Say Sankabalgan a Toon Nambilay ed Kapiganman

Kapitulo 86

Say Istorya na Abalang ya Anak

Kasumsumpal lambengat ni na impangisalaysay na ilustrasyon ed saray Pariseo nipaakar ed pakaromog lamet ed sakey ya abalang a karnero tan sakey ya abalang a drakman plata, intuloy nen Jesus natan tekep a sananey nin ilustrasyon. Saya so nipaakar ed sakey a maaron ama tan say pidedeneng to ed duaran ilalak ton lalaki, a balang sakey ed sikara so walaan na seryoson lingo.

Unona, wadtan so yogtan, say manunan ongaganap ed ilustrasyon. Kinerew to so tawir to, a mabulos ya inter ed sikato na ama to. Insan sikato so tinmaynan tan alanor ed sakey ya imoral a tuloy a paraan na kabibilay. Balet ontalineng legan ya isasalaysay nen Jesus so istorya, tan imanoen no sarag yon bidbiren no siopa so irerepresenta ra.

“Sakey a too,” ingapo nen Jesus, “[so] walaan na duara ya anak a lalaki. Et say yugtan ed sikara inkuan to ed ama to, Ama, iter mo ed siak so kaaruman na kayarian mo a nabebetangan ko. Et inapag to ed sikara so kayarian to.” Anto kasi gawaen na sayan yogtan ed saray bengatlan naawat to?

‘Saginonor,’ impaliwawa nen Jesus, “kayari aliwa’n dakel ya agew, say yugtan ya anak tinipon to ya amin, et linma ed kurang ed sakey a dalin ya arawi; et diman to dinarak so kayarian to ed panagbilay a marutak.” Diad tua, ginastos toy kuarta to diad piaamong ed saray balangkantis. Kabekta et sinmabi so panaon na kairapan, a singa intuloy nen Jesus ya insalaysay:

“Nen agastos to la ya amin, sinmabi ed saman a dalin so baleg ya eras: et sikato ginmapo ya wala ed pankaokolan. Et linma tan inmasinger ed sakey ed saray ombaley ed saman a dalin: et sikato so imbaki to ed saray uma to pian manpakan na baboy. Et kinaliktan to a panoen so eges to ed saray algarrobas a kanen na saray baboy; et angapo so too ya angiter ed sikato.”

Agaylan kaabeba na klase kabibilay a napaskar a mankumponi na baboy, lapud sarayan ayep so marumsis unong ed Ganggan! Balet say nagkalautlan amairap ed sayan anak et say mapalalon pakakaerasan, kanian nilabay ton kanen so ipapakan ed saray baboy. Lapud sayan makapasesgan kalamidad to, inkuan nen Jesus, “nannunot ed inkasikato.”

Diad pangitutuloy ed istorya to, impaliwawa nen Jesus: “Inkuan to [ed inkasikato], Pigapigara so mioupa ed abung nen amak ya walaan na daakan a tinapay tan makapangikera ra, et siak ompatey ak dia ed eras! Onalagey ak tan onlaak ed amak, et ikuan ko ed sikato, Ama, nankasalanan ak sumpa ed tawen, tan dia ed arap mo: Agak la onnepeg ya ingaran na anak mo: gawa moak a singa sakey ed saray miopupa ed sika. Et inmalagey, tan linma ed ama to.”

Nia so bengatlan nepeg a nonoten: No say ama to so amasnok tan sikatoy ineyagan sanen sikatoy tinmaynan, maseguron say anak so ag-akanonot na onman a gawaen to. Anganko ta dineside to so ompawil tan salien so mananap na trabaho inerman diad niyanakan ton bansa pian diad ontan et agmakapiarap ed kinen ama to. Anggaman ontan, anggapo so ontan a kanonotan to. Say labay to et onsempet ed sikara!

Malinew, say ama ed ilustrasyon nen Jesus so mangilalaman ed maaro, maabagey a mangatatawen ya Ama tayo, si Jehova a Dios. Tan nayarin abidbiran yo a say abalang, odino managdarak ya anak so mangilalaman ed saray kabkabat a managkasalanan. Saray Pariseo, a pitotongtongan nen Jesus, so diad asasakbay et nanbalaw ed kinen Jesus parad pirurungo ed sarayan mismo. Balet siopa so ilalaman na matatatken ya anak?

Sanen Nalmo so Abalang ya Anak

Sanen say abalang, odino managdarak ya anak ed ilustrasyon nen Jesus so pinmawil ed abung nen ama to, anton klase panangbrasa so naawat to? Ontalineng legan ya idedeskribe itan nen Jesus:

“Balet nen arawi ni, sikato so anengneng nen ama to, et atenyeg so panangabagey to, et binmatik, tan nilakap to ed beklew to, et sikato’y inangoban to.” Agaylan mapangasi, maaron ama, ya agaylay abig a mangilalaman ed mangatatawen ya Ama tayo, si Jehova!

Maseguron abalitaan na ama so kabibilay na madarak ya anak to. Ingen ta sikatoy inabrasa to ya anggapoy panaalagar parad sakey a detalyadon panangipaliwawa. Si Jesus so walaan met na ontan a manangabrasan espiritu, a mangaala na kundang diad iyaasingger ed saray managkasalanan tan managsingil na buwis, ya ilalaman na managdarak ya anak ed ilustrasyon.

Tua, say makatebek ya ama ed ilustrasyon nen Jesus so andi-duaruwan walaan na ideya ed panagbabawi na anak to diad pakakaimano ed maermen, akatuek ya itsura to legan na ipapawil to. Balet say maaron kundang na ama so amainomay parad anak a mangipatua na kasalanan to, a singa isasalaysay nen Jesus: “Et inkuan na anak ed sikato, Ama, nankasalanan ak sumpa ed tawen, tan dia ed arap mo: agak la manepeg a tawagen na anak mo. [Gawa moak a singa sakey ed saray miopupa ed sika.]”

Ingen, ngalngalin agni asumpal ed pansasalita so anak sanen say ama to so kinmiwas, a mangigaganggan ed ariripen to: “Ipawa’yo a maganganat so sankaabigan a kawes, et sikato so isolong yo ed sikato; et yanyo so sakey a singsing ed lima to, tan sapin ed saray sali to: Et awit yo so pinataba a vaca, tan sikato so pateyen yo, et mangan itayo, tan manliket itayo: Ta saya so ana’ ko inatey, et mabilay lamet; abalang, et aromog.” Insan “ginmapo ra a nanliket.”

Kaleganan to, say “anak [na ama] a pangoloan wala nen saman ed uma.” Imanoen no sarag yon bidbiren no siopa so irerepresenta to diad italineng ed nakekeraan a kabiangan na istorya. Onia so inkuan nen Jesus ed matatatken ya anak: “Nen sinmabi tan inmasinger ed abung, nadngel to so togtog tan sayaw. Et tinawag to so sakey ed saray ariripen, tan tinepe’ to ed sikato no anto kasi so saraya a bengatla. Et inkuan to ed sikato, Si agim sinmabi; et si amam pinatey to so pinataba a vaca, lapu’d sikato so inawa’to a nilaban tan maksil. Ingen nanpasnok, et agto linmoob: et pinmaway so ama to, tan sikato so akikasian to. Balet inmebat tan inkuan to ed ama to, Nia, dia ed saraya a dakel a taon nanlingkor ak ed sika, tan angan kapigan agko sinumpa so gangan mo: et angan kapigan ag moak inikdan na sakey a melag a kanding, pian makapiliket ak ed saray kakaarok: Ingen nen sinmabi saya’n anak mo, ya inopo’to ray kayarian mo ed saray mauges a bibii, pinatey mo nipaakar ed sikato so vaca a pinataba.”

Siopa, a singa say matatatken ya anak, so nagmaliw a kritiko ed abagey tan imano ya ipapanengneng ed saray managkasalanan? Agta saray eskriba tan Pariseo? Bangta saman so panagbalaw da ed kinen Jesus lapud panangabrasa to ed saray managkasalanan kanian insalaysay nen Jesus iyan ilustrasyon, malinew a sikara so ilalaman na sayan matatatken ya anak.

Sinampotan nen Jesus so istorya to diad impitongtong na ama ed matatatken ya anak to: “Ana’ko, sika naynay ka ed siak, et amin a kien ko, kien mo. Balet akaokolan so panliket tan panambegya: tan saya so agim ya inatey, mabilay lamet; tan abalang, et aromog.”

Diad ontan et agla imbaga nen Jesus no anto so ginawa na matatatken diad kaunoran. On, diad saginonor, kayari impatey nen Jesus tan inkioli to, “baleg ya olop na saray sacerdotes so tinmolok ed pananisia,” a posiblen mangilalaktip na arum ed sarayan ‘anak a pangoloan’ a klase a pitotongtongan dia nen Jesus.

Balet siopa diad modernon panaon so irerepresenta na duaran anak? Peteg a saraman so akaamta na magenap nipaakar ed saray gagala nen Jehova a nawalaan na sakey a basiyan parad iloloob da ed sakey a pisisiglaotan ed sikato. Irerepresenta na matatatken ya anak so arum ed saray membro na “daiset a papastolan,” odino “[kongregasyon, NW] na saray pangoloan ya anak ya walaran nisulat diman ed tawen.” Saraya so angadapta na sakey ya awawey a mipadpara ed samay matatatken ya anak. Sikara so andian na pilalek a mangabrasa ed sakey a mangaraldalin a klase, say ‘arum a carnero’ ya iisipen dan onsisikat nin lalo nen say sikara.

Say managdarak ya anak, diad biek a dapag, so mangilalaman ed saramay totoo na Dios ya ontataynan pian pangayagaan so likeliket ya iyoopresi na mundo. Anggaman ontan, asabi panaon, a saraya so magbabawin ompapawil tan magmamaliw lamet ya aktibon ariripen na Dios. On, agaylan maaro tan mapangasi so Ama ed saramay mamibidbir ed pankaukolan da na panamerdona tan ompapawil ed sikato! Lucas 15:11-32; Levitico 11:7, 8; Gawa 6:7; Lucas 12:32; Hebreos 12:23; Juan 10:16.

▪ Siopa so pangibabagaan nen Jesus ed sayan ilustrasyon, odino istorya, tan akin?

▪ Siopa so manunan ginmanap ed istorya, tan anto so agawa ed sikato?

▪ Siopa diad agew nen Jesus so irerepresenta na ama tan yogtan ya anak?

▪ Panon ya inalig nen Jesus so ehemplo na maabagey ya ama ed ilustrasyon to?

▪ Anto so panmoria na matatatken ya anak diad panangabrasa ed agi to, tan panon so inkiwas na saray Pariseo a singa samay matatatken ya anak?

▪ Anton aplikasyon ed ilustrasyon nen Jesus so wala ed agew tayo?