Say Sankabalgan a Toon Nambilay ed Kapiganman

Kapitulo 132

Diad Nikawanan na Dios

Say panangikalbo na masanton espiritu diad Pentecostes so ebidensya a si Jesus so akapawil la ed tawen. Say pasingawey ya inter ag-abayag kayari to ed babangatan ya Esteban so amaneknek met a Sikato so akasabi la diman. Sakbay a tuloy na inkatupak to lapud matoor a panagtasi to, inkelyaw nen Esteban: “Nia! Anengneng kon say katawenan so alukasan tan say Anak na too so manalalagey diad nikawanan na Dios.”

Legan a walad nikawanan na Dios, aalagaren nen Jesus so ganggan manlapud Ama to: “Onla kan manuley diad utel na kakabusol mo.” Balet diad kaleganan to, anggad agto ikiwas sumpad kakabusol to, anto so gagawaen nen Jesus? Sikato so manuuley, odino manaari, ed saray alanaan a babangatan to, ya iwawanwan ira ed aktibidad dan panagpulong tan ipaparaan iran magmaliw a, diad panamegley na kioli, kaiba ton arari ed Panarian na Ama to.

Alimbawa, pinili nen Jesus si Saulo (saginonor et mas akabkabat diad Romanon ngaran to, a Pablo) pian idaulo so panaggaway-babangatan a kimey ed arum a daldalin. Si Saulo so maseseg ed Ganggan na Dios, balet ta sikatoy sililingon inwanwan na Judion relihyoson papangulo. Bilang resulta, aliwa lambengat ya inabobonan nen Saulo so pamatey ed si Esteban noagta sikatoy linma ed Damasco tekep na panangiyabuloy na atagey a saserdoten si Caifas pian ipawil ed Jerusalem so siopaman a naareston lalaki tan bibiin naromog ton papatumbok nen Jesus. Anggaman ontan, legan a walad dalan si Saulo, sakey a masnag a liwawa so biglan sinmindag ed arap to tan sikatoy alokbob.

“Saulo, Saulo, akin et papasegsegangen moak?” tepet na sakey a boses manlapud agnanengneng a lapuan. “Siopa ka, Katawan?” tepet nen Saulo.

“Siak si Jesus, a papasegsegangen mo,” so ebat.

Binagaan nen Jesus si Saulo, a binulag na mamilagron liwawa, ya onloob ed Damasco pian manalagar ed bili-bilin to. Insan, inmapireng diad pasingawey si Jesus ed si Ananias, a sakey ed saray babangatan to. Nipaakar ed si Saulo, imbaga nen Jesus ed si Ananias: “Sayan too so sakey a pinilin baseha pian mangakbibit na ngaran ko ed saray nasyon ontan met ed arari tan saray anak a lalaki na Israel.”

Peteg, diad pananulong nen Jesus, si Saulo (a kabkabat natan bilang Pablo) tan arum niran manag-ebanghelyo so matalonan tuloy ed kimey dan panagpulong tan panagbangat. Diad tua, ngalngali 25 taon kayari inyapireng nen Jesus ed sikato ed dalan a paarap ed Damasco, insulat nen Pablo a say “maong a balita” so “nipulong la ed amin a pinalsa ed silong na tawen.”

Kayari inlabas na dakel nin tao-taon, si Jesus so angitarok na serye na saray pasingawey ed inad-aro ton apostol, si Juan. Diad panamegley na sarayan pasingawey a dedeskribien nen Juan ed libroy Biblia ya Apocalipsis, a sikato, diad tua et nambilay ni pian tasian so ipapawil nen Jesus ed Panarian tekep na pakayari. Ibabaga nen Juan a “diad inkapuyanan” et sikato so niyabante la’d panaon na “say agew na Katawan.” Anto iyan “agew”?

Say maalwar a panagaral ed saray propesiya na Biblia, pati ed dilin propesiya nen Jesus nipaakar ed kaunoran iran agew, so mangipaparungtal a “say agew na Katawan” so ginmapo ed maawaran a taon 1914, on, diad loob na sayan kailalakan! Kanian nen 1914 a si Jesus so pinmawil ya agnanengneng, anggapoy mapublikon panangiyanunsyo tan mogmon saray matoor ya aripen to so akaamta ed ipapawil to. Diad saman a taon et inter nen Jehova ed si Jesus so ganggan a manuley diad utel na kakabusol to!

Diad itutulok ed ganggan na Ama to, diad katawenan et pinagit nen Jesus si Satanas tan saray demonyo to, ya imbasileng ira ed dalin. Kayarin anengneng iyan agawa diad pasingawey, akarengel si Juan na sakey a mangatatawen a boses ya angiyabawag: “Natan et sinmabin siansia so kililiktar tan say pakayari tan say panarian na Dios tayo tan say autoridad na Kristo to!” On, nen 1914 et ginmapon manuley si Kristo bilang Ari!

Agaylan maong a balita iya parad saray managdayew nen Jehova ed tawen! Sikara so papasesegen: “Manliket kayo, sikayon katawenan tan sikayo a manaayam ed saratan!” Balet anto so kipapasen parad saramay wala ed dalin? “Kasi lay dalin tan say dayat,” so intuloy ni na boses a nanlapud tawen, “lapud say Diablo so inmakseb ed sikayo, a walaan na baleg a sanok, diad pakaamtan sikatoy walaan na antikey lan panat na panaon.”

Sikatayo so wala la natan ed satan ya antikey a panat na panaon. Saray totoo so kaplesan a nibibiig balanglan onloob ed balon mundo na Dios odino managmak na kadederal. Say katuaan to et say pansumpalan yo so nadedetermina la natan base’d ikikiwas yo ed maong a balita na Panariay Dios a nipupulong ed sankamundoan diad silong na panangidirehi nen Kristo.

Sano asumpal la so panangibiig ed totoo, si Jesu-Kristo so manserbi bilang Ahenti na Dios pian pagiten ed dalin so interon sistema na bengabengatla nen Satanas tan amin iraman so manusuporta ed satan. Gawaen nen Jesus iyan panamagit ed amin a karelmengan ed bakal a tatawagen ed Biblia a Har–​Magedon, odino Armagedon. Kayari to, si Jesus, say sankabalgan a Persona ed sankatalbaan ya ontumbok ed si Jehova a Dios a mismo, so mangerel ed si Satanas tan saray demonyo to tan baloren ira ed loob na sanlibon taon ed “kaaralman,” salanti, sakey a singa-inatey a kipapasen. Gawa 7:55-60; 8:1-3; 9:1-19; 16:6-10; Salmo 110:1, 2; Hebreos 10:12, 13; 1 Pedro 3:22; Lucas 22:28-30; Colosas 1:13, 23; Apocalipsis 1:1, 10; 12:7-12; 16:14-16; 20:1-3; Mateo 24:14; 25:31-33.​—NW.

▪ Kayari insegep nen Jesus ed tawen, iner so kawalaan to, tan anto so aalagaren to?

▪ Siopara so panuuleyan nen Jesus kayari insegep ed tawen, tan panon a niparungtal so betang to?

▪ Kapigan so inggapo na “say agew na Katawan,” tan anto so agawa diad inggapo to?

▪ Anton panangibiig a kimey a nagagawa natan so personal a mangaapekta ed kada sakey ed sikatayo, tan diad anton basiyan a gagawaen so panangibiig?

▪ Sano say panangibiig a kimey so asumpal la, antoran ebento so ontumbok?