Pansiansiaen a Malet so Kompiyansam Anggad Anggaan

ISIPEN pa so sakey a melag ya eroplanon mantektekkiab legan a mauges so panaon. Agla nanengneng na piloto iray pakatandaan ed dalin. Nasasakuloban na makapal iran lurem. Agto la nanengneng no antoy walad arapan to, ingen nasesegurado ton nakompleto to a liktar so biahe to. Anto so rason na kompiyansa to?

Sikatoy walaan na saray suston instrumento a mamakayari ed sikaton makatekkiab a labasan iray lurem tan dalin anggan diad kabilungetan. Diad dalanan to, nagkalalo la ed asingger na airport, walaray man-sinyal a silew a mangigiya ed sikato diad elektronikon paraan, tan sikatoy walaan met na pitatalosan ed air-traffic controller na airport diad panamegley na radyo.

Diad mipadparan dalan, naarap tayo so arapen tekep na kompiyansa, anggaman unuudiem ed agew-agew so kipapasen na mundo. Say panagbiahe tayo ed sayan marelmeng a sistema so mas mabayag ni nen say iilaloan na arum, balet ta makapanpiya tayo a wala tayo ed dugan direksyon tan oras. Akin a makapanseguro tayo? Lapud walaan tayo na panangigiyan mamakayari ed sikatayon nalikas so agnayarian na pakanengneng na too.

Say Salita na Dios so ‘liwawa ed dalan tayo,’ tan satan so “napanmatalkan, a manggawan makabat ed ag-eksperiensiadon sakey.” (Salmo 19:7; 119:105) Singa saray pansinyal a silew a mangipapanengneng ed dalanan na piloto, dugarugay pangidadatak na Biblia ed arapen ya ebento tan iikdan to itayo na malinew iran instruksion ta pian naseguron sikatayo so makasabin sililiktar ed destinasyon tayo. Balet, ta pian nagunggunaan ed madibinon panangigiya, nepeg tayon manmatalek ed satan.

Diad sulat to ed saray Hebreo, pinaseseg nen Pablo iray Judion Kristiano ya ‘ombenben a malet ed kompiyansa a walad sikara ed kagapo a malet anggad anggaan.’ (Hebreos 3:14) Onkapuy so panagmatalek no say panamenben tayo ed satan so ag ‘paeleten.’ Kanian say tepet ya onlelesa et, Panon tayon napansiansia so kompiyansa tayo ed si Jehova a malet anggad anggaan?

Agamilen Moy Pananisiam

Sakbay a makatekkiab so piloto diad panamegley na saray instrumento, a sigpot a maniilalo ed saraya tan ed saray totoo na airport, kaukolan toy magenap a panangipasal tan dakel ya oras na panagpatekkiab. Mipadpara, nakakaukolan na sakey a Kristiano ya agamilen so pananisia ton tuloytuloy ta pian napansiansia so kompiyansa to ed panangigiya nen Jehova, nagkalalo la sano onlesa iray mairap a sirkumstansya. Oniay insulat nen apostol Pablo: “Lapud walaan kami na saksakey ya espiritu na pananisia a singa ed samay nisulat: ‘Angagamil ak na pananisia, kanian siak so mansasalita,’ sikami met so mangaagamil na pananisia tan kanian sikami so mansasalita.” (2 Corinto 4:13) Diad ontan, sano mansasalita itayo nipaakar ed maong a balita na Dios, aagamilen tan papabiskegen tayo so pananisia tayo.

Si Magdalena, ya apatiran taon a walad panangipangawan a kampo legan na komaduan guerra mundial, so angisalaysay ed kablian na kimey na panagpulong: “Imbangat ed siak na inak a pian napansiansiak a mabiskeg so pananisiak, kaukolan a panpagaan tayo so nipaakar ed espiritual a kabunigasan na arum. Nanonotan ko ni sakey ya inkagawa a mangiyiilustra ed liknaan mi ed saya. Kayari inkibulos mi manlapud panangipangawan a kampo ed Ravensbrück, sikamin san-ina so akasabi’d abung na Biernes. Kalabas na duay agew, nen Simba, akiulop kami ed agagi ed panagkabkaabungan a kimey. Sipepekder kon sisiaen a no iyapasakey mi itulong ed arum a manmatalek ed sipasipan na Dios et saraman met lanlamang a sipan so magmaliw a lalon peteg ed sikami.”​—Ikompara so Gawa 5:42.

Say pamasiansian malet ed kompiyansa tayo anggad anggaan et kakaukolanen toy espiritual a kimey ed arum niran lawak. Say personal a panagaral so sananey nin ekselentin panamabiskeg ed pananisian ehersisyo. No aligen tayoray taga Berea tan sikukulin usisaen so Kasulatan ya inagew-agew, satan so ontulong ed sikatayon “nawalaan na sigpot a panamaseguro ed ilalo anggad anggaan.” (Hebreos 6:11; Gawa 17:11) Tua, say personal a panagaral et kakaukolanen toy panaon tan determinasyon. Posibli, satan so rason no akin a pinasakbayan nen Pablo iray taga Hebreo nipaakar ed kapeligroan ed pagmaliw a “bontog,” odino mangiras, ed saratan a pamaakaran.​—Hebreos 6:12.

Say mangirangiras ya awawey so walaan na saray makapadesyang a pansumpalan ed dakel ya aspeto ed bilay na sakey. Naimano nen Solomon a “diad ag-ikiwas na limalima et onturo so abung.” (Eclesiastes 10:18) Agmanbayag et ontedter so uran ed tarong ya agnakukumponi. No paulyanan tayon ag-onkiwas iray lima tayo ed espiritual a paraan tan agtayo asikasoen so pananisia tayo, onseksek iray panduaruwaan. Diad biek a dapag, say regular a panagdalepdep tan panaral ed Salita na Dios so managano tan manalimbeng ed pananisia tayo.​—Salmo 1:2, 3.

Panamaalagey na Talek Diad Eksperiensia

Siempre, naaralan na piloto a napanmatalkan iray instrumento to ed panamegley na eksperiensia ontan met diad panagaral. Ontan met, ombulaslas so kompiyansa tayo ed si Jehova sano nanenengneng tayo ed dilin bilay tayo so ebidensya na maaron panagtalima to. Naeksperiensia itan nen Josue, tan pinanonotan toray kapara ton Israelita: “Kabaten yon maong ed amin a kapusoan yo tan ed amin a kamarerwa yo ya anggapoy anggan sakey a salita ed amin na maong salita a sinalita nen Jehova a Dios yo a sinmaew. Amin da iratan so tinmua parad sikayo.”​—Josue 23:14.

Mipadparan leksion so naaralan nen Josefina, walaay asawan agin biin taga Pilipinas. Oniay insalaysay to no antoy bilay to sakbay a naamtaan toy katuaan: “Datin say masiken ko so mainum, tan sano sikatoy nabuanges, onsasanok tan kakabilen toak. Say agmaliket a panamaley mi so mangaapekta ed anak min laki. Sikamin sanasawa so namparan mantratrabaho, a maong so anapan mi, balet ta ngalngali mi isugal ya amin so nalmoan mi. Dakel so kaaro na masiken ko, ingen maslak ed sikara so mikakaaro ed sikato lapu labat ta paibayaran ira ed inumen da, tan sinali ni ingen na arum a painumen pian sikatoy panelekan.

“Anguman iray bengatla sanen akabatan mi si Jehova tan impapuso so konseho to. Agla uniinum so masiken ko, intunda mi la so panagsugal, tan awalaan kami na tuan kakaaron mangaaro tan ontutulong ed sikami. Say panamaley mi so maliket la, tan say anak mi so ombabaleg a sakey a maabig a balolaki. Mas daiset so oras na pantrabaho mi, balet ta mas dakel so kuarta mi. Binangatan kami na eksperiensian si Jehova so singa sakey a maaron Ama, a lawas mangitotonton ed sikami ed suston direksyon.”

Bilang resulta na niradyo iran instruksion odino pantsek ed instrumento, no maminsan et namoria na saray piloto a kaukolan dan korehien so kurang da. Ontan to met a sikatayo so kaukolan a manguman ed direksyon tayo unong ed instruksion nen Jehova. “Saray dilin kalayagan yo so makadngel na sakey a salita ed beneg yo a mangibabagan: ‘Saya so dalan. Manakar ed satan, sikayon totoo,’ no bilang ta sikayon totoo so onlad kawanan odino bilang ta sikayon totoo so onlad kawigi.” (Isaias 30:21) Diad panamegley na Salita to tan organisasyon to, naawat tayo so konsehon mangaalerto ed sikatayo ed saray espiritual a kapeligroan. Sakey ed saraya et nipaakar ed panlilimog.

Saray Panlilimog so Makapangisuawi ed Sikatayo

Say sakey a melag ya eroplano so mainomay a nipalir ed kurang to no agnagawa iray kakaukolanen a korehien. Ontan met, saray impluensya ed paway so naynay a manadapmeg ed Kristianos natan. Manbibilay tayo ed sakey a mundon sinononot-ed-makalaman a ditan et dakel so manluludlurey ed espiritual iran kablian, a lalon nisisiglaot day inkasikara ed lalon kaimportantian ed kuarta tan ed likeliket. Pinasakbayan nen Pablo si Timoteo a diad kaunoran iran agew et “mairap a pidenengan.” (2 Timoteo 3:1-5) Saray tinedyer, a kaliktanen da so panangaksobi tan inkapopular, so nagkalalon mainomay ya onsuko ed mauges iran panlilimog.​—2 Timoteo 2:22.

Si Amanda, a manedad na 17, so angisalaysay: “Walay panaon a say pananisiak so linmetey diad sakey a sukat lapud saray kaklasek. Naynay dan ibabagan say relihyon ko so ontanlan mapeget tan agmakatunongan, tan saya so ginmapon anismaya ed siak. Balet ta siak so tinulongan na atateng ko a talosan iray Kristianon panangigiya a manprotekta imbes a mameget. Natan et amoriak a sarayan prinsipyo so ontutulong ed siak pian nawalan na lalon makapenek a bilay imbes a saramay kien na datin kalimog ko ed eskuelaan. Naaralan koy manmatalek ed saramay talagan mapaga parad say siak​—saray atateng ko tan si Jehova​—tan panggagayagaan ko natan so panagpayunir.”

Balanglan sikatayo so matatken odino ugaw ni, amin tayo so makaabet na totoon mangibalikas na makapadismaya ed saray sisiaen tayo. Ompatnag a dakel so amta ra, balet diad Dios et sikaray pisikal tan agmaespiritual. (1 Corinto 2:14) Sakey a maimpluensyan grupo diad Corinto ed agew nen Pablo so minumundon-makabat ya Skeptics. Saray bangat na sarayan pilosopo so maseguron angitonton ed pigaran Kristianon taga Corinto a nabalang so pananisia ed ilalo na kioli. (1 Corinto 15:12) “Agpaibabalang,” impasakbay nen apostol Pablo. “Say mauges iran panlilimog deralen da iray mausar ya ugali.”​—1 Corinto 15:33.

Diad biek a dapag, say maong a panlilimog so mamapabiskeg ed sikatayo diad espiritual a paraan. Diad loob na Kristianon kongregasyon, walaan tayo na pankanawnawan midipongdipong ed totoon manbibilay ya atekepay pananisia. Si Norman, sakey ya agin laki ya akapanaral na katuaan nen 1939 ni, so siansian lapuan na baleg a panamaseseg ed amin. Anto so amasiansian mabiskeg ed espiritual a panmoria to? “Saray miting tan maapit a pikakaaro ed matoor ya agagi so makana,” inyebat to. “Sayan nengneng na panlilimog so tinmulong ed siak pian malinew a nanengneng so pandiperensyaan na organisasyon na Dios ed si Satanas.”

Say Makapalikdo a Pakayari na Kaykayamanan

Si Brian, sakey ya eksperiensiadon piloto, so angisalaysay a “say sakey a piloto so no maminsan et nairapan a manisia ed saray instrumento to​—lapud ta mikontraan so kasiporan a liknaan to. Saray eksperiensiadon piloto ed militar so kabkabat lapud pakatekkiab dan pausdong lapud saray liwawa ed leksab et singa bitewen labat ed sikara​—anggaman saray instrumento ra so mangibabaga ed sikara na kasunian to.”

Mipadpara, say sinisiblet a kasiporan tayo so mangibalang ed sikatayo ed espiritual a sentido tayo. Inkuan nen Jesus a saray kayamanan so walaan na “makapalikdon pakayari,” tan impasakbay nen Pablo a ‘say panangaro ed kuarta so angiyarawi ed dakel manlapud pananisia.’​—Marcos 4:19; 1 Timoteo 6:10.

Singa makapalikdon kirlap na liwaliwa, mansyayap a materyalistikon kalat so makapangituro ed lingon direksyon. Imbes a panliketan a say “paniilaloan ed bengabengatlan iilaloan,” sikatayo so nisuawi diad panangiparayag na mundon onlalabas. (Hebreos 11:1; 1 Juan 2:16, 17) No sikatayo so “determinado” a nawalaan na mayaman ya istiloy-kabibilay, maseguron sikatayo so nawalaan na samet a panaon a natitilak parad espiritual ya ibubulaslas.​—1 Timoteo 6:9; Mateo 6:24; Hebreos 13:5.

Sakey a malangwer ya asawan lakin manngaran na Patrick so angaksobi a sikaran sanasawa so angisakripisyo ed espiritual a kalat nisesengeg ed panliket ed magmaong ya estandarte na kabibilay. Insalaysay to: “Sikami naimpluensyaan na saramay walaay mablin auto ed loob na kongregasyon tan luho ed ayaman. Anggaman ontan, agmi nababalang so pakanengneng ed ilalo ed Panarian, liknaen mi a komportabli istiloy kabibilay. Anggaman, namomoria min say tuan liket so manlalapud panlingkor ed si Jehova tan diad ibulaslas ed espiritual. Natan say bilay mi so nagmaliw a simpli lamet. Kinesayan mi iray oras na trabaho mi, tan sikami so nagmaliw a regular payunir.”

Mandedependi Pananisia ed Maaksobin Puso

Say maaksobin puso so walaan met na importantin betang ed pamabaleg na kompiyansa ed si Jehova. Tua, “say pananisia so maseguron panilalo ed bengabengatlan iilaloan, say kapatnagan na demostrasyon [odino, “manangumbensin ebidensya,” paimano’d-leksab] na saray kapetegan anggaman agni anengneng.” (Hebreos 11:1) Balet anggad anggapo so maaksobin puso, satan so maseguron agmangumbensi ed sikatayo. (Uliran 18:15; Mateo 5:6) Lapud sayan rason ya inkuan nen apostol Pablo a “say pananisia so sakey ya agkayarian na amin a totoo.”​—2 Tesalonica 3:2.

Panon sirin, a napansiansia tayoy kapusoan tayon maaksobi ed amin a niwalan makakumbensin ebidensya? Diad pamayubo na maridios a kualidades, kualidades a mamayaman tan managyat na pananisia. Papasesegen itayo nen Pedro ya ‘ipano ed pananisia tayo so birtud, pikakabat, dangka, panagsungdo, maridios a debosyon, inaagin panamabli, tan aro.’ (2 Pedro 1:5-7; Galacia 5:22, 23) Diad biek a dapag, no say panagbilay tayo et dilin-nisentro odino mangisasaklang na paspasaray a serbisyo ed si Jehova, agtayo makatunongan a makapanilalon say pananisia tayo et ombulaslas.

“Imparaan [nen Esdras] so puso to” a basaen so Salita nen Jehova tan agamilen itan. (Esdras 7:10) Ontan met si Miqueas so walaan na maaksobin puso. “No nipaakar ed siak, si Jehova so lawas a bantagen ko. Ipanengneng ko so maalagar ya awawey parad say Dios na kilalaban ko. Dengelen ak na Dios ko.”​—Miqueas 7:7.

Si Magdalena, ya inaon ed akadkauna, so siaanos a manaalagar met ed si Jehova. (Habacuc 2:3) Inkuanto: “Walaan tayo la na espiritual a paraiso. Say ontumbok et say pisikal a Paraiso so onsabi ed kagkanepegan to. Ambegya nilasus nilibo so miuulop ed baleg ya ulop. Panliliketan ko so pakanengneng ed ontan a kinarakel ya onduduypo ed organisasyon na Dios.”

Onnengneng ed Dios na Kilalaban Tayo

Say panmantini ed kompiyansa tayon malet anggad anggaan et kakaukolanen toy pangagamil na pananisia tayo tan siaalwar ya italineng ed panangigiyan naawat tayo manlapud si Jehova tan ed organisasyon to. Maseguron walaan itan na makana a sagpot. Nalikna na piloto so inkapnek sano kayari na andukey, mairap a biahe et ondapo tan diad kaunoran et nalabasan to so makapal iran lurem. Ditan et wadtan so dalin​—berde tan mangaabrasa. Say airport so walad leksab, a manaalagar a mangaksobi ed sikato.

Tatalaranan itayo met na sakey a makapasagyat ya eksperiensia. Sayan mauddiem, marelmeng a mundo so mangipalugar ed balon mundo na inkatunong. Sakey a madibinon panangabrasa so manatalaran ed sikatayo. Makasabi tayo ditan no talinengen tayoray salita na salmista: “Sika so ilalok, O Soberanon Katawan a Jehova, say kompiyansak manlapud inkatobonbalok. . . . Sika so lawas ya idayew ko.”​—Salmo 71:5, 6.