“Agko nin Balot Akanengneng na Singa Saya!”

NEN 1993 et say sangan opisina na Watch Tower Society diad Argentina so naimbitaan a mangibaki na sanlibon delegado ed Santiago, Chile, parad apat-agew a “Madibinon Panangibangat” a Distriton Kumbension na Tastasi nen Jehova. Saya so sankaunaan a pankanawnawan saray Tasin taga Argentina so naimbitaan a manbiahe bilang baleg a grupo ed kumbension diad biek-taew.a Anto so ebat? Masulok a 8,500 ya aplikanti so dinmagsa, a ditan et 1,039 so apili.

Sakey a dagup na 14 a bus so inarkila pian nagawa iyan 1,400-kilometron panbaroy manlapud Buenos Aires a mamaarap ed Santiago. Say 26-oras a biahe so aparakep na makapakelkelaw a nenengnengen. Diad imbeltang ed Kapalandeyan na Andes, dinmalan iray delegado ed asingger na Aconcagua, diad 6,960 metro a say sankatagyan a pantok ed Western Hemisphere. Nagkalautlan makatantanda et say palosor, a paabeban paliko-likon paonla’d Chile. Saray drayber so akaawat na aminpigapigan andukey ya impantipak lapud dunong da ed panagmaneho ed makapaangat a teritorya!

Anggaman ontan, say sankarakpan a nenengnengen et naromog ed kumbension a mismo. Diad mundo na nasyonal a gulo tan gutgutan ed rasa, agaylan makapaliket so pakanengneng ed nankakasakey a baleg a bilang na 80,000 nanlapud 24 bansan inmatendi​—talagan internasyonal ya impanaagi! Walan aktual ya anengneng so pankakasakey ed limog na saray kumbensionista, arum ed saray drayber na bus so angibalikas na interes diad impakaamta na dakel nipaakar ed Tastasi nen Jehova. “Agko nin balot akanengneng na singa saya!” inkelyaw na sakey ed sikara.

[Paimano ed leksab]