Say Sankabalgan a Toon Nambilay ed Kapiganman

Kapitulo 102

Say Matalonan Iloloob nen Kristo ed Jerusalem

Kaimbuasan, Simba, Nisan 9, tinaynan nen Jesus so Betania a kaiba iray babangatan to tan amaarap ed Palandey na saray Olibo a paarap ed Jerusalem. Diad aganon panaon, akaasingger ira ed Betfage, a naromog ed Palandey na saray Olibo. Binilin nen Jesus so duara ed saray babangatan to:

“Onla kayo ed aldea ya wala’d naparong yo, et makaromog kayo naani a tampol na sakey ya asna ya akasinger, tan sakey a kilaw ya iba to; okbar yo ’ra tan yakar yo ra ed siak. Et no walay mangibaga na bengatla ed sikayo, ikuan yo, Say Katawan kaokolan to ra; et tampol ya payakar to ra.”

Anggaman diad inmuna et sinmaew iray babangatan to a makatebek a sarayan bilin so walaan na kipaakaran ed kasumpalan na propesiya ed Biblia, saginonor et amoria ran ontan. Impasakbay nen profeta Zacarias a say insipan na Dios ya Ari so onlugan ed asno a paloob ed Jerusalem, on, “ed tapew na sakey lanlamang a kilaw ya anak na asno a kabatyan.” Si Arin Solomon so mipadpara met a linmugan ed kilaw na sakey ya asno diad inkalanaan to.

Sanen linmoob iray babangatan ed Betfage tan anengteng ed kilaw ya asno tan say ina to, arum ed saray akaalagey so nankuan: “Anto so [gagawaen] yo?” Balet sanen imbaga’d sikara a saray ayep so parad Katawan, inmabuloy iray lalaki a tengtengen iraya ed si Jesus. Inpasen na saray babangatan iray akinpaway a kawes da ed tapew na inan asno tan ed malangwer to, balet linmugan si Jesus ed malangwer.

Legan ya akalugan si Jesus a mamapaarap ed Jerusalem, ondarakel so totoo. Maslak ed totoo so angibilkag ed akinpaway a kawes da ed dalan, bangta say arum so anitsang na saray sanga manlapud saray kiew tan indatak iratan. “Bendito so Ari ya onla dia ed ngaran [nen Jehova]!” kelyaw da. “Deen ed tawen, tan gloria dia ed sankatageyan!”

Pigara ed saray Pariseo ed karaklan so asanokan ed sarayan panangiyabawag tan nanreklamo ed si Jesus: “Managbangat, banom so saray babangatan mo.” Balet inyebat nen Jesus: “Kuan ko ed sikayo, a no saraya ag ira komon onesel, saray bato maningal ira.”

Legan a manasingger si Jesus ed Jerusalem, binista to so syudad tan ninangisan itan, ya ibabaga: “No naamtaan mo komon dia ed sayan agew, salanti sika, so saray nipaakar ed deen mo! Balet natan niamot ira ed saray matam.” Lapud sigagagalan itutunganga to, say Jerusalem so nepeg a manbayar, a singa impasakbay nen Jesus:

“Ta onsabi so saray agew ed sika, sano saray kabosol mo [saray Romano a sakop nen Heneral Tito] liktoben da ka, tan amin a pasen aposan da ka. Et igeba ra ka ed dalin, tan saray anak mo dia ed dalem mo, et ag da naani paulian ed sika so sakey a bato ed tapew na sakey.” Sayan kadederal na Jerusalem ya impasakbay nen Jesus so diad tua et agawa 37 taon ed saginonor, nen taon 70 K.P.

Pigaran simba lambengat ed asasakbay, dakel ed karaklan so akanengneng ed si Jesus ya amaoli ed si Lazaro. Natan et saraya so mantutultuloy a mangibabaga ed arum nipaakar ed satan a milagro. Kanian sanen onloloob si Jesus ed Jerusalem, say interon syudad so agulo. “Siopa ya?” labay ya amtaen na totoo. Tan mantutultuloy ya ibabaga na karaklan: “Saya sikato’y profeta, si Jesus, a nanlapu ed Nazaret na Galilea!” Diad pakakanengneng ed nagagawa, intagleey na saray Pariseo a sikaray sigpot a nababalang, ta, unong a kuanda: “Say mundo tinmombok ed sikato.”

A singa niugali to diad ibibisita ed Jerusalem, si Jesus so linma ed templo pian manbangat. Diman et saray bulag tan piley so inmasingger ed sikato, tan pinaabig to’ra! Sanen anengneng na saray manunan saserdote tan saray escriba so makapakelaw a bengabengatlan gagawaen nen Jesus tan sanen arengel da’ray ugugaw ed templo ya onkekelyaw, “Hosanna [Iliktar, pikasi mi, NW] ed anak nen David!” sikara so asanokan. “Narengel mo no anto’y ibabaga na saraya?” improtesta ra.

“On,” inyebat nen Jesus. “Ag yo tan balot abasa, Dia ed sangi na saray ugugaw tan saray mansoso niyadyarim so panangigalang?”

Nantultuloy a nambangat si Jesus, tan ninmengneng ed amin a walad templo. Ag-abayag et atrasado la. Kanian sikato so tinmaynan, a kaiba iray 12, tan nambaroy a papawil na nayarin taloran kilometro a paarap ed Betania. Sikatoy nanpalabi diman na Simba, a nayarin diad abung na kaaro ton si Lazaro. Mateo 21:1-11, 14-17; Marcos 11:1-11; Lucas 19:29-44; Juan 12:12-19; Zacarias 9:9.

▪ Kapigan tan diad anton paraan a linmoob si Jesus ed Jerusalem bilang Ari?

▪ Kaunongan kaimportanti a saray karaklan so mangidayew ed si Jesus?

▪ Anto so nalilikna nen Jesus sanen bibistaen to so Jerusalem, tan anton propesiyay imbalikas to?

▪ Anto so agawa sanen linmoob si Jesus ed templo?