Say Sankabalgan a Toon Nambilay ed Kapiganman

Kapitulo 104

Komatlon Pankanawnawan Arengel so Boses na Dios

Legan a walad templo, si Jesus so maniirap nipaakar ed ipapatey ya agmabayag et nakaukolan ton arapen. Say manunan panpapagaan to et no panon a say reputasyon na Ama to so naapektoan, kanian ipipikasi to: “Ama, pagloriaen moy ngaran mo.”

Kabekta, sinmabi sakey a makapanyarin boses, a mangiyaabawag: “Sikato so pinagloriak, tan sikatoy pagloriaen ko lamet.”

Say karaklan a manalalagey ed liber to so atalagnaw. “Sake’ya angel so akisalita ed sikato,” so inkuan na arum. Imbaga balet na arum a kinmarol. Balet, peteg, si Jehova a Dios so nansalita! Anggaman ontan, saya so aliwan unonan pankanawnawan arengel so boses na Dios nipaakar ed si Jesus.

Diad bautismo nen Jesus, a talora tan kapalduan taon ed asasakbay, arengel nen Juan a Managbautismo ya inkuan na Dios ed si Jesus: “Saya so Ana’ko ya inararok; napaliketak ya maong ed sikato.” Insan, pigaran panaon kayari na akadkaunan Paskua, sanen si Jesus so nauman-ed-nengneng ed arapan da, arengel di Santiago, Juan, tan Pedro ya inyabawag na Dios: “Sikatoya so inarok ya Anak, a sikato’y panliketan ko’n maong; sikato so dengelen yo.” Tan natan, diad komatlon pankanawnawa, ed Nisan 10, apat agew sakbay na ipapatey nen Jesus, say boses na Dios so arengel lamet na totoo. Balet diad sayan bekta et nansalita si Jehova pian narengel na karaklan!

Ipapaliwawa nen Jesus: “Saya’n voces ag sinmabi nisengeg ed siak, ingen nisengeg ed sikayo.” Mangitatarok itan na paneknek a si Jesus so peteg ya Anak na Dios, say insipan a Mesias. “Natan et wala so panangukom ed sayan mundo, NW” intuloy nen Jesus, “natan say principe na saya’n mundo nibantak.” Say matoor a kurang na bilay nen Jesus so diad katuaan et mamepekder a si Satanas a Diablo, say manuley na mundo, so makanepegan a “nibantak,” pateyen.

Diad panutukoy ed saray pansumpalan na manasingger ya ipapatey to, ibabaga nen Jesus: “Et siak, no nipalageyak a manlapu ed dalin, aguaten ko naani amin a totoo anga ed inkasiak.” Say ipapatey to so agbalot pakatalo, ta diad panamegley na satan, iyasingger toray arum ed sikato pian napangayagaan day bilay ya andi-anggaan.

Balet saray karaklan so sinmuppiat: “Sikami nadngelan mi ed gangan ya say Cristo mansiansia lawas: et panon so pangikuan mo, Say Anak na too kaokolan a nipatagey? Siopa so saya’n Anak na too?”

Anggaman ed amin ya ebidensya, a pati say pakadngel ed mismon boses na Dios, maslak so agmanisia a si Jesus so peteg ya Anak na Dios, say insipan a Mesias. Ingen, singa ginawa to ed asasakbay ya anemiran bulan diad Piesta na saray Tabernakulo, tinukoy nen Jesus lamet so inkasikato bilang “[say] silew” tan amaseseg ed saray dumerengel to: “Ambegya ya wala so silew yo, manisia kayo ed silew, pian makapagmaliw kayon anak na silew.” Kayari impangibaga ed sarayan bengatla, si Jesus so tinmaynan tan inmamot, mapatnag lapud walad kaatapan so bilay to.

Say kakulangan na pananisia na saray Judio ed si Jesus so manusumpal ed saray salita nen Isaias nipaakar ed ‘bulag a kamataan na totoo tan inmawet a kapusoan da a lapud satan et sikaray agmagbabawi pian napaabig, NW’ Anengneng nen Isaias ed pasingawey so mangatatawen iran korte nen Jehova, pati ed gloria nen Jesus sakbay na impagmaliw ton too a kaiba si Jehova. Ingen, saray Judio, diad kasumpalan na insulat nen Isaias, so nanpatunger a mangipupulisay ed ebidensya a sayan Sakey et samay insipan a Manangiliktar da.

Diad biek a dapag, dakel anggan ed saray manuley (mapatnag a membro ra na Judion atagey a korte, say Sanhedrin) so diad tua et anisia ed si Jesus. Sikara di Nicodemo tan si Jose na Arimathea so duara ed sarayan manuley. Balet saray manuley, anggaman ed kaplesan labat komon, so sinmaew a mangiyabawag ed pananisia ra, diad takot a pakaekal manlapud posisyon da ed sinagoga. Agaylay kabaleg so abalang ed ontan a totoo!

Intuloy nen Jesus ya ibaga: “Say manisia ed siak, aliwa a siak so sisiaen to, no ag say angibaki dia ed siak. Et say makanengneng ed siak, nanengneng to so angibaki dia ed siak. . . . Et no siopaman ya ondengel ed saray salitak, et ag to ra onoren, sikatoy ag ko okomen; ta agak linmadia’n mangokom na mundo, no ag mangilaban na mundo. . . . Say salita a sinalitak, sikato lanlamang so mangokom ed sikato ed kaonoran ya agew.”

Say aro nen Jehova parad mundo na katooan so amakiwas ed sikaton ibaki si Jesus pian saraman so manisia ed sikato so niliktar. Say kililiktar na totoo so mandependi ed no ontulok ira’d saray bengatlan imbilin na Dios a salitaen nen Jesus. Say panangukom so nagawa “ed kaonoran ya agew,” legan na Sanlibon Taon ya Uley nen Kristo.

Sinampotan nen Jesus diad pangibabagan: “Agak mansalita na manlapu ed inkasiak; ingen say Ama ya angibaki dia ed siak, initdan to ak na sakey a gangan, no anto so nepeg ko’n ibaga, tan anto so nepeg kon salitaen. Et amtak a say gangan to sikato so bilay ya andiangaan. Kanian [lantin] saray bengatla a sinalitak, unong na inkuan na Ama ed siak ontan so salitaen ko.” Juan 12:28-50; 19:38, 39; Mateo 3:17; 17:5; Isaias 6:1, 8-10.

▪ Diad anton taloran pankanawnawa a say boses na Dios so arengel nipaakar ed si Jesus?

▪ Panon ya anengneng nen propeta Isaias so gloria nen Jesus?

▪ Siopa iramay manuley ya anisia ed si Jesus, balet akin a sikatoy agda parungtalan ya inyabawag?

▪ Anto so “kaonoran ya agew,” tan diad anton basiyan a naukom ed satan so totoo?