Say Sankabalgan a Toon Nambilay ed Kapiganman

Kapitulo 103

Ibibisita ed Templo Lamet

Kasumsumpal lambengat na taloran labi nen Jesus tan saray babangatan to ed Betania nanlapulad insabi manlapud Jerico. Asasakbay natan na Lunes, Nisan 10, sikara lay mamapaarap ed Jerusalem. Si Jesus so narasan. Kanian sanen akanengneng na sakey a kiew ya igos a walaan na bulobulong, inasinggeran to pian nengnengen no walay bunga to.

Asaksakbay so impanbulong na kiew, lapud agpanaon na saray igos anggad sano Hunyo, tan natan et babandad saginonor lambengat na Marso. Anggaman ontan, mapatnag a liknaen nen Jesus a lapud asakbay a nanbulong itan, masakbay met itan a manbunga. Balet sikato so adismaya. Saray bulong so angiter ed kiew na mapalikdon nengneng. Diad saman et insumpa nen Jesus so kiew, ya ibabaga: “Angapo’y toon mangan na bungam a manlapu ed sika natan ya anga ed anga.” Say resulta na kiwas nen Jesus tan say kaimportantian to so naamtaan ed kaimbuasan.

Diad pantutultuloy, ag-abayag et arateng nen Jesus tan saray babangatan to so Jerusalem. Sikatoy linma ed templo, a binista to ed imbeneg a ngarem. Anggaman ontan, natan et sikatoy kinmiwas, a singa ginawa to taloran taon ed asasakbay sanen sikatoy inmatendi ed Paskua nen 30 K.P. Pinatakyas to iramay managlako tan managsaliw ed templo tan binalintuag to’ray lamisaan na saray managsalat na kuarta tan saray yurongan na saramay manlalakoy malapati. Sikato so ag-anggan mangiyabuloy ed siopaman a mangibeltang diad templo na kagawaan.

Diad pangokondena ed saramay managsalat na kuarta tan manlalakoy ayayep ed templo, inkuanto: “Agta nisulat, Say abung ko natawag ya abung na pikakasi nipaakar ed saray amin a naciones? Balet sikayo sikato’y ginawa yo a sakey a balaong na mamatakew.” Sikaray matatakew lapud alablabas so panisingil da ed saramay anggapoy nagawaan noagta mangaliw manlapud sikara na nakakaukolan ya ayayep parad bagat. Kanian momoriaen nen Jesus iyan anapan bilang porma na panagpalikdo odino panagtakew.

Sanen arengelan na saray manunan saserdote, escribas, tan saramay walaay manunan betang so ginawa nen Jesus, sikaray nananap lamet na paraan pian sikatoy napapatey. Diad ontan et pinaneknekan dan sikaray agnareporma. Ingen, agda amta no panon dan pateyen si Jesus, lapud amin a totoo so mansiasiansia’d sikato pian ondengel.

Likod ed saray natural a Judio, walaray Gentil met a linma ed Paskua. Saraya so proselita, a kabaliksan ton sikaray akumberti ed relihyon na saray Judio. Pigaran Griego, a mapatnag a proselita, so inmasingger natan ed si Felipe tan kinerew a napinengnengan si Jesus. Si Felipe so inmasingger ed si Andres, anganko ta tepeten no say ontan a piaabet so matukoy. Mapatnag a si Jesus so wala ni ed templo, a no iner et sikatoy nayarin napinengnengan na saray Griego.

Amta nen Jesus a wala labat lay pigaran agew na panbilay to, kanian alay abig ton inyilustra so kipapasen to: “Say oras sinmabi la, a say Anak na too [so] nitandoro. Tua, tua kuan ko ed sikayo, No say bokel na trigo ag napelag ed dalin tan ag ompatey, sikato so mansiansia ed inkasikato a bokor, balet no ompatey, manbunga’y dakel.”

Say sakey a bokel na trigo so walaan na melag a balor. Ingen, anto no inkotkot itan ed dalin tan “ompatey,” a sasampotan so bilay to bilang bokel? Diad ontan et satan so ontubo tan kabekta ombaleg anggad sakey a tanaman a mamawala na dakerakel a bokel na trigo. Mipadpara, si Jesus so sakey lambengat ya ayadyarin too. Balet no sikatoy ompatey a matoor ed Dios, sikatoy magmaliw ya instrumento’d panangiter na andi-anggaan a bilay ed saray matoor a walaan na parehon espirituy dilin-panagsakripisyon walad sikato. Kanian, inkuanto: “Say mangaro na bilay to sikato so nabalang to, et say mangula na bilay to ed saya’n mundo sikato so yatol to anga ed bilay a maando.”

Mapatnag ya aglambengat iisipen nen Jesus so inkasikato, ta intumbok ton imbaga: “No siopaman a too manlinkor ed siak, ontombok ed siak; et no iner so kawalaan ko, manayam met diman so aripen ko. No siopaman a too manlinkor ed siak, sikato so pagalangan na Ama naani.” Agaylan makapakelaw a tumang parad itutumbok ed si Jesus tan panmiministro ed sikato! Satan so tumang na pagmaliw ya apagalangan na Ama a milimog ed Kristo ed Panarian.

Diad paniisip nipaakar ed baleg ya irap tan makapaot-ot ya ipapatey a manaalagar ed sikato, intuloy nen Jesus: “Natan say kamareruak agonigon; et anto so ikuan ko? Ama, ilaban moak ed sayan oras.” No komon ta say manaalagar ed sikato so nayari lambengat a paliisan! Balet ta, andi, a singa ibabaga to: “Nisengeg ed saya sinmabiak ed sayan oras.” Si Jesus so mitunosan ed interon uksoyan na Dios, a mangilalaktip ed dilin manangisakripisyon ipapatey to. Mateo 21:12, 13, 18, 19; Marcos 11:12-18; Lucas 19:45-48; Juan 12:20-27.

▪ Akin ya inilaloan nen Jesus a makarumog na saray igos anggaman agni panaon na saratan?

▪ Akin a tinawag nen Jesus iramay manlalako ed templo a ‘matatakew’?

▪ Diad anton paraan a si Jesus so singa bokel na trigo ya ompatey?

▪ Anto so nalilikna nen Jesus nipaakar ed irap tan ipapatey a manaalagar ed sikato?