Legal ya Itatalona

NEN Abril na 1995, sakey a makatantandan impanbiktorya ed korte so analoan. Ginmapo itan nen Enero 28, 1992, sanen inadmiti ed El Buen Pastor Hospital diad Puerto Rico si Luz Nereida Acevedo Quiles, 24, parad elective surgery. Diad kaadmiti to, insangi tan insulat ya imbalikas to a bilang sakey ed Tastasi nen Jehova et agto labay ya awaten so panangiyalis na dala. (Gawa 15:28, 29) Saray nalalanor a personahe na ospital, pati say doktor ya anambal ed sikato, so makaamtan tuloy ed saray kaliktan to.

Duaran agew kayari na operasyon, dakel a dala so naandi ed si Luz tan apalesay graben anemia lapud impandala. Sisiaen na mangaasikason doktor, si Dr. José Rodríguez Rodríguez, a say mogmon tulong a nipakurang et say panangiyalis na dala. Kanian, anggapoy pikakabat odino piabobon nen Luz, say doktor so kinmerew na court order pian niwalay panangiyalis ed si Luz.

Anggaman si Luz so sigpot a makaamta tan sarag toy mansalita parad inkasikato, impilit nen Dr. Rodríguez Rodríguez a lapud inkaganatan na kaso et anggapo lay panaon pian laey pangabobon na siopaman. Say abogadoy distrito, si Eduardo Pérez Soto, so nampirma ed papel, tan say huis na distrito, say Kagalanggalang ya Ángel Luis Rodríguez Ramos, so angipaakseb na court order parad panangiyalis na dala.

Kanian, nen Enero 31, 1992, si Luz so inawit ed panag-operaan, a ditan niyalisan. Legan na say panangiyalis, nadngel toy paneelekan na pigaran personahe ospital. Arum so mamapasnok ed sikato, ya ibabagan say gagawaen da et parad pankaabigan to. Sikatoy akipuligesgesan anggad pakasarag to​—amin ed diad kaapaan. Diad sampot na agew, akaawat si Luz na apatiran yunit na dala.

Say kaso nen Luz so aliwan sankaunaan nisay kaunoran a manasaglawi ed saray panangiyalis na dala tan Tastasi nen Jehova diad Puerto Rico. Sakbay na eksperiensia to, ag-onkulang a 15 court order so nipaakseb parad saray panangiyalis na dala sumpad kaliktan na saray wala la’d edad a Tastasi nen Jehova, tan dakel ni nipaakseb nanlapulad satan. Makapaermen, diad sakey a kaso say court order so nipakurang, tan say panangiyalis na dala so nipuersa ed sakey a pasyenti legan a lanang so liknaan to.

Balet say pilalaban nen Luz so ag-anampot diad panag-operaan. Nen Oktubre 1993 sakey a kaso so nisampa sumpad Commonwealth na Puerto Rico. Say kaso so dinengel na Superior Court, tan nen Abril 18, 1995, adesisyonan a pabor ed sikato. Inkuan na korte a say ganggan a panangiyalis na dala so “aliwan unong ed konstitusyon tan angekal ed nandemanda na kanepegan to a mangagamil na kawayangan ed relihyon, say panbukbukor tan dilin-determinasyon parad laman ya anggapo’d ley.”

Sayan desisyon so makatantanda, ta satan so sankaunaan a say korte na Puerto Rico so nandesisyon a pabor ed Tastasi nen Jehova diad kason nipaakar ed panangiyalis na dala. Say desisyon so awalaan na abalbaleg a reaksion. Sakey ya impanaarapan na saray peryodista so agawa, a kaiba iray dyurnalista na saray manunan dyaryo, radyo, tan telebisyon.

Diad satan met lanlamang a labi sakey a programa ed radyo so nadngel ya ininterbio so sakey ed abogado nen Luz. Naimbitaan iray dumerengel a mantelepono pian ontepet. Dakel a doktor tan abogado so tinmawag tan angibalikas na paborablin reaksion ed kaso. Sakey a tinmawag so nankuan: “Agnaseguro na siensia a say panangiyalis na dala so makasalba na bilay, tan lingo so panisip a nagawaan to itan.” Inkuanto met: “Agmabayag, saray panangiyalis na dala so nirekord ed awaran bilang sakey ed sankabalgan iran insaew tan lingo ed modernon medisina.”

Sakey a dederlengen a propesor ed ley so diad saginonor et tinmawag ed sangan opisina na Watch Tower Society pian ibalikas so inkapnek to ed tinawag ton “abalbaleg ya impanbiktorya.” Inyarum to ni a say desisyon na korte so manasalimbeng ed saray kanepegan unong ed konstitusyon, ya aliwa lambengat parad Tastasi nen Jehova, noagta ed amin a mibabaley na Puerto Rico.