Say Sankabalgan a Toon Nambilay ed Kapiganman

Kapitulo 105

Gapoan na Importantin Tuloy ya Agew

Sanen tinaynan nen Jesus so Jerusalem na labi Lunes, sikatoy amawil ed Betania diad bandad bukig a pasen na Palandey na saray Olibo. Duara lan agew so akumpleto ed pinal a ministeryo to. Anggapoy duaruwan inusar lamet nen Jesus iman a labi a kaibay kaaro ton Lazaro. Nanlapud insabi manlapud Jerico ed Biernes, saya so komapat ya impanpalabi to ed Betania.

Natan, kaimbuasan na Martes, Nisan 11, sikato tan saray babangatan to so manbabaroy lamet. Pinmatnag iyan importantin tuloy ya agew ed ministeryo nen Jesus, tan say sanka-okupadoan anggad saman. Saman so unor ya agew a sikatoy nanengneng ed templo. Tan saman so unor ya agew na mapublikon ministeryo to sakbay na pangusay tan pamatey ed sikato.

Si Jesus tan saray babangatan to so dinmalan ed parehon rota diad Palandey na saray Olibo a paarap ed Jerusalem. Diad dalan manlapud Betania, naimano nen Pedro imay kiew ya insumpa nen Jesus nen imbeneg a kabuasan. “Rabbi, nia!” inkelyaw to, “say kiew ya higos ya insambam [insumpam, NW] amagaan.”

Balet akin a pinatey nen Jesus imay kiew? Impatnag to no akin sanen imbaga to: “Tua kuan ko ed sikayo, No walaan kayo lambengat na pananisia tan agmanduaruwa, aglambengat nagawaan yo so ginawak ed kiew ya igos, balet ontan met no ikuan yo ed sayan palandey [say Palandey na saray Olibo a panaalageyan da], ‘Naagwat ka tan nibantak ka ed dayat,’ nagawa itan. Tan amin a bengatlan kerewen yo ed pikakasi, a walaan na pananisia, nagamoran yo, NW.”

Kanian diad impanggawan namagaan so kiew, si Jesus so mangitatarok parad saray babangatan to na bengatlan panaralan diad pankaukolan dan nawalaan na pananisia ed Dios. A singa ibabaga to: “Amin a bengabengatla ya pikasi yo tan kerewen yo, sisiaen yo ya awaten yo, et wala ra naani ed sikayo.” Agaylan importantin leksion parad sikaran naaralan, nagkalautla lapud makapataktakot iran subok a magano lan nagawa! Ingen, wala ni arum a pisiglaotan ed baetan na inkamagaan na kiew ya igos tan say kualidad na pananisia.

Say nasyon na Israel, singa sayan kiew ya igos, so walaan na makapalikdon nengneng. Anggaman say nasyon so walad sakey a sipanan a pisisiglaotan ed Dios tan nayarin ompatnag ed akinpaway a manguunor ed saray pananontonan to, pinmatnag itan ya anggapoy pananisia, lepes ed maabig iran bunga. Lapud kakulangan na pananisia, satan ni ingen so mangipupulisay ed dilin Anak na Dios! Kanian, diad impanggawa ed ag-manbubungan kiew ya igos a namagaan, malinlinew ya idedemostra nen Jesus no anto so pagmaliwan na sayan anggapoy-bunga, anggapoy-pananisian nasyon.

Ag-abayag, si Jesus tan saray babangatan to so linmoob ed Jerusalem, tan singa kaugalian da, sikaray linma ed templo, a no iner et ginmapon nanbangat. Lapud maseguron walad kanonotan na saray manunan saserdote tan mamasiken na totoo so kiwas nen Jesus ed asasakbay ya agew sumpad saray managsalat na kuarta, sikatoy inangat da: “Lapu ed siopa [a] pakauley so pangawaan mo na saraya a bengatla? Ono siopa so angiter ed sika na saya’n pakauley?”

Bilang ebat et inkuan nen Jesus: “Siak met so ontepet na sakey a bengatla. No ibaga yo ed siak, ibagak met no siopan autoridad a gagawaen ko irayan bengatla: Say bautismo nen Juan, manlapud anton lapuan iman? Manlapud tawen odino manlapud totoo? NW.”

Saray saserdote tan mamasiken so ginmapon nantutuplegan no panoy iyebat da. “No ikuan tayo, Nanlapu ed tawen, ikuan to, Akin et agkayo anisia ed sikato? Balet no ikuan tayo, Nanlapu ed saray totoo; amin ya ombaley topaken da itayo, ta sinisia ra a si Juan sakey ed saray profetas.”

Ag-amta na saray manuley no anto so iyebat da. Kanian inyebat da ed si Jesus: “Agmi amta, NW.”

Diad satan et inkuan nen Jesus: “Nisay ibabagak no siopan autoridad a gagawaen ko irayan bengatla, NW.” Mateo 21:19-27; Marcos 11:19-33; Lucas 20:1-8.

▪ Anto so makatantanda nipaakar Martes, Nisan 11?

▪ Antoran leksion so intarok nen Jesus sanen ginawa ton namagaan imay kiew ya igos?

▪ Panoy inyebat nen Jesus ed saramay mantetepet ed no siopan autoridad a gagawaen to’ray bengatla?