Say Sankabalgan a Toon Nambilay ed Kapiganman

Kapitulo 126

“Petepeteg a Saya so Anak na Dios”

Agni abayag si Jesus ed palitek sanen, diad kapegleyay agew, sakey a misteryoso, taloy-oras-kabayag a bilunget so agawa. Aliwa iyan solar eclipse, ta saya so nagagawa lambengat diad panaon na balon bulan tan say bulan so tulaw diad panaon na Paskua. Niarum ni, ombabayag lambengat na pigaran minuto so solar eclipse. Kanian say bilunget so nanlapud madibinon lapuan! Anganko ta amareen itan ed saramay manluludlurey ed si Jesus, ya amatunda ni ingen ed saray lurey da.

No satan a makapatalagnaw ya inkagawa so agawa sakbay na impamaat na samay sakey a managgaway-kaugsan ed kaiba to tan inkerew a sikatoy nonoten nen Jesus, nayarin sakey itan a mangapekta ed pagbabawi to. Anganko ta legan na bilunget ya apatiran bibii, salanti, say ina nen Jesus tan say agi ton si Salome, Maria Magdalena, tan si Maria ya ina nen apostol Santiago a Memelag, so inmasingger ed panamairapan a palitek. Si Juan, say inararon apostol nen Jesus, so wadman a kaiba ra.

Agaylan say puso na ina nen Jesus so ‘singa duduyoken’ legan a babantayan toy anak ya inasikaso tan pinabaleg to ya akabitin diman ed mapalalon irap! Ingen say iisipen nen Jesus et aliwan say dilin ot-ot to, noagta say pankaabigan na ina to. Tekep na baleg a gunaet, sikatoy tinmangwa ed si Juan tan kuanto’d kinen ina to: “Bii, nengneng mo! Say anak mo!” Insan, diad itatangwa ed kawalaan nen Maria, inkuanto’d si Juan: “Nengneng mo! Say inam!”

Diad ontan et inmatalek nen Jesus so panangasikaso ed kinen ina to, a mapatnag a baló la natan, ed nikadkaduman naaron apostol to. Saya so ginawa to lapud arum ya ananak nen Maria so agni angipatnag na pananisia ed sikato. Kanian sikatoy angiletneg na maabig ya alimbawa ed pangiter na probisyon aliwa lambengat parad pisikal iran pankaukolan na ina to noagta ontan met parad espiritual iran pankaukolan to.

Diad ngalngali alas-tres na ngarem, inkuan nen Jesus: “Napgaan ak.” Alikas nen Jesus a say Ama to, a singa panangibaga et inekal to lay proteksion ed sikato pian nasubok anggad kasampotan so integridad to. Kanian inkelyaw to: “Dios ko, Dios ko, akin ya inkaindan mo ak?” Diad impakadngel ed saya, arum ed saramay manalalagey so nankuan: “Nengneng yo! Tatawagen to’y Elias.” Tamtampol a sakey ed sikara so binmatik tan, diad pangipapasen na espongha ya insawsaw ed pinaakseng ya alak ed sampot na sanga na isopo, angiter ed sikato na nainom. Balet inkuan na arum: “Paulyan yo! Nengnengen tayo no kasin onsabi si Elias pian sikatoy ileksab.”

Sanen naawat nen Jesus so pinaakseng ya alak, inkelyaw to: “Asumpal la!” On, asumpal toy amin a bengatlan angibakian nen Ama to ed dalin a kaukolan ton gawaen. Kaunoran, inkuanto: “Ama, diad saray limam imamatalek koy espirituk.” Diad ontan et imamatalek nen Jesus ed Dios so puersa-na-bilay to diad talek ya ipawil na Dios itan ed sikato lamet. Insan intewek toy ulo to tan inatey.

Diad bektan inlinawa nen Jesus so sampot a linawa to, sakey a maksil a yegyeg so agawa, ya amisag ed saray baton-dampay. Say yegyeg so ontanlan makapanyari a saray lobok a pakanodnonotan diad paway na Jerusalem so alukasan tan saray bangkay so nipaway ed saratan. Saray ondadalan ya akanengneng ed saratan a niparangtal a bangkay so linmoob ed syudad tan inreport itan.

Niarum ni, diad bektan impatey nen Jesus, say baleg a kurtina a mangeketeg ed Masanto manlapud Sankasantosan ed templo na Dios so apaldua, manlapud tagey anggad leksab. Mapatnag a sayan marakerakep a naartian a kurtina so nayarin 18 metro ed katagey tan ambelat a tuloy! Say makapakelaw a milagro so aglambengat mangipapanengneng ed sanok na Dios sumpad saray manamatey ed Anak To noagta mangipapanengneng a say dalan a paloob ed Sankasantosan, say mismon tawen, so natan et agawan posibli diad impatey nen Jesus.

Bueno, sanen alikas na totoo so yegyeg tan anengneng iray bengatlan nagagawa, sikara so atalagnaw a tuloy. Say manangidirihen opisyal na armada diad panamatey so angigloria ed Dios. “Petepeteg a saya so Anak na Dios,” inyabawag to. Maseguron sikatoy presenti sanen say ibabagan madibinon inkaanak so siningbat diad panangusay ed si Jesus ed arap nen Pilato. Tan natan et sikatoy akumbinsin si Jesus et Anak na Dios, on, a sikato so peteg a sankabalgan a toon nambilay ed kapiganman.

Arum met so atalonaan na sarayan mamilagron inkagawa, tan sikaray anempet a manatabiog ed saray pagew da bilang andawes na mapalalon ermen tan kababaingan da. Arawdawin mangiimaton ed nenengnengen et saray dakel a bibiin babangatan nen Jesus ya apakiwas a tuloy na sarayan nikadkaduman inkagawa. Wadman met si apostol Juan. Mateo 27:45-56; Marcos 15:33-41; Lucas 23:44-49; 2:34, 35; Juan 19:25-30.—NW.

▪ Akin a say taloran oras a bilunget so aliwan solar eclipse?

▪ Ag-abayag sakbay na ipatey to, anton maabig ya alimbawa so intarok nen Jesus parad saramay walaan na maedad lan atateng?

▪ Antoray apatiran unor a balikas nen Jesus sakbay na ipatey to?

▪ Anto so agawaan na yegyeg, tan anto so kabaliksan na inkapaldua na kurtinay templo?

▪ Panon a naapektaan na saray milagro so manangidirihen opisyal na armada diad panamatey?