraton nidatak ed duaran pahina so manuysoy ed espiritual ya iyaaligwas na sakey a too, a sikatoy impormal a mantatasi, mibibiang ed panagkabkaabungan, manggagaway dedikasyon, tan diad kaunoran et manpabautismo. Diad pangipaimano ed sarayan litrato ed estudyante, natulongan yon makaimano ed saray kundang a kakaukolanen ta pian manlingkor ed Dios.
Anto no agmakabasan maong so interesadon too odino agmakabasan balot? Say Sosyedad so angirekord ed sayan brosyur a naala ed audiocassette ed pigaran lenguahe. Say cassette so mankarga na lugan na brosyur ontan met ed dakel a nisita iran kasulatan. Nirekord itan unong ed onggendan: Nabasa so unonan tepet, tumbokan na parapo (odino saray parapo) a mangeebat ed satan, pati pigaran nisitan kasulatan. Insan basaen so ontumbok a tepet, a tumbokan na teksto tan saray kasulatan a mangeebat ed satan, tan arum ni. Natalineng na estudyante so nirekord legan ya ipaparaan toy panagaral. Say cassette so nausar met sano mangikokondukta na panagaral.
Saraman so presente ed kombension so magunaet a mangusar ed sayan balon brosyur ed lawak a ministeryo ra. Alimbawa, pigara labat ya agew kayari impakaawat ed brosyur, duaran payunir (sigpot-panaon iran ebanghelisador) ed Estados Unidos so angipalima ed satan ed sakey ya ugaw nin sanasawa a dadalawen da. Sanen ninengneng na sanasawa iray lugan, say leksion ya “Agagamil a Kagula na Dios” so anagyat ed imano ra. “Nibangat ed siak ya agbalot makapanggula so Dios—diad intiramenti et sikato so aro,” so inkuan na bii. “Saya so kaukolan kon basaen nin unona.” Sanen pinmawil so duaran payunir ed ontumbok a simba, inkuan na bii: “Babasaen ko so balon brosyur. Mairap a tuloy a gawaen ya amin a bengatlan nepeg tayon gawaen. Agnapapaliket si Jehova ed sikami—agkami ni kasal. Balet akapandesisyon kami la. Inyareglo mi lan manpakasal no ontumbok a Biernes.” Nilakap da so sanasawan payunir, tan inkuan da ni: “Dispensa yo lay aliwan regular a panagaral mi, balet saya so amainawan tuloy ed sikami.”
Seguroen ya usaren so balon brosyur a Kakaukolanen. Satan so maabig ya uusaren ed panulong ed arum a makaaral ed saray kakaukolanen na Dios.
[Saray litrato ed pahina 17]
Panon yon usaren so balon brosyur?