Say Sankabalgan a Toon Nambilay ed Kapiganman

Kapitulo 125

Masyadon Kairapan Diad Palitek

Kaiba nen Jesus so duaran matakew ya iwawanwan pian pateyen. Ag-arawi manlapud syudad, say prosesyon so tinmunda diad pasen a natatawag a Golgota, odino Pasen na saray Bungo.

Nilakseban iray priso na kawekawes da. Insan intarok so alak a nilaokay mira. Mapatnag ya imparaan na bibii ed Jerusalem, tan ag-ipupulisay na saray Romano iyan manamaandi na ot-ot ya iinumen parad saramay ipapasak. Balet, sanen atawayan nen Jesus, agto ininum itan. Akin? Mapatnag a labay toy walaan na sigpot a malinew a kanonotan legan na sayan baleg a subok na pananisia to.

Si Jesus natan so pinaunat ed palitek a saray lima to so impasen ed tagey na ulo to. Insan saray sundalo so angipaldeg ed ankakabaleg a pasak ed saray lima tan saray sali to. Sikatoy manngiriyet ed sakit legan ya ontatalos iray pasak ed laman to. Sanen impaalagey so palitek, pinmalaloy ot-ot, ta say belat na laman to so amabaleg ed binutaw na saray pasak. Ingen, imbes a mamagyaw, nampikasi Jesus parad saray sundalon Romano: “Ama, perdonam ira, ta agda amtay gagawaen da.”

Si Pilato so angipeket na sakey a karatula ed palitek a pakabasaan: “Jesus a Nazareno say Ari na saray Judio.” Mapatnag, ya insulat to iya aliwa lambengat lapud rerespetoen toy Jesus noagta lapud didimlaen toray saserdoten Judio lapud impilit da’d sikaton sentensyaay patey si Jesus. Pian amin so makabasa ed karatula, impaisulat nen Pilato itan ed taloran lenguahe​—ed Hebreo, ed opisyal a Latin, tan ed kabanyakan a Griego.

Saray manunan saserdote, pati di Caifas tan Annas, so agonigon. Sayan positibon panangiyabawag so manederal ed oras na itatalona. Kanian namprotesta ra: “Agmo isusulat ‘Say Ari na saray Judio,’ balet ta unong ed kuanton, ‘Siak so Ari na saray Judio.’” Maingongot lapud onkakanan uusaren na saray saserdote, inmebat si Pilato tekep na mapalalon sanok: “Say insulat ko so insulat ko la.”

Saray saserdote, pati saray karaklan, so nantitipon natan diad pamateyan, tan sinali na saray saserdote a kontraey testimonya na karatula. Inulit da so palson testimonya a niiter ed asasakbay diad saray panangusay ed Sanhedrin. Kanian, agpankelawan a saray ondadalan so ginmapon maabuson mansalita, a manpeyeng pian manlurey tan ibabaga: “O sikan manangigeba-komon na templo tan say manamaalagey lamet ed satan ed taloran agew, ilaban moy inkasika! No sika so anak na Dios, epas ka ditan ed panamairapan a palitek!”

“Arum so ilaban to; say inkasikato agto nilaban!” ebat na saray manunan saserdote tan saray relihyoson kaalyado ra. “Sikato so Ari na Israel; abuloyan natan a sikatoy onepas ed panamairapan a palitek tan sikami manisia ed sikato. Sikatoy angipasen na talek ed Dios; abuloyan natan a Sikatoy mangisalba ed sikato no Sikatoy kaliktan to, ta imbaga to, ‘Siak so Anak na Dios.’”

Diad impakatalaban ed espiritu, saray sundalo met so nanludlurey ed si Jesus. Sikaray siluludlurey ya angiyopresi na pinaakseng ya alak, a mapatnag ya idedepel diad abay na bibil to lambengat. “No sika so ari na saray Judio,” ludlurey da, “isalbam so inkasika.” Anggan saray matakew​—sakey ya impasak ed nikawanan to, tan say sananey ed nikawigi to—​so nanludlurey ed sikato. Isipen pa itan! Say sankabalgan a toon nambilay ed kapiganman, on, samay sakey ya akibiang ed si Jehova a Dios ed impamalsay amin a bengatla, so desididon managmak ed amin iyan panangabuso!

Saray sundalo so angala ed akinpaway a kawes nen Jesus tan impankapat itan. Nanpapalaranan da pian nanengneng no siopay pangiteran na saraya. Anggaman ontan, say akindalem a kawes so anggapoy nansaipan, a mangipapanengneng na atagey a kualidad. Kanian inkuan na saray sundalo ed sakey tan sakey: “Agtayo itan pipilaten, balet amtaen tayo diad panpapalaranan no siopay mankayarian ed satan.” Kanian, diad ag-aliklikas, sikaray anumpal ed kasulatan a mangibabaga: “Inapag-apag day akinpaway a kawes ko ed inkasikara, tan diad tapew na akindalem a kawes ko et nanpapalaranan da.”

Kabekta, sakey ed saray matakew so angapresya a si Jesus so peteg a sakey ya ari. Kanian, diad pamabaat ed kaiba to, inkuanto: “Agmo ta’n balot antakot so Dios, natan a sika so walad parehon panangukom? Tan peteg a sikata, so makanepegan lambengat na ontan, ta nagnap ya aawaten ta’y kanepegan ta parad bengabengatlan ginawa ta; balet sayan too et anggapoy ginawa ton ontan.” Insan sikatoy inmarap ed si Jesus, tekep ed kerew: “Nonot mo ak sano wala ka la’d panarian mo.”

“Tua kuanko ed sika natan,” ebat nen Jesus, “Sikay nakaibak ed Paraiso.” Sayan sipan so nasumpal sano manuley lay Jesus bilang Ari ed tawen tan mamaoli ed sayan magbabawin managgaway-kaugsan diad dalin ed Paraiso a nawalaan na pribilihyon bayuboan na saray makaliktar ed Armagedon tan saray kaiba ra. Mateo 27:33-44; Marcos 15:22-32; Lucas 23:27, 32-43; Juan 19:17-24.​—NW.

▪ Akin ya impulisay nen Jesus ya inumen so alak a nilaokan na mira?

▪ Mapatnag ya akin a sakey a karatula so impeket ed palitek nen Jesus, tan anton ebatan so pinawala na satan ed baetan nen Pilato tan saray manunan saserdote?

▪ Anton kaaruman a panangabuso so naawat nen Jesus ed palitek, tan antoy mapatnag ya anagdag ed satan?

▪ Panon ya asumpal so propesiya ed ginawa’d saray kawes nen Jesus?

▪ Anton pananguman so ginawa na sakey ed saray matakew, tan panon a sumpalen nen Jesus so kerew to?