Imanoen! Sakey a Kingdom Hall ed Niue
SAY Niue so sakey a melag a coral ya isla diad South Pacific, a walaay kaarawin 2,160 a kilometro ed mamaamianen-bukig na New Zealand. Unong ed brosyur ed panagbaroy, say ngaran a Niue so nanlapud duaran salita, Niu, a kabaliksan toy “kiew na niyog,” tan e, a kabaliksan toy “nengnengen,” odino “imanoen.” Oniay ibabaga na brosyur: “Unong ed tongtong, saray inmunan Polynesian a nanayam so angibalikas ed sarayan salita diad insabi ra diad impakanengneng da ed saray niyog a tinmutubo ed dalin.”
Natan et ikikinon na Tastasi nen Jehova ed Niue ya ikuan ed saray bisita, “E! Fale he Kautu ha mautolu!” kabaliksan toy, “Imanoen! Say Kingdom Hall Mi!” Akin a walaan ira na aralem a liknaan nipaakar ed sayan hall? Ikikinon na Tastasi nen Jehova ed inerman iray Kingdom Hall da, nagkalalo la no sikaran mismo so nampaalagey. Balet say pampaalagey na Kingdom Hall diad nisulinek ya isla ed pegley na maawang a South Pacific so sakey nin baleg a pamaakaran. Anggaman kuan, say Niue so mangokobri labat na 260 a kudrado kilometro, tan wala lambengat so 2,300 a totoo ed interon isla.
Say problema et no siopa so mangipaalagey ed Kingdom Hall. Say saksakey a kongregasyon ed Niue so walaan lambengat na 32 a Tastasi. Amin a manunan uusaren a nakaukolan, a singa saray trak, bulldozer, tan crane, so kayarian na gobierno. Niarum ni, ngalngali amin a makanan panagpaalagey a materyales—balatyang, concrete block, iyaatep, materyales a parad elektrik tan plumbing, kagawaan ed sound, tan saray yurongan—nepeg a nipatulor manlapud New Zealand ed luluganan ya onbiabiahe a maminsan lambengat ed kada limaran simba. Kaunoran, say mabaton dalin na isla so manggawan mairap so panagpaalagey, tan say hall so nepeg a nipaalagey a natalindegan to iray alimbusabos ed tropiko. On, sakey a baleg a kimey parad siopaman!
Anggaman ontan, wala so baleg a duma dia. Parad Tastasi nen Jehova, say Kingdom Hall so pinagkasentro na tuan panagdayew ed lokal, tan maniilalo ira ed si Jehova a Dios parad panangiwanwan tan tulong. (Salmo 56:11; 127:1) Saray Kristianon agagi ed New Zealand, pati saray membro na taga Niue a kongregasyon ed Auckland, so tinmulong ed melag a grupo na Tastasi diad Niue, ya interon-puson anuporta ed say panagpaalagey a proyekto.
Say Desisyon et Igapo
Nen Hulyo 1994 diad pampapaalageyan na Kingdom Hall ed Rotorua, New Zealand, sakey ya imbitasyon so impawit parad saramay interesadon mibiang diad proyekto ed Niue. Pankelkelawan, 200 a Kristianon agagin lalaki tan bibii so nanboluntaryo. Diad saraya, 80 a totoo so pinili, pati saray karpentero, managtrabahoy balatyang, tubero, manag-atep, latero, pintor, elektrisyan, sound equipment technician, kantero, managpeket na laryo, tan saray pion.
Nanplano iray agagi tan inmabante, a manmamatalek ed si Jehova. Sakey ed duaran mamatatken ed kongregasyon ed Niue, a negosyante diman, so angigapo ed saray uksoyan parad pakaulor na amin a nakaukolan a materyales. Sakey ya espisyal a bayar parad pan-eroplano tan pampundoan so niyareglo parad saray trabahador a taga biek-taew, a nanboluntaryon akauley la’rad dilin gastos da, diad ontan et niletneg so petsa na panagpaalagey. Kaukolan a nasumpal so proyekto ed loob na 20 ya agew, manlapud Marso 4 ya anggad Marso 23, 1995, sano say Kingdom Hall so idedika.
“Saya so inmunan eksperiensian impakaaburidok a maong sanen anengneng koy pasen,” so inkuan na direktor na proyekto, a sakey simban akauna a nanlapud New Zealand pian iyareglo so amin a bengatla. “Baton amin so dalin. Sabien toy duaran simba so pankokot ed saray pundasyon lambengat.” Ingen diad saginonor et inako ton aleglemew to iray Tastasi diman. “Saray agagi ed Niue so mikabisado ed saray bato,” so inkuanto. “Kabat da no iner so paniraan ed saray bato pian ankabaleg so nageray.” Saray pundasyon so sinumpal ed loob na duaran agew!
Nen Marso 4 sinmabi so inmunan nan-eroplanon Tastasi ed New Zealand, tan say trabaho na kantero so asumpal. Nantutumbokan a sinmasabi iray grupo na trabahador, nanduruman inkiapag na proyekto so asumpal. Onggapo so pantrabaho ed 7:00 n.k. diad antikey a diskusyon ed inagew-agew a teksto ed Biblia. Arum ya agagi so nantrabahon 12-oras iran agew ed kapetang a 36 degrees Celcius. Kaunoran, nen Marso 23, say sular so pinarakep. Say makapasagyat a karatula a ginawa ed tablay mangga so angipabidbir ed paalagey a bilang say “Kingdom Hall of Jehovah’s Witnesses.”
Say Espiritu na Pikokoopera tan Panagparawes
Say sakey a makanan sengegan a tinmulong ed intalona na proyekto et say pikokoopera na totoo ed Niue. Lapud saray manaayam diman so asagyat ed espiritu na okasyon, angidonar ira na tagano tan kuarta. Dakel so nanmorian proyekto ra so impangipaalagey na hall. Saray opisyal na gobierno tan saray negosyante so tinmulong nen say inilaloan. Niwala so nakaukolan ya uusaren, a singa met ed paktoryay tabla. Sinananey na managpatulor a kompanya so rota na barko to pian naseguro a say nakaukolan a materyales so onsabi ed suston panaon.
Saray bisita so talagan angapresya ed impasyan trabaho tan panagparawes na Tastasi ed Niue, ya anginabang ed saray ayaman tan kayarian da. “Saray agagin bibii diman so pandinayewan,” inkuan na sakey a trabahador ed panagpaalagey. Niarum ni ed ampetang ya ugto ed balang agew, saray agagin bibii so nanserbi aluton almusal ed kada kabuasan ed 6:30. Arum so binmangon na 4:30 n.k. pian iparaan so tagano. Inkuan na sakey a trabahador ed panagpaalagey: “Iisipen kon mas maong so kabibilay mi dia ed Niue nen say diad dilin ayaman mi.”
Nen Marso 10 inreport na Niue Star so agawa ed arap-pahinan istorya a walaan na manunan paulo “Say Inmunan Kingdom Hall ed Niue” tan sakey a litrato na saray taga New Zealand tan saray taga Niue a mantratrabaho ed pasen. Nidalatdat a say hall so walaan na 280 metro kudrado ed kaawang tan mankarga na 70 ya anggad 100 a totoo. Inyarum na artikulo: “Say kimey so diad tua et nasumpal ed loob na duaran [simba], ingen diad sayan kipapasen et ninatnat ni. Angga ni ed saya, duaran agew labat kayarin nigapoy trabaho, say pundasyon, saray taglang, andamyo tan atep so nipaalagey, ya akauna la’d eskedyul.”
Sakey a negosyante diman so angibalikas ed pankaliktan ya amin ed Isla na Niue so manimano ed proyekto tan makaaral na leksion manlapud satan. Inkuanto ya iilaloan ton mangipanengneng itan ed balang sakey ed no anto so nagawaan tekep na aro tan pikokoopera.
Sakey ya ulop na 204 so linma ed dedikasyon. Say apaneknekan a talagan manamakiwas ya eksperiensia parad amin ya inmatendi et say espisyal a presentasyon na panangipaalagey ed Kingdom Hall na agagin taga Niue a lalaki, bibii, tan ugugaw ya impanengneng da itan ed kanta tan sayaw. Saray balikas na pisasalamat so nipasabi ed saray tugyop na nampaalagey tan ed si Jehova, a say espiritu to so amakiwas ed saray kanonotan, kapusoan, tan kalimaan pian nasumpal so kimey.—Isaias 40:28-31.