Say Sankabalgan a Toon Nambilay ed Kapiganman

Kapitulo 101

Diad Betania, ed Abung nen Simon

Sanen tinaynan nen Jesus so Jerico, sikatoy amaarap ed Betania. Ngalngali sanagew so baroy, lapud satan so patatdang a ngalngalin 19 a kilometro a nikutkutlaong a dalan. Say Jerico so ngalngali 250 metro ed leksab na dantal na dayat, tan say Betania so nayarin 760 metro ed tagey na dantal na dayat. Nanonotan mo ni, a say Betania so baley di Lazaro tan agagi ton bibii. Say melag a baley so ngalngali taloran kilometro manlapud Jerusalem, a naromog ed bandad bukig a diking na Palandey na saray Olibo.

Dakel la so akasabi ed Jerusalem parad Paskua. Sikara so sinmabin asakbay pian linisan da so inkasikara diad panamegley na seremonya. Anganko ta sikara so akariwit na bangkay odino akagawa na arum a bengatlan nanggawa ed sikaran marumsis. Kanian tinumbok daray totontonen a linisay inkasikara pian manepenepeg a makapanselebra na Paskua. Legan a mandaragup irayan asasakbay a sinmasabi ed templo, dakel so manpalbeng no kasin onla si Jesus ed Paskua.

Say Jerusalem so sentro na pansasangsangan nipaakar ed si Jesus. Kabat na karaklan a kaliktan na saray relihyoson pangulo a sikatoy erelen pian ipapatey. Diad tua, ingganggan dan siopaman a makaamta’d kawalaan to, nepeg dan ireport ed sikara. Amitlon danay ed apalabas iran bulan​—diad Piesta na saray Tabernakulo, ed Piesta na Dedikasyon, tan kayari impamaoli to’d si Lazaro—​sarayan pangulo so analin mamatey ed sikato. Kanian, nanumameng a nantepet so totoo no kasin mapublikon onapireng ni si Jesus? “Anto so isisip yo?” tepet da ed sakey tan sakey.

Kaleganan, sinmabi si Jesus diad Betania anemiran agew sakbay na Paskua, ya ompepetek ed Nisan 14 unong ed kalendaryo na Judio. Akasabi si Jesus ed Betania a nayarin Biernes na labi, a gapo na Nisan 8. Agnayarin sikatoy nanbaroy a mamaarap ed Betania diad Sabado lapud say panagbaroy ed Sabaton​—manlapud kaseselek na agew na Biernes anggad kaseselek na Sabado—​so isesebel na Judion ganggan. Anganko ta dinmawes si Jesus ed abung di Lazaro, a singa ginawa to la’d sakbay, tan nampalabi Biernes diman.

Anggaman ontan, sananey nin manaayam ed Betania so angimbita ed si Jesus tan ed saray kaiba to parad sakey a panangan ed labi Sabado. Si Simon iman, datin akating, a nayarin pinaabig nen Jesus ed asasakbay. Diad kuli to, siserbian nen Marta iray bisita. Balet, singa ugali to, si Maria so atentibo ed si Jesus, a natan et diad paraan ya amawalay sangsangan.

Si Maria so nanlukas na alabastron pananginan, odino melag a kargaan, a mankarga na nayarin sakey a libra na unguento, “[puron] nardo espique.” Saya so mablin tuloy. On, say bili to so misimbangan ed ngalngali sakey taon a sueldo! Sanen ikakalbo nen Maria so unguento ed ulo tan ed saray sali nen Jesus tan pupunasan iray sali nen Jesus na buek to, say ambalingit a samyong to so kinmayat ed interon abung.

Saray babangatan so maingongot tan insuppiat da: “Akin iyan inpandarak? NW.” Insan inkuan nen Judas Iscariote: “Akin a sayan unguento et ag-alako komon ed masulok a talonlasus a denarios tan inter ed saray duruka? NW.” Balet si Judas so agtalagan mapaga nipaakar ed saray duruka, ta sikatoy mantatakew manlapud kahon na kuartan aasikasoen na saray babangatan.

Si Jesus so angidepensa ed si Maria. “Paulian yo’n bokor,” inganggan to. “Akin et sikato’y gonigonen yo? Sikato’y nangawa na maong a gawa ed siak. Ta saray duruka wala ra ed sikayo lawas, tan bang no kaliktan yo nayarian yo so mangawa ed sikara na maong, balet siak andi ak ed sikayo lawas. Sikato ginawa to so ayarian to; pinasakbayan to a pinoyokan so laman ko nipaakar ed kiponpon ko. Et tua kuan ko ed sikayo, Angan iner a kipulongan na evangelio ed lapag a mundo, satan met so ginawa na saya’n bii nasalita naani ya onkanan pakanodnonotan ed sikato.”

Si Jesus so wadman la’d Betania a masulok lan 24 oras, tan say balita na kiwawala to so nikayat la. Kanian, dakel so linma ed abung nen Simon pian nanengneng si Jesus, balet ta linmara met a nengnengen si Lazaro, a wadman met. Kanian saray manunan saserdote so nannononong pian pateyen ya aglambengat si Jesus noagta pati si Lazaro met. Lapud dakel a totoo so mangipupundar na pananisia ed si Jesus lapud pakakanengneng ed samay pinaoli to! Peteg, agaylay inkauges na sarayan relihyoson pangulo! Juan 11:55–12:11; Mateo 26:6-13; Marcos 14:3-9; Gawa 1:12.

▪ Anton diskusyon so nagagawa diad templo ed Jerusalem, tan akin?

▪ Akin a nepeg ya akasabi si Jesus ed Betania ed Biernes imbes a Sabado?

▪ Sanen akasabi si Jesus ed Betania, iner so maseguron dinawesan to legan na Sabaton?

▪ Anton kiwas nen Maria so amawalay sangsangan, tan panon a sikatoy indepensa nen Jesus?

▪ Anto so mangiyiilustra ed baleg a karelmengan na saray manunan saserdote?