Say Sankabalgan a Toon Nambilay ed Kapiganman

Kapitulo 93

Sano say Anak na Too so Niparungtal

Legan a si Jesus so wala ni ed amianen (balanglad Samaria odino ed Galilea), sikatoy tinepetan na saray Pariseo nipaakar ed isasabi na Panarian. Manisia ran saman so onsabi tekep na baleg a panengneng tan seremonya, balet inkuan nen Jesus: “Say panarian na Dios ag onsabi ya wala so tanda’n pakanengnengan. Agda met nikuan, Ni, wadia! ono, Ni, Niman la! ta nia, say panarian na Dios wala ed dalem [utel, NW] yo.”

Wala iray panaon a saray salita nen Jesus ya “ed utel yo” so impatalos ya “ed dalem yo.” Kanian arum so nanisip a say labay ya ibaga nen Jesus et say Panarian na Dios so manuuley ed kapusoan na ariripen na Dios. Balet, mapatnag, say Panarian na Dios so aliwan walad dalem na kapusoan na sarayan agmananisian Pariseo a katongtong nen Jesus. Ingen, saman so wala ed utel da, lapud say tinuro na Dios ya ari na Panarian na Dios, si Jesu-Kristo, so wadman a mismo ed limog da.

Nayarin kayari intaynan na saray Pariseo a si Jesus so nantultuloy nin akitongtong ed saray babangatan to nipaakar ed isasabi na Panarian. Say nagkalalon walad kanonotan to et say arapen a kiwawala to ed Panarian tekep na pakayari sanen impasakbay to: “Ikuan da ed sikayo, Ni, niman la! Ni, nia la! ag kayo oonla, tan agyo’ra tomboken [sarayan palson Mesias]; Ta singa say kirmat, a no onkirmat manlapu ed sakey a pasen ed lepsag na tawen onliwawa anga ed sananey a pasen ed lepsag na tawen; ontan naani Anak na too sano agew to.” Kanian, ipapatnag nen Jesus a no panon a say kirmat so nanengneng ed malaknab a lugar, say ebidensya na kiwawala to tekep na pakayari ed Panarian so malinlinew a nanengneng na amin a mankaliktan a makanengneng ed satan.

Insan impareng nen Jesus iman ed saray agawgawa nen inmuna pian ipanengneng no antoray magmaliw ya awawey na totoo legan na arapen a kiwawala to. Impaliwawa to: “Et onong na agawa ed saray agew nen Noe, ontan met naani ed saray agew na Anak na too . . . Ontan met so agawa ed saray agew nen Lot; angan ira, naninum ira, nansaliw ira, nanlako’ra, nantanem ira, nanabung ira; Ingen dia ed agew na impaway nen Lot ed Sodoma inmuran na apuy tan azufre nanlapu ed tawen, et dineral to’ra ya amin. Singa saya, ontan met naani ed agew a kipatnag na Anak na too.”

Ag-ibabaga nen Jesus a saray totoo ed agew nen Noe tan ed agew nen Lot so atawtaw lapu lambengat ed impangemtan da na normal iran aktibidad na panangan, pananginum, panagsaliw, panaglako, panagtanem, tan panagpaalagey. Anggan si Noe tan Lot tan saray pamilya ra so nanggawa ed sarayan bengatla. Balet say arum so nanggawa ed saratan ya inagew-agew ya aktibidad ya agmangiimano ed linawa na Dios, tan lapud saya et tinawtaw ira. Diad parehon rason, saray totoo so natawtaw sano niparungtal si Kristo legan na baleg a kairapan ed sayan sistema na bengabengatla.

Diad pangidadanet ed kaimportantian na ikiwas a tampol ed ebidensya na arapen a kiwawala to ed Panarian tekep na pakayari, inyarum nen Jesus: “Dia ed satan ya agew, say wala ed toktok na abung, tan saray kayarian to dia ed abung, ag naani onakseb a mangala ed sikara: et say wala ed uma ontan met ag ompawil. Nodnonoten yo so asawa nen Lot.”

Sano say paneknek ed kiwawala nen Kristo so ompatnag, saray totoo so agmakapangiyabuloy ed aro’d materyal a kaykayarian da a mangamper ed sikara manlapud ikiwas a tampol. Diad itataynan to ed Sodoma, mapatnag a say asawa nen Lot so linmingaw tekep na pankawanan ed saray bengatlan tinaynanan, tan sikato so nagmaliw a pungol na asin.

Diad pangitutuloy ed panideskribe to ed kipapasen a niwala legan na arapen a kiwawala to, inkuan nen Jesus ed saray babangatan to: “Dia ed satan a labi wala so duara’n lalaki ed sakey a dokolan; say sakey naala et say sakey napaulian. Wala naani duara’n bibii a peles dan mangigiling; say sakey naala, et say sakey napaulian.”

Say kaala so misimbangan ed iloloob nen Noe a kaibay pamilya to ed biong tan say impangipaway na saray anghel ed si Lot tan say pamilya to ed Sodoma. Kabaliksan na saman so kililiktar. Diad biek a dapag, say pagmaliw a napaulian so mankabaliksan na panagmak na kadederal.

Diad sayan punto, intepet na saray babangatan: “Iner, Katawan?”

“No iner so kawalaan na bangkay, diman met so pantitiponan na saray aguila,” inyebat nen Jesus. Saraman so “naala” parad kililiktar so aliling day matudyo’d-pakanengneng iran agila ed pantalos a mantitipon ira ed “bangkay.” Say laman so walaan na kipaakaran ed tuan Kristo diad agnanengneng a kiwawala to ed Panarian tekep na pakayari tan ed espiritual a piesta ya itatarok nen Jehova. Lucas 17:20-37; Genesis 19:26.

▪ Panon a say Panarian so walad utel na saray Pariseo?

▪ Diad anton paraan a say kiwawala nen Kristo so singa kirmat?

▪ Akin a natawtaw iray totoo parad kiwakiwas da legan na kiwawala nen Kristo?

▪ Anto so kabaliksan na pagmaliw a naala, tan pagmaliw a napaulian?