Say Paboriton Panagkantaan nen Irina

AGNI abayag, abautismoan bilang sakey ed Tastasi nen Jehova si Irina, sakey a mantaon na siamera a biin taga Sofia, Bulgaria. Labalabay toy mankansion tan nagkalautla et panggagayagaan toray kanta ed libron Sing Praises to Jehovah. Kanian ginawan kalat nen Irina a mangipatlep na pigaran kanta ed kada bulan.

Say musika so sakey ed saray asignatura ed eskuelaan a paborito nen Irina. Kanian nikelawan so maestra ed musika sanen inkaindan nen Irina so opresi ed sikaton mankansion a kaiba so koro ed eskuelaan. Akin ya aglabay nen Irina? Amoria ton maslak ed saray kantan ipakansion ed sikato so mangitandoro ed saray nasyonal a bayani tan piespiesta a walaay paganon gapoan. Pigara ed kanta so mangirerekomenda ni ingen ed rebelyon tan karawalan pian iyalibansa iray nasyonal a getma. Agnatalosan na maestra so panmoria nen Irina ed sayan pamaakaran. Kinaukolan a si Irina so mansulat ed maestra to pian isalaysay iray relihyoson kombiksyon to​—balet ta anggapoy agawaan to.

Walay anonotan na ama nen Irina. Inikdan to so maestra na sakey a kopya na libron Sing Praises to Jehovah, a mankarga na saray kantan labalabay a kantaen nen Irina. Kalabas na pigaran agew, impatawag si Irina na maestra to ed loob na kuarton panmusika. Kinerew to ed si Irina a mankansion na pigara ed paboriton kansion a nanlapud libro​—diad arap na saray kaklase to​—bangta manpiapiano so maestra. Say panagpalabas so nambayag na masulok a sakey oras! Inadmiti na maestra a say paboriton panagkantaan nen Irina so walaan na mararakep a melodya.