Saray Opinyon Parad Sisisiaen

LEGAN na panasampot na kaunoran a siglo, saray opinyon a manusuporta ed siensia, pilosopya, tan sekularismo so nakekesayay epekto ra ed panisia ed Dios tan say inkipuyan na Biblia.

Balet aliwan saratan lambengat ya opinyon so nibalikas. Dakel a managsukimat so akaimano a nagkalalon tuloy so nibaga diad panuporta ed panisia ed Dios nen say ateismo. Saray impansukimat da so angiparungtal met ed daakan ya ebidensya a say Biblia et apuyanan a Salitay Dios.

Sakey a toon angibalikas na opinyon nipaakar ed sayan pamaakaran et si C. T. Russell. Minilyon so akabasa ed tomo ton 1886 a The Divine Plan of the Ages. Say sakey a mabiskeg a kapitulo to et say “Apaneknekan so Kiwawala na Supremo tan Matudion Manamalsa.”

Diad tinmumbok iran dekada, nansulat si Russell na saray artikulo, tract, tan libro ya angitarok na mapekder iran rason ed panisia ed Dios tan ed Biblia. Saraya so impalapag na Watch Tower Bible and Tract Society. Say komaduan presidenti, si J. F. Rutherford, so angisulat ed Creation (1927) tan arum niran palapagan a nagkalalon anuporta ed opinyon parad sisisiaen.

Satan a sosyedad so angiparaan ed agano ni na kaaruman a nipanpanaon ya impormasyon ed sarayan pamaakaran. Saray Tasi nen Jehova so makapangitarok na ontan parad sinononot a panangunsideram.

No abrasen mo so kaaruman ya impormasyon odino kaliktan mo so sakey a mangikondukta ed sika na libren panagaral na Biblia ed abung, ipangasin mansulat ed Watch Tower, P.O. Box 2044, 1099 Manila, o diad matukoy ya address a nilista ed pahina 2.