Say Sankabalgan a Toon Nambilay ed Kapiganman

Kapitulo 94

Say Pankaukolan Parad Pikakasi tan Parad Ikamapaabeba

Diad asasakbay, sanen sikato so walad Judea, angisalaysay si Jesus na sakey ya ilustrasyon nipaakar ed kaimportantian na pagmaliw a mantultuloy ed pikakasi. Natan, diad unor a baroy to ed Jerusalem, indanet to lamet so pankaukolan na ag-itunda ed panagpikasi. Nayarin si Jesus so wala ni ed Samaria odino Galilea sanen sikatoy angisalaysay ed saray babangatan to na sayan kaaruman ya ilustrasyon:

“Wala so sakey ya okom ed sakey a ciudad, ya ag to antakot so Dios, et ag to pagalangan so too. Et wala’y sakey a bii a balo ed saman a ciudad; et maparanay a linma ed sikato, a kuan to, Isingil mo ak ed kabosol ko. Et inmaleg ed magano: ingen kayari to inkuan to ed inkasikato, Angan ag ko antakot so Dios, tan ag ko pagalangan so too; Manwari lapu’d saya a balo’n bii makaalipanes ed siak, sikato so isingil ko, ompan napatikey to ak ed naynay ya idarago to.”

Insan impanengneng nen Jesus so aplikasyon na istorya to, ya ibabaga: “Denglen yo so salita na okom ya ag matunong. Et say Dios ag to kasi naani isingil so saray pinili to, ya ontawag ed sikato ed agew tan labi, et sikato so maanus ed sikara?”

Aglabay ya ibaga nen Jesus ya ipatnag a si Jehova a Dios so diad antokaman a paraan et kapara na samay agmatunong ya ukom. Imbes, no anggan say sakey ya agmatunong ya ukom so onkiwas ed mantultuloy iran kerew, nepeg ya anggapo so suppiat a say Dios, a matunong tan maong, so onebat no say totoo to so ag-ontunda ed panagpikasi. Kanian intuloy nen Jesus: “Kuan ko ed sikayo, a sikara so isingil [na Dios] a tampol.”

Mabetbet a say hustisya so isisiblet ed saray pakaskasi tan duka, bangta saray makapanyari tan mayaman so mabetbet a papaboran. Anggaman ontan, aglambengat seguroen na Dios a saray marelmeng so makatunongan a nadusa noagta seguroen to met a say ariripen to so makatunongan a natrato diad pangiter ed sikara na andi-anggaan a bilay. Balet kaunongay karakel na totoon mapekder a manisia a say Dios so manggawa’d inkahustisya a nagawan maples?

Diad panutukoy nagkalautla ed pananisian miolibay ed pakayari pikakasi, intepet nen Jesus: “Sano onla dia so Anak na too, makaromog kasi na pananisia ed dalin?” Anggaman say tepet so ag-inebatan, say implikasyon et nayarin say ontan a pananisia so agmagmaliw a kalapagan sano si Kristo so onsabi ed Panarian tekep na pakayari.

Arum ed limog na saramay onderengel ed si Jesus so walaay dilin-kaseguroan ed pananisia ra. Manmamatalek ira ed inkasikara a sikaray matunong, tan pabpabandayen da’ray arum. Arum ed saray babangatan nen Jesus so nipilaktip ni ingen ed grupo. Kanian impaarap to so onggendan ya ilustrasyon ed saratan:

“Duara’n totoo, linma ra ed templo a manpikasi; say sakey Fariseo, et say sananey publicano. Et say Fariseo nanalagey tan akikasi ed onia a bokbokor to, Dios, misalamatak ed sika, ta aliwa ak a singa saray arum a totoo, a matatakew, aliwara’n matunong, mikakalugoran, ono angan singa saya a publicano. Manayunal ak a mamidua ed sakey simba; iiter ko so kakaplo na amin a naanap ko.”

Saray Pariseo so kabat ed mapubliko iran panangipatnag da na inkatunong pian pandinayewen so arum. Say gendagendat iran agew parad dilin-impakseb a panag-ayunal da et no agew na Lunes tan Huebes, tan alablabas a mapeget a manbabayar na kakaplo na anggan melag a pisipising na uma. Pigaran bulan ed asasakbay, say panamusol da ed kabanyakan a totoo so niparungtal legan na Piesta na saray Tabernakulo sanen inkuanda: “Saraya a katooan ya agda amta so gangan [salanti, say panangipatalos na Pariseos ya inter ed satan] naayew ira.”

Diad pangitutuloy ed ilustrasyon to, inkuan nen Jesus so nipaakar ed ontan a “naayew” a too: “Balet say publicano, a manalalagey ed arawi, ag to nitangay a maong so saray mata to ed tawen, ingen mandugal ed pagew to, a kuanto, Dios, kasian mo ak a managkasalanan.” Lapud say managsingil na buwis so mapaabeban amidbir ed saray lingo to, inkuan nen Jesus: “Kuan ko ed sikayo, Saya a too pinmawil ed abung to ya apatunong nen say sakey: ta angan siopa a mamaatagey ed sikato lanlamang napaabeba; et say manpaabeba napaatagey.”

Sirin idadanet lamet nen Jesus so pankaukolan na pagmaliw a mapaabeba. Lapud binmaleg ed sosyedad a saray matunong-ed-sarilin Pariseos so ontanlan maimpluensya tan naynay a nidadanet so posisyon tan ranggo, agmakapakelaw ya anggan saray babangatan nen Jesus so apektado. Ingen, agaylan maabig a leksion na inkamapaabeba so ibabangat nen Jesus! Lucas 18:1-14; Juan 7:49.

▪ Akin ya impagamor na agmatunong ya ukom so kerew na biin balo, tan anton leksyon so ibabangat na ilustrasyon nen Jesus?

▪ Anton pananisia so anapen nen Jesus sano sikatoy onsabi?

▪ Parad siopa so pangipapaarapan nen Jesus ed ilustrasyon to nipaakar ed Pariseo tan say managsingil na buwis?

▪ Anton awawey na saray Pariseo so nepeg a paliisan?