Say Sankabalgan a Toon Nambilay ed Kapiganman

Kapitulo 124

Impalima tan Inyakar

Sanen si Pilato, ya apakiwas ed mareen a dignidad na apairap a Jesus, so anali lamet a mangibulos ed sikato, lalon asanokan iray manunan saserdote. Sikara so determinadon agmangiyabuloy na antokaman a bengatlan makasbel ed marelmeng a gagala ra. Kanian intubat day kelyaw da: “Ipasak yo! Ipasak yo!”

“Sikayon mismoy mangala’d sikato tan ipasak,” inyebat nen Pilato. (Misuniyan ed asasakbay ya ibabaga ra, saray Judio so walaay autoridad a mamatey ed saray kriminal lapud relihyoso iran isusumlang a walaay magenap a basiyan.) Insan, ag-onkulang ed komaliman pankanawnawa, inyabawag nen Pilato ya anggapoy-kasalanan nen Jesus, ya ibabaga: “Agak makaromog na antokaman a lingo ed sikato.”

Saray Judio, diad impakanengneng a say pulitikal a panamakasalanan da et sinmaew a mamawala na saray resulta, so pinmawil ed relihyoson panamakasalanan dan panangayew ya inusar pigaran oras ed asasakbay diad panangusay ed si Jesus ed arap na Sanhedrin. “Walaan kami na ganggan,” kuanda, “tan unong ed say ganggan et sikatoy nepeg ya ompatey, lapud ginawa toy inkasikaton anak na Dios.”

Balo iyan panamakasalanan ed si Pilato, tan sengegay impagmaliw ton lalon antakot. Dia natan et amoria ton si Jesus so aliwan ordinaryon too, a singa impatnag na kugip na asawa to tan say makatantandan biskeg na personalidad nen Jesus. Balet “anak na Dios”? Amta nen Pilato a si Jesus et taga Galilea. Ingen, posibli ta a sikatoy nambilay la nen saman? Diad impangiloob ed sikato lamet ed palasyo, intepet nen Pilato: “Taga iner ka?”

Si Jesus so nansiansian andi-esel. Asasakbay et imbaga to’d si Pilato a sikatoy sakey ya ari balet ta say Panarian to so agkabiangan na sayan mundo. Anggapo lay kaaruman a paliwawa natan so parad mausar a gagala. Anggaman ontan, asakitan so kinon nen Pilato diad ag-inyebat, tan sikatoy sinmanok ed si Jesus tekep na saray balikas a: “Ag ka ta mitongtong ed siak? Agmo ta amta a walaan ak na autoridad a mangibulos ed sika tan walaan ak na autoridad a mangipasak ed sika?”

“Agkan balot nawalaan na autoridad sumpad siak nilikud no inyabuloy ed sika manlapud tagey,” so marespeton ebat nen Jesus. Sikatoy manutukoy ed panangiyabuloy na Dios na autoridad ed totoon manuley pian mangasikaso’d mangaraldalin a kurakurang. Inyarum nen Jesus: “Saya so rason no akin et say toon angipalima’d siak ed sika so walaay babaleg a kasalanan.” On, say atagey a saserdote a si Caipas tan saray kaalyado to tan si Judas Iscariote so amin day mamebenben na mas ambelat ya eebatan nen say si Pilato ed agmakatunongan a tratamento ed si Jesus.

Diad lalon impandinayew ed si Jesus tan natatakot a nayarin walaay madibinon lapuan si Jesus, intubat lamet nen Pilato iray gunaet ton sikatoy ibulos. Anggaman ontan, kinontra na saray Judio so getma nen Pilato. Inulit day pulitikal a panamakasalanan da, a sisisilib a mamapagyaw ni ingen: “No ibulos mo iyan too, sika so agkaaro nen Cesar. Kada toon manggagawa ed inkasikaton ari so mansasalita sumpad kinen Cesar.”

Anggaman ed mapalalo iran panangipatnag, inpaway lamet nen Pilato si Jesus. “Nengneng yo! Say ari yo!” inyapila to lamet.

“Awit yo la! Awit yo la! Ipasak yo!”

“Ipasak ko ta so ari yo?” desperadon tepet nen Pilato.

Saray Judio so maingongot ed silong na pananguley na saray Romano. On, babalawen day pananguley na Roma! Ingen et mansimpi-simpitan ya inkuan na saray manunan saserdote: “Anggapoy ari mi noagta si Cesar.”

Itatakotan so pulitikal a posisyon tan reputasyon to, inmabuloy a siansia si Pilato diad andi-tundan kerew na saray Judio. Inyawat toy Jesus. Nilakseb na saray sundalo so kolor-uben balabal nen Jesus tan sikatoy sinulongay akinpaway a kawes. Legay pangiyaakar ed si Jesus pian ipasak, impasakbat da’d sikatoy dilin panamairapan a palitek to.

Natan et nayarin mamepegley lay kabuasan na Biernes, Nisan 14; anganko ta onkakaagwan la. Si Jesus so anggapoy-ugip nanlapulad palbangon na Huebes, tan anagmak lay nantutumbokan a masyadon kairapan. Natalosan, a sikatoy makapkapuy la lapud belat na palitek. Kanian sakey ya ondadalan, a manngaran na Simon a taga Cirene ed Aprika, so apaskar ya ontulong a mangalsa parad sikato. Legan na pantutultuloy da, dakel a totoo, pati bibii, so manumtumbok, a manangnangis tan mantagleey ed si Jesus.

Diad ililingaw to’d bibii, inkuan nen Jesus: “Anak a bibii na Jerusalem, itunda yoy pannangis ed siak. Imbes, nangisan yoy inkasikayo tan say ananak yo; lapud, nia! onsasabi iray agew sano ikuan na totoo, ‘Maliket iray lepes a bibii, tan saray panag-anakan ya ag-angiyanak tan saray pagew ya agnampasuso!’ . . . Lapud ta no gawaen darayan bengatla sano malambot ni kiew, anto so nagawa sano satan so amagaan?”

Tutukoyen nen Jesus so kiew na Judion nasyon, a siansia nin walaay lambot na bilay ed satan lapud kiwawala nen Jesus tan say kiwawala na sakey a nakdaan a manisia’d sikato. Balet ta no saraya so naandi la ed nasyon, say natilak et sakey a kiew ya inatey ed espiritual, on, sakey ya amagaan a nasyonal ya organisasyon. O, agaylan sengegay pannangis sano saray armadan Romano, a manlilingkor bilang saray manangidapo na Dios, so sigpot a maneral ed nasyon! Juan 19:6-17; 18:31; Lucas 23:24-31; Mateo 27:31, 32; Marcos 15:20, 21.—NW.

▪ Anton panamakasalanan sumpad si Jesus so ginawa na relihyoson papangulo sanen saray pulitikal a panamakasalanan da so sinmaew a mamawala na saray resulta?

▪ Akin a tinmakot a lalo si Pilato?

▪ Siopa so walaan na babaleg a kasalanan ed agawa ed si Jesus?

▪ Kaunoran, panon ya agawaan na saray saserdote ya iyawat nen Pilato si Jesus pian ipapatey?

▪ Anto so imbaga nen Jesus ed bibiin mannanangis ed sikato, tan anto so labay ton ibaga diad panutukoy ed kiew bilang “malambot” tan insan “amagaan”?