Melag Balet Makapanyari

SI Robert, sakey a balolakin nanlapud Canada, so nambaroy ed interon Europa diad pananap na gagala to ed bilay. Dakel a bengatla so anengneng to a sengegay impakalikna to na kaandi-ilalo nipaakar ed arapen.

Legan ya akayurong ed loob na sakey a restawran ed Seville, Espanya, walay angiderew ed si Robert na sakey a tract ya impalapag na saray Tasi nen Jehova. Diad gapo, nanduaruwa si Robert. “Anggaman kuan, binasak iman,” kuanto. “Agko nisalaysay, balet ta aliknak a walay sakey a bengatlan biglan nagmaliw a malinew ed siak. Diad saray impanbaroy ko, akanengneng ak na dakel a pormay depresyon tan inkanalmay, tan siak so dismayadon tuloy lapud anggapoy nagawaan ko pian umanen iray bengatla. Diad impakabasa ed tract, nitepet ko, ‘Posibli kasin niwala iyan “balon mundo?”’ Insan, inisip ko, ‘On, nayarin posibli itan.’”

Tekep na apasimbalon ilalo, nansulat si Robert ed opisina na Tastasi nen Jehova ed Canada, ya onkekerew na ombisita ed sikato diad isempet tan tulongan a mantalos ed Biblia.

Anggapoy duaruwa, say insalitan balikas so makapanyari. Anggaman ontan, agbalot memelagen so niimprintan mensahe. Kaunongan may kamelag, walay mapuersan epekto na saray palapagan a base’d Biblia. Saraya so makasagyat ed kanonotan tan puso, a mangiter na seguradon ilalo ed arapen.​—Hebreos 4:12.