Say Sankabalgan a Toon Nambilay ed Kapiganman

Kapitulo 131

Pinal Iran Iyaapireng, tan Pentecostes 33 K.P.

Inyareglo nen Jesus a minengnengan so amin a 11 ya apostol to ed sikato diad sakey a palandey ed Galilea. Saray arum a babangatan so mapatnag a pinasantabian nipaakar ed sayan pantitipon, tan masulok a 500 totoo so nandaragup. Agaylan makapaliket iyan kumbension sanen inmapireng tan ginmapon nambangat si Jesus ed sikara!

Arum ed dakel nin ginawgawa to et impaliwawa nen Jesus ed baleg ya ulop a sikatoy inikdan na Dios na amin ya autoridad ed tawen tan ed dalin. “Onla kayo sirin,” bilin to, “tan manggawa kayo na saray babangatan a totoo ed amin a nasyon, a bautismoan ira ed ngaran na Ama tan na Anak tan na masanton espiritu, a bangatan iran mangunor ed amin a bengatlan ingganggan ko ed sikayo.”

Isipen pa ’tan! Saray lalaki, bibii, tan ugugaw et inawat dan amin iyan parehon ganggan pian mibiang ed panaggaway-babangatan a kimey. Salien a patundaen na saray sumusumpa so panagpulong tan panagbangat da, balet ta sikaray niligliwa nen Jesus: “Nia! Siak so walad sikayo ed amin iran agew anggad konklusyon na sistema na bengabengatla.” Si Jesus so mansiasiansian kaiba na saray patumbok to diad panamegley na masanton espiritu, pian tulongan iran manumpal ed ministeryo ra.

Ami-amin, impanengneng nen Jesus so inkasikato a mabilay ed saray babangatan to ed loob na 40 agew kayari na inkioli to. Legan na sarayan panaon ya iyaapireng et sikaray binangatan to nipaakar ed Panariay Dios, tan indadanet toray responsabilidad da bilang babangatan to. Diad sakey ya inkagawa et sikato ni ingey inmapireng ed agi to’d ina a si Santiago tan kinumbensi iyan datin agmananisia a Sikaton talaga so Kristo.

Bangta wala ni’d Galilea iray apostol, mapatnag a sikaray binilin nen Jesus ya ompawil ed Jerusalem. Sanen akinengnengan ed sikara diman, inkuanto ed sikara: “Agkayo ompapaway ed Jerusalem, balet mantultuloy a manalagar ed insipan na Ama, a nipaakar ed satan et nadngel yo manlapud siak; lapud si Juan, so peteg, amautismo ed danum, balet sikayo so nabautismoan ed masanton espiritu agmanbayag manlapud natan.”

Saginonor et akinengnengan lamet si Jesus ed apostoles to tan inbasbas toran papaway ed syudad ya anggad Betania, a walad bandad bukig na nipugaron Palandey na saray Olibo. Makapakelaw, anggaman ed amin a bengatlan imbaga to nipaakar ed asingger lan iyaakar to’d tawen, siansian sisiaen dan say Panarian to so niletneg ed dalin. Kanian intepet da: “Katawan, kasin ipawil mo so panarian ed Israel diad sayan panaon?”

Imbes a salien to lamet a korihien so lingon panmoria ra, inyebat lambengat nen Jesus: “Aliwan parad sikayo pian amtaen iray panaon odino kapanaonan ya impasen na Ama ed dilin uley to.” Insan, indanet to lamet so kimey a nepeg dan gawaen, inkuanto: “Makaawat kayo na pakayari sano onsabi masanton espiritu ed sikayo, tan magmaliw kayon tastasik ed namparan diad Jerusalem tan ed interon Judea tan Samaria tan anggad sankasampotan a parti na dalin.”

Bangta sankanengneng da ni, si Jesus so ginmapon amaatagey a paarap ed tawen, tan insan sakey a lurem so sinmanib ed sikato ed pakanengneng da. Kayarin nilukpos toy kinon-toon laman to, sikatoy sinmegep ed tawen bilang espiritun persona. Legan na pantutultuloy ya inenengneng na 11 ed tawen, 2 lalaki ya akakawes na amputi so inmapireng ed abay da. Sarayan nankinon-toon anghel so tinmepet: “Lalakin taga Galilea, akin a sikayoy manalalagey ya akatangay ed tawen? Sayan Jesus ya inawat ed tawen manlapud sikayo so ompawil diad parehon paraan a singa impakanengneng yo ed sikato ya onsesegep ed tawen.”

Say paraan ya intaynan nen Jesus ed dalin et anggapoy mapublikon panangiyanunsyo tan mogmon saray matoor a patumbok to so akaimaton. Kanian sikatoy ompawil ed parehon paraan​—anggapoy mapublikon panangiyanunsyo tan mogmon saray matoor a patumbok to so makatebek a sikatoy pinmawil la tan ginmapo lay kiwawala to ed Panarian tekep na pakayari.

Saray apostol natan so linmeksab ed Palandey na saray Olibo, binmeltang ed Lawak na Kidron, tan linmoob lamet ira ed Jerusalem. Sikara so nansiansia diman bilang katutulok ed ganggan nen Jesus. Samploran agew ed saginonor, diad Judion Piesta na Pentecostes 33 K.P., legan a ngalngalin 120 na saray babangatan so mantitipon ed sakey a kuarto’d tagey ed Jerusalem, singa sakey a dalamurom na manbanesbes a dagem so biglan amano ed interon abung. Pinmatnag so dila-dilan singa apuy, tan dinmapo ed kada sakey ed saramay wadman, tan amin a babangatan so ginmapon nansalita na nanduruman lenguahe. Saya imay panangikalbo na masanton espiritun insipan nen Jesus! Mateo 28:16-20; Lucas 24:49-52; 1 Corinto 15:5-7; Gawa 1:3-15; 2:1-4.​—NW.

▪ Diad siopa so angiteran nen Jesus na manamatanir a bili-bilin diad sakey a palandey ed Galilea, tan anto irayan bilin?

▪ Anton ligliwa so intarok nen Jesus parad saray babangatan to, tan panon a sikatoy mansiansia ed sikara?

▪ Kaunongan kabayag kayari inkioli to a si Jesus so inmapireng ed saray babangatan to, tan anto so imbangat to ed sikara?

▪ Diad siopan too a mapatnag ya aliwan babangatan sakbay na ipapatey nen Jesus so nanpanengnengan nen Jesus?

▪ Anton duaran pinal a pinenengnengan nen Jesus ed saray apostol to, tan anto so agawa ed sarayan pankanawnawa?

▪ Panon a si Jesus so ompawil diad parehon paraan a singa nen itataynan to?

▪ Anto so agawa nen Pentecostes 33 K.P.?