Say Sankabalgan a Toon Nambilay ed Kapiganman

Kapitulo 123

“Nia! Say Too!”

Nandinayew ed inkiwas nen Jesus tan diad impakaamtan anggapoy-kasalanan to, nanisip si Pilato na sananey nin paraan pian sikatoy ibulos. “Walaan kayo na ugali,” inkuanto’d saray karaklan, “ya ibulos koy sakey a too ed sikayo diad paskua.”

Si Barabas, sakey a bantog a manamatey na too, so nipangaw met, kanian intepet nen Pilato: “Siopa so labay yon ibulos ko ed sikayo, si Barabas odino si Jesus, say natatawag a Kristo?”

Lapud asugsugan na saray manunan saserdote ya anagyat ed sikara, kinerew na totoo a si Barabas so nibulos balet si Jesus so nipapatey. Lapud desidido, inmebat si Pilato, diad impangitepet lamet: “Dinan ed sikaran dua so labay yon ibulos ko’d sikayo?”

“Si Barabas,” kelyaw da.

“Anto, sirin, so gawaen ko ed si Jesus, say natatawag a Kristo?” so tepet nen Pilato tekep na sesga.

Tekep na maksil a kelyaw, inyebat da: “Sikatoy ipasak!” “Ipasak! Ipasak yo!”

Diad impakaamtan kekerewen day ipapatey na anggapoy-kasalanan a too, akikasi si Pilato: “Akin, anton mauges a bengatla so ginawa na sayan too? Anggapoy bengatlan nalmoan ko’d sikato a makanepegan na patey; sikato sirin so dusaen ko tan ibulos.”

Anggaman ed saray getma to, say asanokan a karaklan, diad panusugsog na relihyoson papangulo ra, so tuloy-tuloy a kinmelyaw: “Sikatoy ipasak!” Lapud asugsugan na saray saserdote, labay na karaklan so pangipaagus na dala. Isipen pa, limaran agew lambengat ed sakbay to et arum ed sikara so nayarin kabiangan na saramay angabrasa’d si Jesus ed Jerusalem bilang Ari! Kaleganan na saman, saray babangatan nen Jesus, no sikaray wadman, so nansiansian andi-esel tan agnampaliklikas.

Diad pakakaimano nen Pilato ya anggapoy nagawaan to, imbes et lalon onkakasil so kelyaw, angalay danum tan anguras na saray lima to ed arap na karaklan, tan inkuanto: “Siak so andiay-kasalanan ed dala na sayan too. Sikayon mismo so manseguro ed satan.” Diad saman, inyebat na totoo: “Say dala to so onsabi ed sikami tan ed tapew na ananak mi.”

Kanian, unong ed saray kerew da​—tan diad pilalek a nagkalalo nin peneken so karaklan nen say panggawa ed maptek—​imbulos nen Pilato si Barabas ed sikara. Impaawit to si Jesus tan impalakseban tan insan impasiplatan. Saya so aliwan ordinaryon panagsiplat. Dedeskribien na The Journal of the American Medical Association so agamil na Romanon panagsiplat:

“Say genda-gendat ya uusaren et sakey ya antikey a latiko (flagrum odino flagellum) a walaay pigaran solo odino nilubir a katat ed nanduruman karukey, ya akabitan na saray ankelag a metal odino makdem iran piraso na saray pukel na karnero ed nanleleetan. . . . Legan ya impasyan sisiplatan na saray sundalon Romano so beneg na biktima, saray ankelag a metal so onbiret, tan saray nilubir a katat tan saray pukel na karnero so manugat. Insan, legan ya itutultuloy so panisiplat, saray sugat so onaralem anggad sabisabien to lay pukel tan mamawalay manggiwgiw a mandalan suga-sugat.”

Kayari na sayan manamairap a panaglewet, si Jesus so inawit ed palasyoy gobernador, tan say interon tropa na sundalo so impantitipon. Diman et saray sundalo so nagkalalo nin angabuso ed sikato diad impansayapar na koronan sabi-sabit tan intelmer itan ed ulo to. Sikaray angipasen na tanobong ed nikawanan a lima to, tan sikatoy kinawesan da na kolor-uben abel, say klasen isusulong na saray ari. Insan sikatoy niludlurey da: “Maabig ya agew, sikan Ari na saray Judio!” Ontan met, sikatoy nilukdaan tan tinampal da. Inala ra so masekder a tanobong ed lima to, inusar da itan a pamekpek ed ulo to, a lalon mangipapanek ed saray makdem a sabi-sabit na makapabanday a “korona” to.

Say makatantandan dignidad tan biskeg nen Jesus ed arap na sayan panangabuso so ontanlan nandinayewan nen Pilato a sikatoy apakiwas a manggawa na sananey lamet a panalin sikatoy ibulos. “Nengneng yo! Sikatoy inawit ko’d paway ed sikayo pian naamtaan yon anggapoy naromog kon kasalanan ed sikato,” kuanto’d saray karaklan. Nayarin inisip ton say nengneng na apairap a kipapasen nen Jesus so mamalemek ed kapusoan da. Diad panalalagey nen Jesus ed arapan na anggapoy-panangasin ulop, ya asulongay sabi-sabit a korona tan say kolor-uben akinpaway a kawes tan tekep na mandalan lupa to a peteg a manotot, inyabawag nen Pilato: “Nia! Say too!”

Anggaman asugatan tan abugbog, nian manalalagey so sankamatalonggaring a pinalsa ed interon awaran, petepeteg a say sankabalgan a toon nambilay ed kapiganman! On, ipapanengneng nen Jesus so mareen a dignidad tan inkakalmado a mangipapatnag na kabalgan ya anggan si Pilato et apaskar a mangaksobi, ta saray balikas to so mapatnag ya impantekepay respeto tan panangabagey. Juan 18:39–19:5; Mateo 27:15-17, 20-30; Marcos 15:6-19; Lucas 23:18-25.—NW.

▪ Diad anton paraan a sinali nen Pilato ya ibulos si Jesus?

▪ Panon a sinali nen Pilato ya ekalay inkasikato na eebatan?

▪ Anto so nasasaglawi ed pagmamaliw a napairap?

▪ Panon a niludlurey si Jesus kayari impamairap?

▪ Anto nin impanali so ginawa nen Pilato pian ibulos si Jesus?