Say Sankabalgan a Toon Nambilay ed Kapiganman

Kapitulo 96

Si Jesus tan say Mayaman a Balolakin Manuley

Legan na idadalan nen Jesus ed distrito na Perea a mamaarap ed Jerusalem, sakey a balolaki so binmatik ya amaarap ed sikato tan tinmalimokor ed arapan to. Say laki so tatawagen a manuley, anganko ta mankabaliksan a sikatoy mamebenben na prominenten posisyon ed sakey a lokal a sinagoga odino membro ni ingen na Sanhedrin. Ontan met, sikato so mayaman a tuloy. “Maong ya Managbangat,” intepet to, “anto so gawaen ko, pian natawir ko so bilay ya andi angaan?”

“Akin et tatawagen mo ak na maong?” inyebat nen Jesus. “Angapo so maong nilikod so sakey, salanti Dios.” Maseguron say balolaki so manguusar ed “maong” bilang titulo, kanian impaamta ed sikato nen Jesus a say ontan a titulo so kayarian lambengat na Dios.

“No pirawat moy onloob ed bilay,” intuloy nen Jesus, “[mantultuloy ya] onoren mo so saray gangan.”

“Dinan ira?” tepet na laki.

Diad pangaaon na limara ed saray Samploran Ganggan, inyebat nen Jesus: “Ag ka mamatey, Ag ka manlawan ed ag mo asawa, Ag ka mantakew, Ag ka mansalita na tila a pantasi; Igalang mo so amam tan inam.” Tan iyaarum so nagkalalo nin importantin ganggan, ikuan nen Jesus: “Aroen mo so kaparam a too onong ed sika lanlamang.”

“Amin so saraya a bengatla sinumpal ko ra nanlapu ed inkaugaw ko,” inyebat na laki tekep na amin ya inkasimoon. “Anto ni so kulang ko? NW”

Diad itatalineng ed mapetepet, masimoon a kerew na laki, si Jesus so akaliknay aro parad sikato. Balet atebek nen Jesus so aro na laki ed materyal a kaykayarian tan kanian anukoy ed pankaukolan to: “Sakey a bengatla so kulang ed sika: onla ka, ilakom so angan anto’n wala ed sika, et iter mo ed saray duruka, et wala naani kayamanan mo ed tawen: et gala, tombok mo ak.”

Binantayan nen Jesus, maseguron tekep na panangasi, legan a say laki so onaalagey tan ontataynan ya apaermen a tuloy. Sikatoy bubulagen na kayamanan to ed kablian na peteg a kayamanan. “Agaylay irap,” intagleey nen Jesus, “na saray walaan na kayamanan ya onloob ed panaria’y Dios!”

Nikelawan iray babangatan ed saray salita nen Jesus. Balet sikaray nagkalalo nin abigla sanen intuloy ton insalaysay so kalapagan a totontonen: “Magmainomay ni sakey a camello ya onlabot ed abot na sakey a dagum, nen say sakey a too a mayaman ya onloob ed panaria’y Dios.”

“Siopa sirin so nayarin nilaban?” labay ya amtaen na saray babangatan.

Diad inenengneng ed sikara, inyebat nen Jesus: “Diad saray totoo ag nayari, balet aliwan ontan ed Dios: tan amin a bengabengatla nayarian ira na Dios.”

Diad pangiimano ed impanpili ran nikadkaduman tuloy manlapud mayaman a balolakin manuley, inkuan nen Pedro: “Nia, sikami tinainan mi ya amin, tan tinombok mi ka: anto sirin so wala naani ed sikami?”

“Dia ed panamalsa-lamet, NW” insipan nen Jesus, “sano say Anak na too onyorong naani ed trono na gloria to, sikayo onyorong kayo met naani ed labindua’n trono a mangokom ed saray labindua’n kailalakan na Israel.” On, ipapanengneng nen Jesus a wala so panamalsa-lamet na saray kipapasen ed dalin pian saray bengatla so nipawil a singa nen gapo ed harden na Eden. Tan si Pedro tan arum niran babangatan so mangawat na tumang na pananguley a kaiba nen Kristo ed sankamundoan a Paraiso. Maseguro, say ontan ya engranden tumang so matalonggaring ed antokaman a sakripisyo!

Anggaman ontan, anggan natan et walaray tumang, a singa mapekder ya ibabaga nen Jesus: “Angapo’y too ya anainan na abung, ono agagin lalaki, ono agagin bibii, ono ina, ono saray anak, ono daldalin, nisengeg ed siak, tan nisengeg ed evangelio. Ingen awaten to so maminlasus natan ed saya’n panaon, abu-abung, tan agagi’n lalaki, tan agagi’n bibii, tan saray ina, tan saray anak, tan daldalin, pati saray kapasegsegang; tan dia ed mundo ya onsabi say bilay a maando.”

A singa insipan nen Jesus, inerman a laen na saray babangatan to ed mundo, pangayagaan da so siglaotan ed saray kapara ran Kristiano a satan so lalon maapit tan mas mabli nen say pangagayagaan na natural iran membro na pamilya. Say mayaman a balolakin manuley so mapatnag a sinmaew ed sayan tumang tan samay andi-anggaan a bilay ed mangatatawen a Panarian na Dios.

Kayari na saya et inyarum nen Jesus: “Balet amayamay so saray onaan ya sikaray naonor; tan saray onor ya sikaray onona.” Anto so labay ton ibaga?

Labay ton ibaga a dakel a totoon “onaan” ed pangagayaga’d relihyoso iran pribilihyo, a singa samay mayaman a balolakin manuley, so agmakaloob ed Panarian. Magmaliw iran “onor.” Balet dakel, pati saray mapaabeban babangatan nen Jesus, a pabpabandayen na saray dilin-matunong a Pariseo bilang “onor”​—bilang totoo na dalin, odino ‛am ha·’aʹrets—​so magmaliw ya “onaan.” Say pagmamaliw dan “onaan” so mankabaliksan a sikaray makaawat na pribilihyon pagmaliw a kaiban-manuley nen Kristo ed Panarian. Marcos 10:17-31; Mateo 19:16-30; Lucas 18:18-30.

▪ Mapatnag, anton klasen manuley imay mayaman a balolaki?

▪ Akin ya ag-inmabuloy si Jesus ed panatawag ed sikaton maong?

▪ Panon a say eksperiensia na balolakin manuley so mangiyiilustra na kapeligroan na pagmamaliw a mayaman?

▪ Antoran tumang so insipan nen Jesus ed saray patumbok to?

▪ Panon a say unaan so magmamaliw ya unor, tan say unor ya unaan?