“Panaglakoy Asin” ed Mozambique

SI Francisco Coana, sakey a membro na komite na bansa ed Mozambique, so angusar na samploran taon ed saray “reeducation camp.” Oniay salaysay to nipaakar ed eksperiensia to: “Amtak a mansiansia kami dia ed loob na pigaran panaon, kanian tinepetan koy manangasikaso na sirkito no kasin makapantultuloy ak bilang regular pioneer. Intepet to no panon kon makapangitalaga na magenap a panaon ed mapublikon ministeryo, anta ngalngalin amin diad saray kampo et sakey la’d saray Tasi nen Jehova? Inkuan kon siak so onla’d Milange, sakey a baley a walay kaarawin 47 kilometro, pian anapey totoon napulongan.

“Anggaman agkami ni opisyal ya inabuloyan ya ompaway ed kampo, sayan totontonen so agmapeget a nipapakurang. Nanonotan ko ni inyakar ed kalawakan, a nantatalimukor, tan manpipikasi parad sakey a paraan pian napulongay totoo diman. Ag-abayag et satan so inebatan nen Jehova.

“Akatongtong koy sakey a lakin akankayariay sakey a bisikleta, tan akipaknaan ak ed sikato. Inmabobon a no bukalkalen koy taloran-kakapat ya ektarya a dalin to sakbay na mamauran, iter to itan a bisikletan pinagka-upak. Kanian kinabuasan a nanbukalkal ak ed dalin to. Binendisyonan nen Jehova iyan uksoyan, ta diad kaunoran et agamoran koy bisikletak.

“Say resulta et makasabi ak la’d baleg a baley na Milange tan epektibon nituloy koy panagpayunir ed sayan mabungan lawak. Lapud isesebel so kimey mi, kaukolan koy magmaliw a mapamaraan ed pangiparungtal na katuaan ed totoo. Tekep na saray libro tan saray magasin ya akasoksok ed dalem na kawes ko, angikarga ak na asin ed sakey a bag tan intunog ko. Imbes ya ilako itan ed balor na 5 meticais, prinesyoan ko itan na 15 meticais. (No mamormora, saliwen ya amin iya na totoo, tan naandian ak la na asin ya usaren diad panagpulong!) Say pitotongtong ko so mipadpara ed onggendan:

“‘Maabig ya agew! Mantutunog ak na asin.’

“‘Sanpiga?’

“‘Labinliman meticais.’

“‘Andi, andi. Agaylay bili to met!’

“‘On, miabobon ak a mabli iya. Balet no iisipen mon mabli iya natan, manalagar ka na pigaran panaon lapud lalon ombili iya ed arapen. Kabat mo ta’n nipasakbay iya ed Biblia?’

“‘Agko nin balot abasa itan ed Bibliak.’

“‘On, wadtan. Piala yoy Biblia yo, abuloyan yon ipanengneng ko’d sikayo.’

“Diad ontan et onggapo so tongtongan ya uusarey Biblia to, bangta say Bibliak so siansian akasoksok ed dalem na kawes ko. Ipaimanok so kapitulo 6 na Apocalipsis, nipaakar ed maatap iran kipapasen tan saray kakulangay tagano. No alikas kon miabobon, ipaway ko so Say Katuaan a Mangitonton ed Bilay ya Andi Anggaan odino say Maong A Balita a Gawaen to Kayon Maliket tan igapo so pormal a panagaral na Biblia.

“Say resulta et akapangigapo ak na sakey a grupo na 15 interesadon totoo ed Milange. Balet ag-abayag et naamtaan na autoridad so aktibidades mi. Sakey ya agew legan na pangikokonduktak na panagaral na Biblia, biglan linmoob iray pulis tan inerel da kami. Amin mi, pati say ankekelag ya anak na pamilya, so inawit ed prisoan na baley. Kayari sakey bulan mi’d prisoan, sikamin amin so pinapawil lamet ed kampo.”

Sarayan eksperiensia so ag-amakapuy ed seseg na agagi tayo. Diad kasuniyan, si Francisco tan say pamilya to, pati ed nilibon agagi ra a walad saray kampo, so mandadayew tan manpupulong natan ed silong na saray kipapasen a walaay kawayangan ed Mozambique.