Say Sankabalgan a Toon Nambilay ed Kapiganman

Kapitulo 95

Saray Leksion ed Diborsyo tan Aro Parad Ugugaw

Si Jesus tan saray babangatan to so mamapaarap ed Jerusalem pian atendian so Paskua na 33 K.P. Bineltang da so Ilog Jordan tan dinmalan ed distrito na Perea. Pigaran simba ed asasakbay et si Jesus so walad Perea balet ta sikatoy kinerew ya onlad Judea lapud say kaaro ton si Lazaro so mansasakit. Legan a walad Perea ed saman, si Jesus so akitongtong ed saray Pariseo nipaakar ed diborsyo, tan natan et sikaray analambit lamet ed satan a pamaakaran.

Diad limog na saray Pariseo et wala so nanduruman totontonen nipaakar ed diborsyo. Imbaga nen Moises a say bii so nayarin idiborsyo lapud “sakey a bengatlan ag onkanepegan [ed sikato].” Arum so manisian saya so ontutukoy lambengat ed ag-inkalimgas. Balet ikukunsidera na arum so “sakey a bengatlan ag onkanepegan” a mangisasakop ed ankelag a tuloy iran kasalanan. Kanian, pian suboken si Jesus, intepet na saray Pariseo: “Onkatonongan kasi so pangisian na sakey a laki ed asawa to nisengeg ed anton bengatla?” Sikara so matalek ya antokaman ya ibaga nen Jesus so mangilanor ed sikato ed kasigensigenan ed saray Pariseo a walaan na nanduruman panmoria.

Onsianon inarap nen Jesus so tepet, ya ag-onkikiling ed dinanman ya opinyon na too, noagta manutukoy ed orihinal a disenyoy panangasawa. “Ag yo ta abasa,” intepet to, “ya say amalsa ed sikara nanlapu ed gapo ginawa to ra a laki tan bii? Tan inkuan to, Lapu’d saya say laki tainan to naani so ama tan ina to, tan ontipon naani ed asawa to; et sikara’n dua saksakey ira naani ya laman? Kanian aliwa la ran duara, no ag saksakey a laman. Say inpantipon na Dios sirin, aleg a sianen na too.”

Impanengneng nen Jesus, a say orihinal a gagala na Dios et say pankasakey na sanasawa, a sikara so agmandidiborsyo. No talagan ontan, inyebat na saray Pariseo, “akin sirin a si Moises ingangan to so pangiter na sakey a sulat na pansian ta pian sikato so patainanen?”

“Si Moises lapu ed kaawetan na puso yo inaboloyan to kayo a mangisian ed saray kaasawaan yo,” inyebat nen Jesus, “balet nanlapu ed gapo aliwan ontan.” On, sanen inletneg na Dios so peteg ya estandarte panangasawa ed harden na Eden, sikatoy agnanggawa na probisyon parad diborsyo.

Intuloy ya inkuan nen Jesus ed saray Pariseo: “Kuan kod sikayo, Siopaman a laki a mangisian naani na asawa to, nilikod ed inpilawanan [manlapud Griego, por·neiʹa] tan mangasawa na sananey a bii, mankasalanan ed pikakalugoran.” Diad ontan et ipapanengneng to a say por·neiʹa, a graben seksual ya imoralidad, so mogmon basiyan ya inabuloyan na Dios parad diborsyo.

Diad impakamorian say panangasawa so nepeg a magnayon a pankasakey a walaan na sayan mogmon basiyan parad diborsyo, saray babangatan so apakiwas a mangibaga: “No ontan so kipapasen na laki ed asawa to, ag manepeg [agnisusuheri, NW] so mangasawa.” Anggapoy suppiat a say sakey a manplaplanon mangasawa so nepeg a seryoson mangunsidera ed inkapermanente na bedber na panamaley!

Intuloy nen Jesus so mansalita nipaakar ed kasuloan. Impaliwawa ton arum a lalaki so niyanak ya eunocos, ya agmakayarin mangasawa lapud walaay dipirensya’d sekso. Arum so ginawan eunocos na totoo, a maruksan ginawan inutil ed sekso. Kaunoran, arum so mamupuger ed pilalek dan mangasawa tan ed pangayaga’d relasyon ed sekso pian sikaray makapangitalaga ed inkasikara a nagkalalo ed saray pamaakaran a nisisiglaot ed Panarian na katawenan. “Sikato a makapangilugar parad [kasoloan] so mangilugar ed satan, NW” sinampotan nen Jesus.

Saray totoo natan so ginmapon mangawit ed saray kalangweran iran anak da ed si Jesus. Balet ta, nampasnokan na saray babangatan iray ugugaw tan analin sikaray ablogen, maseguron labay dan salimbengan si Jesus manlapud agnakakaukolan a gonigon. Balet inkuan nen Jesus: “Paulian yo so saray ankekelag ya ugugaw ya ondago ed siak; ag yo ra sebelan: ta sikara so makankien na panaria’y Dios. Tua kuan ko ed sikayo, Siopaman ya agmangawat na panaria’y Dios a singa sakey a melag ya ugaw, ag makaloob a balot diman.”

Agaylan maabig a leksion so intarok dia nen Jesus! Pian awaten so Panarian na Dios, nepeg tayon aligen so inkamapaabeba tan inkanabangatan na angkelag ya ugugaw. Balet say ehemplo nen Jesus so mangiyiilustra met ed kaimportantian, nagkalautla ed atateng, na pangusar na panaon parad ananak da. Impanengneng natan nen Jesus so aro to parad ugugaw diad impangegna ed sikara tan impamendisyon ed sikara. Mateo 19:1-15; Deuteronomio 24:1; Lucas 16:18; Marcos 10:1-16; Lucas 18:15-17.

▪ Antoran nanduruman panmoria ed diborsyo so walad saray Pariseo, tan kanian panon a sinubok da si Jesus?

▪ Panon so impideneng nen Jesus ed sagpot na saray Pariseo pian sikatoy suboken, tan anto so mogmon basiyan ya inter to parad diborsyo?

▪ Akin ya ibabaga na saray babangatan to ya agnisusuheri pangasawa, tan anton rekomendasyon so intarok nen Jesus?

▪ Anto so ibabangat nen Jesus diad pidedeneng to ed angkelag ya ugugaw?